قولوا لها وإن كان في راسها ارجوع = ما عدت أنا في حاجت ارجوعها
الـحـال طـيـب صـار لـي مـدة اسبـوع =صـفـيـت كـل الحـزن باسـبـوعها
قـولـوا لـهـا مـليـت مـن كثـرة الـلـوع = والـنـفس طابـت من كـثر لوعها
وأن كـان مـن فـرقـاي خلـيتـها تجوع = قـولوا لهـا تبـطـي عـلى جوعها
وإن كــان ذاك الـخــد شـقــنـه ادمـوع = مـالــي ومــال الـخـد وادمـوعـها
وإن جاتـكـم وتـقـول أنـا حـالتـي روع = قـولـوا لهـا فـرقـاي هــو روعها
فرحـت بـالفـرقى وابـضويـلي شـمـوع = وأطـفيت نـار الحزن واشمـوعها
صـحيـح مـن قـال الـعـذارء بهـن نـوع = ويـاشيـن نـوع الحـب من نوعها
بعـض العـرب ما تـفهمـه كلـه اطـبـوع = وأنا عجزت أميز كثرت اطبوعها
وإن كـان بـاقـي عـنـدهـا نـيـة ارجوع = عنـدي طلـب مشـروط بـرجـوعها
قولوا لهـا رجوعي مثـل حبـت الـكـوع = إن كـان تـبـغـانـي تـقـبـل كـوعها

ملعون من سب النبي وألف ملعون. = ملعون بالدنيا ويوم القيامه.
نبينا عن قولهم صدق مصيون = مصيون عن قول الردا والرخامه.
نبينا خير البشر ما بها اضنون. = وأخير من صلى وتمم صيامه.
من صغر سنه صار بالوصف مأمون. = والصدق وصفه من طفولة عظامه.
لين إصطفاه الله مابين إنس وجنون. = واعطاه دعوة جالية للغمامه.
ماهمنا لو الدنمرك يحكون. = نبينا يكرم عن أهل القمامه.
نبينا مصيون ياللي تهزون. = دين الفخر دينه ودين الكرامه.
وحنا نحبه حب صادق ومضمون. = ونمشي على نهجه ونسمع كلامه.
أربع ميه وألفن وتسعه وعشرون. = والكل منا يقتدي في إمامه.
إمامنا خير البشر ياهل الدون. = بدر ٍ ظهر بالكون وأنور ظلامه.
رفعت صوتي ياهل العرف تكفون. = ردوا قدر نبينا وإحترامه.
من جبنهم لاعاد لاعاد تشرون. = خلو بقرهم يشتهر بإنعدامه.
لين الدنمرك بخسارته يبكون. = ويعض ريسهم بكف الندامه.
ونعيش في عزه عليها يتمنون. = في ظل أبو متعب عظيم الزعامه.
وإختامها ترى الدنمرك ملعون = ملعون بالدنيا ويوم القيامة.
وصلاة ربي عد من له يصلون. = وإعداد مارفرف جناح الحمامه.
على نبي نهجه اليوم مسنون. = شفيعنا يوم الحشر وإزدحامه

