جيتك بْقَلْبِي وسَوْ اللي تَبِيْه=سَوْ بِهْ ماشِئْت وافْعَل ماتَبِي
أنت عمري مَاعَلاَ عمري عَلِيْه=دام فيك يْرُوح حِزْنِي وتْعَبِي
والله إن الشوق بعيونك أجِيْه=عايشٍ في داخله شيخ وْصِبِي
إعْتَلِيت بْخَافِقِي يَامِعْتِلِيه=شب نارك فيه من سَمْر حْطِبِي
خل ليلك مع هواجيسي نِزِيْه=اسرْ بِي من قبل ما اطْلِب مَطْلِبِي
خذني الطفل الصغير من السِّفِيه=وَدِّنِي حِضْنِك وْعَلِّمْنِي الحَبِي
ضِمِّنِي شَهْوَة لِقَاء ماله شِبِيْه=تِسْكِر انفاسي وتِتْلِف بِعْصِبِي

ليتك تِمُوت اليوم وتْمُوت الاشواق=وإلا تعيش الحِزْن وتْمُوت فيني
ألقاك صدفة ينتهي وصْلِك فْرَاق=ياويل قلبي من جفاك وْحنيني
البرد قآسي والدفَاء لحْظَة عْنَاق=ياشيب عيني كيف ضآعت سْنيني
عادي يضيق الصدر..والصدر لاضاق=أصغر مشارِيهَه على دمع عيني
ياسيدة حِبْر القصايد بالاوراق=كيف اكتبك والسطر داخل يديني
إن كان عندك عِتْق من بِرْ الإعتاق=جاهي قبل عفوك يقول إعتقيني
فاق الخيال الوَصْف والوَصْف مافآق=خيالي اللي في عيونك يبيني

إلَى نِهَايَات الأمَل والتُوَاجِد=الصبر صبري والقصايد مَهِنْ لِّي
كلٍ تِمَنَّى الموت يَأتِيه سَاجِد=وانا سِجَدْ مُوتِي عَلَى اطْرَاف ضِلِّي
الحِزْن فيني فوق توضيح وَاجِد=أجِيه كِلِّي واحْتِزِمْ فيه كِلِّي
من حَسْرِتِي من قَسْوَة الغَبْن هَاجِد=كِنِّي على وِجْهَة غيابي مْوَلِّي
تَعَقَّد النَاجِدْ على شان ناجد=مابين حب العالمي والمَحَلِّي
نَرْجِد ويَرْجِدْنَا مع الرَّجْد راجد=رغم الالم شر البليه تِسلِّي
خالد ، علي ، عثمان ، سلمان ، ماجد=واحد من الخمسه سِمِوِّه مضلِّي

عِشْقِي لْشَمَّر عِشْق شَمَّر للإنْجَاز=أو عِشْق مَجْد الشَّمِّري لَلْجْنَازه
الشَّمِّرِي في عَالَم المَرْجْلِه فاز=يَكْفِيك إنْ الطِّيب والعِزْ حَازه
حِنَّا طَنَايَا الموت الأحْمَر والاعْجَاز=وحِنَّا سَنَاعِيس الفَخَرْ واعْتِزَازه
أمْجَآدِنَا غَصْبٍ عَلَى الغَصْب تِجْتَاز=مَنْ فِعْلِنَا حِنَّا خَتَمْنَا جَوَازه
مِنْ عِزِّنَا حِنَّا عزيزين وعْزَاز=ومِنْ صِيْتِنَا حائل بالامجاد فَازه
لاضاقت الدنياء عَلَى كل مِعْتَاز=يقول شَمَّر .. تِنْتِهِي كل عازه
دولة عطاء حِنَّا وفينا الصِّطر حاز=على جميع ألْقَابِنَا وامْتِيَازه

يادكتور حَوِّلْنِي على واحدٍ مَمْلُوح=يِدَاوِمْ مَعَك هو الذي سَبَّبْ الزَّحْمَه
يِشُوفِه مِثِل شَرْوَاي من خَآطْرِه مَجْرُوح=يِطِيْب بْلِقَاء شُوفِه ويِشْتِّدْ بِه عَزْمَه
عَلَيْ الحرام إنه حَرَمْنِي وزَاد النُّوح=عَلَيْ الحرام إنِّي أهِيْجِن عَلَى إسْمَه
عَلَيْ الحرام أرُوح وارْجِعْ،، وَاجِي وَأرُوح=عَلَى شَآن زُولِه شِيْب عِيْنِي عَلَى جِسْمَه
مْخَصَّرْ ، مْفَصَّلْ ، مِتِّصِلْ ، مِنْفِصِلْ ، مَفْتُوح=أحِسْ الصَّدِرْ مَكْتُوم .. يِتْنَفَّس الكَتْمَه
تِفَتَّقْ زْرَارِه من نْهُودِه وصَمْت البُوح=واشُمْ العَرَق وافْقِدْ عَلَى هَبَّة النَّسْمَه
أنَا مَاحَسَبْت إن الهَوَاء يَذْبَح المَذْبُوح=ولا كِنْت احَسْب النور تَسْرِي بِه العَتْمَه