الـهــم والهــوجـاس وجـروح الأحـبـاب=مـافـارقـت مـابـيـن قـلـبـي وبــيـنـي.
إلـيـا مـتى والـعـيـن تـحـبـس بالأهـداب=ادمـوع حـزنـ(ن) جرحت جفن عـيـنـي.
كـابـرت بـدمـوعي يـالـيمـا الجـسـد ذاب=مـاكـنـت أبـا الدمعـه تبـيـح كنـيـنـي.
جـامـلـت بالـظـحـكـه وبحـسـاس كـذاب=مـن شـان عـذال ٍ يـبـونـي حـزيـنـي.
وحـاولـت أسـلـي خـاطـر(ن) مابـعد طـاب=مـن زيـف دنـيـا ً كـذبـها محتوينـي.
حـاربـت حـزنـي بالـقـنـابـل والإرهـاب=تـفـجيـر ظـحـكـ(ن) يكرهه عـاذلـيـنـي.
وجـمعت جيش الحب من كل الأقـطـاب=وخـوفــت نـاســ(ن) بـالهنـا ماتـبـيـنـي.
وأعلنت ظحكت سن وأظهرت أنا الناب=والله ولا يـفرح عـذولـ(ن) لـعـيـنـي.
كـلـه سـبـايـب واحـد ٍ راح ثــم غــاب=مـأقـدر أجـيـه وحـالـف ٍ مـا يـجـيـنـي.
جرعـت نفسي الـمـر ثورت الأعصـاب=مـن شـان واحـد رايــح ٍ مـا يــبـيــنـي.
أهـديـته إحسـاسي وقـلبـي والإعـجـاب=نـسـيـت كـل الخـلـق زيـن ٍ وشـيـنـي.
بالحـب أنـا يـانـاس سـويـت الأسـبـاب=كـفـكـف يـديــنـه يــوم مـدت يـديـنـي.
واليـوم أنـا عـودتـهـا لفـتـل الأشـنـاب=حـلفـت أنـا لأنـسـاه لو مـا نـسـيـنـي.
وكـان العـواذل شـافـو الحزن بـكـتـاب=صفـقـت أنا اليسرى براحـت يـمـيـنـي

قالو لي شاعر قلت كلا وكلا = أحاول أكتب بيت في بعض الاحيان
ومازاد شعري لين خلي تغلا = وسخرت له من داخل القلب قيفان
بيح ظمير ٍ صادق ٍ ما تسلا = يبغاه دون فلان وفلان وفلان
راح وتركني بين علا وعلا = مايدري إن القلب للقلب شفقان
وقد قيل قبلي من تغلا تخلا = وأنا جهلت القول من قلب ولهان
حالي عقب فرقاه كنك تحلا = حال المريض اللي من السقم تعبان
مل الحياة وعيشت الناس ملا = ومل الحكي والناس قاصي ودنيان
وإن شافني عاذل تبسم وهلا = وقال الوفي باقي وصاحبه خوان
وقلت الوفي باقي ولو قلت قلا = وأنا وفي ما جازي الصد نسيان
وباقي على عهدي ولو مت غِلا = ياللي تلد الناس في كلمة لسان
وهذا كلامي بعد شعري تجلا = مجنون وجنوني ورى ذيك الاعيان
ولوجيت أبنسا ذكره العقل زلا = ياكيف أبنسا من له القلب مليان
مليان حب وشوق والشعر دلا = شفني ذكرته بين قافي والأوزان

البارحه دارت علي الهواجيس=وعجزت أرتب فكرتي وأختصرها
سلمتها حبر القلم والقراطيس=والهاجس اللي جاب عندي خبرها
عامين مالي في حياة النواميس=ودعتها توديع غيم لمطرها
يوم إنهمل من دون وزن ومقاييس=ماهو براجع للغيوم وقمرها
وأنا حياتي كل أبوها كوابيس=أردد الفرحة على من قبرها
كني سجين ٍ ذاق حر المقابيس= يبغا الطلوع ومدته ما خبرها
مسجون وحراسه رجال ٍ دنافيس=تدبل له الكيله على من أمرها
عزي لحاله من حياة المفاليس=لاصار حاله مثل حالي خطرها
بأسباب من داره بعيد التظاريس=قفا وعرا دمعتي ماسترها
مايدري إن الناس بعده معابيس=والعين من بعده قصير ٍ نظرها
ومايدري إني عايش ٍ بالوساويس=أجامل أيامي واحسب شهرها
وإن كان يبغا نبذة ٍ بالقواميس=عني وعن حال ٍ صدوده دمرها
حربي وساكن في ديار السناعيس=دار الكرم والجود محد ٍ نكرها
أخذت من شمر علوم النواميس=وأخذت من حرب العريقه فخرها
شمر هل الطولات من عهد بلقيس=وحرب ٍ هل الوقفات محد ٍ قهرها
جمعت بالثنتين رؤس القرانيس=وملكت بر من الفخر مع بحرها