ياشوقي اللي كريم وبَارْقِه طَيِّب=البارحه نجم وَصْلِي غَصْب سَرّيته
أشتاق لك يالبِعِيد وعندي قْرَيِّب=أقرب من انفاس صدري لا تَحَرّيته
يغيب فكري معه لا غاب ويْغَيِّب=سوالفٍ بيننا ذكراه مَرّيته
يَطْرِي لي اللي طَرَى له راسي مْشَيِّب=من حبه اللي بدون شعور طَرّيته
طيفه إذا مر عيني قلت ياحْبَيِّب=أفز له عن ظروف الحلم ذرّيته
أخاف هقوة غرامي فيني تْخَيِّب=الصاحب اللي حشا مايوم غرّيته
أصبحت موضوع شرح الحزن بِكْتَيِّب=وامْسِيت أقْرَأ عناويني وقرّيته

راحن مراسيلي معزّه ولا جَنْ=خابَنْ وخآب اللي بعد خاب ظنّه
لو الهجاء وحْرُوف هَجْره تَهَجَّنْ=مشاعري كان الخفوق ذْبَحَنّه
خيول صدري كل ماضقت هَجَّن=على حِمَاء كهْفٍ زبَن كل وَنِّه
بوح القصايد مع بعضهن تحاجن=قصة غرامي مالها مِنْك مِنّه
يابرزخ الوالي ظروفي تناجن=بين الرحيل وبين كِنِّي وكِنَّه
سود الليالي من عذابي تَرَجَّن=موت الامل يوم الهقاوي بَلَنّه
في داخلي أذكاري البِيض حَجَّن=على وصل من باعهن واشْتَرَنّه

يِشُـوْشْ راسـي مـن فْـعُـول الطنـايـا=أفعالهـم نجـمٍ صَـعَـدْ طلْـعَـة سْهِـيـل
لــو تجتـمـع فيـنـا القضـايـا قضـايـا=حنـا بْـعِـزْ أهــل الوجـيـه الحلاحـيـل
لــو الـزمـن لــه قَـصْــر كـلــه زوايـــا=شمـر صِطَـر تَهْـدِم عليـه البهاذيـل
حـنــا كــــذا فـيـنــا تـعـيــش الـمـزايــا=أكبـر دليـل الشِّيـل فينـا لِـقَـى حـيـل
الله خَــلَــقْــنــا لــلــتــراحـــم هــــدايـــــا=والله خَـلَـقْـنـا للـمـصـايـب مـداهــيــل
حــنــا الــيـــا مِــنَّـــا نـويــنــا الـنــوايــا=جينـا مثـل سيـلٍ تَحَـدَّر علـى سـيـل
وحـنــا الـيــا مِـنَّــا عطـيـنـا العـطـايـا=نعطـي ونَضْحَـك للسنيـن المقابـيـل
وحـنــا بَـعَــدْ غَـلْـبَـا وحِـنَّــا الـدَهَـايَــا=وحنا سلاطين المعارك على الخيل
حرب الصريف اللـي سماهـا منايـا=تشهـد لِنَـا حِـنَّـا جَنِيْـنَـا المحاصـيـل

الصاحب اللي يَحَسْب إني على خِبْره=قولوا له إني قِطَعْت الوصل يانَاسه
لايَسْأل الناس يَسْأَلْهُم عن الدبره=الله يعَزِّي سْنِينِه في بِقَاء راسه
صَبْرِي عَلَيْ يِشْتِكِي صَبْرِي على صبره=ياطول الايام يَاقِصْرَه على باسه
الشوق لوهو كبير وكَبَّرَه كُبْرَه=يَصْغَر بْعِين الفْرَاق بْقَسْوَة حْسَاسِه
ياصوت حَزْنِك تُوَاسَت بَحَّة النَّبْرَه=وانا أقِيْم انْتِصَارِي رِبْح بِفْلاَسَه
ماهو تِشِمِّت ولكن بَذْكِرْ العِبْره=من شِفَّة اللي بْظِلْم الصَّمْت حَسَّاسه
يارحْمَة البَنْج عَدْلِك خَزَّة الإبْرِه=على مواجع طفل يَشْكِي من انفاسه.!

بيني وبين الشوق ياشوق غربال=وبيني وبين الليل قصه حزينه
موجود لكنِّي مع الحزن رحَّال=يَرْحَل بي الهاجس عذاب وْغَبِينه
ياويل قلبي كل ماشفت الاطلال=ياويل ويله من مْعَانَق حنينه
على الذي قَفَّى وانا ضايق البال=مَرَّت ثمان سْنِين ماشفت عينه
مشتاق له ياوقت بس البَخَت مال=إسمع خفوقي يشتكي من أنينه
إن جيت أبسأل عنه جَرِّيت مَوَّال=أخآف تَسْمَعْنِي الوجيه اللعينه
(أشكي عليك الحال ياعالم الحال)=تَلْطِف بْحَالِي عن بقآيآ سْنِينِه

ياصاحبي لِحْيِتَك طِيْبَه من الشارب=كنت احْسِب إنك صديق وصافي النِيّه
الحَسْد في مِحْزِمَك مَكْرُوب يالكارب=ووْجِيه الأجواد من هَقْوَتْك مَعْنِيّه
والحين لولا البحر ما نَمْلِك القارب=نَدْرِس تضاريسنا بَافْكَار دِيْنِيّه
محمد أمرنا نْسَدِّد قبل مانْقَارب=وحنا نَعَكْس الامور بْخُبْث حِنِيّه
الحق لاأسرع..الُو.. مضْرُوب أو ضارب=لوكانت السالْفَه صفراء وبُنِيَّه
منهو سِبَقْ هو لِبَقْ يالراقي الخارب=تحت الدواهي سواهي ناس مَبْنِيَّه
غاباة شرق آسياء تحتاج لِمْحَارب=حتى تكون الحواجز شِبْه أمْنِيَّه

زوبع،وعبده،والاسلم...يْلَبُّون النِدَاء=مثل مَالَبَّوا هل البيت للبيت الحرام
طِيْبِنَا مايِنْتِهِي.. كِلْ مَاكَثْرَت بِدَاء=مِعْتِلين الطِيْب بالفعل ماهو بالكلام
والله إن العِزْ بَامْجَادِنَا صَاحْ وحَدَاء=مَجْدِنا تَشْرِق به الشمس عن جور الظلام
والله إن الصيت يَآصَلْ بِنَا أبْعَد مِدَاء=ونْتَعَدَّا هَقْوَة الصيت من فوق الغمام
المعارك عَلِّمَتْنَا على فَرْ العِداء=يوم هي بالرمح والدرع والحَسْم الحُسَام
الردَى ماهو لِنَا الله خَلَقْنَا بْلاَ ردَاء=نِحْمِده جَلَّ جلاله على جِلْ التمام
فوق هَآمْ السّحْب إسْم الطنايا يقْتَداء=والدليل الوقت يَخْضَع لْشَمَّر بِاحْتِرَام

نَطِّيت رِجْمٍ وَدَّعُوه العَشَاشِيق=يَامَا من الضِّيقَه نِصُوه وْرِقُوا بِه
وانا بَعَدْ يوم أَرْقِبِه نآشِفْ الرِّيق=كِنْ السَّرَاب اللي نِصِيتِه عْقُوبِه
ضَآيِقْ ومن ضِيقِي لَحَقْنِي من الضِّيق=أشْيَاء عن وَجْه الزِّمَان مْحَجُوبِه
مَادْرِي رِدَاةْ الحَظْ والاَّ التِوَافِيق=جِيْب الأمَلْ مَاعَآدْ يَرْجِيه ثُوبِه
أَسْرِي وَاعِيقْ إخْطَاي مِنْ بَعْد مَاعِيق=أجْمَل أصُول الوَصْل في نَبْض تُوبِه
أَحِبْ لَكِنِّي بَعَدْ شَخْص مَااطِيق=إفْرَاق مِنْ تَآهَتْ رِجَآوِي دْرُوبِه
خَلاَص يَارُوس الطْوَال الشَّوَاهِيق=يَكْفِيك مِنْ هَبْ النِّسَايِم عْذُوبِه

لاتَسْألين الناس عنِّي وانا حي=إن مت قولي وش حصل في حياته
خَلِّي هواجيس الغلاء تاخْذِك فَي=وتْعِيش بِدْمُوعك حزن من صفاته
في دنيتي ماشفت انا باالسماء ضي=غيرك عَكَسْ نور القمر ياغناته
ياللي عيونك من صفاها بها مي=والرمش طآيح وان وِقَفْ هو عباته
وان سَلْهَمَت طير السماء صَآبه الغي=حوَّل عليها ومَرَّها من حلاته
والخشم سيفٍ جَهَّزِه خآلْقِه لي=آموت به طعنة أمل من غلاته
والفم يدعيني وهو مانطق شي=لولو وَرَى ياحمود ضِحْكَت شفاته
الشِفَّه اللي فوووق فيها اللحم ني=مالامْسَه روج القلم من نباته
والشِفَّه اللي تَحْت جَرْحَه بِقَى بي=مآلت وعَضَّتْهَا قديم امْنِيَآته

الطيب لِه مركَى ومجلِس ومنزال=يعني نقول الطيب كلّه بْجِبِّه
قول وفِعِل يشهد لِه الوقت لامآل=الوقت لامِن مآل دَنَّق وحَبَّه
جبَّه مُحيط أبطال وتْحِيط بَاشْبآل=هَآمَة شموخ المرْجلَه ماتِكِبَّه
نَعَم هَلَه أهل المكارِم والافْعَال=رْمَالات لاضآق الهَبُوب بْمَهَبَّه
إذا النفود إسْتَوحَشَت قآلت رْمَآل=لَنْ الرمآلي مِحْزِمَه تِكْتِرِبْ بَه
كِنْ السِّطَر سَآقُوه فِنْجَآل فِنْجَآل=هذا دواء داء الهقآوي وطِبَّه
بْيُوتْهَم للعِز والجُود مِدْهَآل=ودْلاَلهم كَفْ النِداوي تِصِبَّه