يامنيتي يازهوة البيض مأزهاك=ياللي عليك الزين نادر وغالي
شتتني في موقعك بين الأفلاك=ولا شفت نورك قلت ياهملالي
ماشفت زولك بين ذولا وذولاك=ولا شفت مثلك في زمان ٍ مضالي
مع رحلة الدنيا أنا أصير وياك=ويشهد على ذلك قدوم الليالي
برحل مع أحلامك وبعيش ذكراك=واطوي زمان ٍ فيه مر ٍ وحالي
مع بسمتك بسلى وأسولف بطرياك=ومع دمعتك بسكت ووبكي لحالي
لاتحسبن القلب في يوم ينساك=ولاتحسبني أنساك يارأس مالي
كل الذي عندي بسخره لرضاك=حب ٍ وشعر ٍ والعمر لك حلالي
أحلا كلام الحب يكتب بحسناك=وأكتب كلام الحب لك من خيالي
وش عاد لو شفتك وأنا أريد لقياك=كان الحكي ياقف وأضيع مقالي
يامنيتي بالقلب يازين مبناك=طوبه ورى طوبه بها القصر عالي
تفداك شمس وجنبها أريام تفداك=ومعهن بعد نجوى وزينب ودالي

اللي يبي مني رسايل معاذير = ماهو بلاقي عذر لا ينتظرني
لي الفخر لو قلت قفو على خير = مادام لي عزه تجي وتغمرني
قدري كبير ٍ لاتحسبنه صغير = ولاتحسبن مثلك يجي ويحقرني
ماغرني ياكود حلو التعابير = وأثرك على الهجران ناوي تهجرني
لكن أنا بقولك طير يا طير = ماحرك احساسي جفا من نكرني
عندي كرامه فوق كل التصاوير = لاتحسبن مثلك بصده قهرني
حر ٍ ولد حر ٍ سلالت مناعير = لانته ولاغيرك يجي ويأسرني
مثلك ترى تشريه صاف الدنانير = ومثلي ترى سيدك كذا تعتبرني

أنا أحمد الله ما أتحسف على شي=ما فات مات وكل شي ٍ بياتي
مادام رأسي عايش ٍ قلت أنا حي=ما فات يدفن والبقا في حياتي
مافات من عمري ترى خبرة ٍ لي=أنفع بها نفسي على المقبلاتي
خمسه وعشرين ٍ ترى ماهي شوي=ذي منوت اللي لابسات العباتي
ياهيه ياللي كاوين خاطري كي=لاتحسب إنك تستلذ بمماتي
لا أنته ولاغيرك ولا هذي و ذي=يقدر يزعزع موقفي مع ثباتي
مثلك ترى ياصاحبي ينطوي طي=صفحة كتاب ٍ وإنطوت في سكاتي
واللي بدا في صفحتي نورها ظي=صفحة جديدة تستحق إمنياتي
قلبي لها وأشوف قلب ٍ لها بي=ويا عل يفدا قلبها الفــاتـنـاتي
ياوي يابعض التواصيف ياوي=زول ٍ لها ماغاب لو في صلاتي
ماهي من اللي صابهن كبر ٍ وغي=وصف ٍ لها ماهو بباق البناتي
بين البنات المترفه مطلبي هي=تعوضني عن باقي الجادلاتي

ياجوهر إحساس الغلا وروح مغليك=ياقرة عيوني وغاية مرادي.
لو لا الغلا ماجاك شعري يغنيك= ولاجاك حبي صافين من ودادي.
بهديك عمري ياعسا العمر يكفيك=وإن ماكفاك العمر دونك فؤادي.
وش حاجتي بالعمر دونك وأنا أبيك=ياغاية المطلوب وأغلا العبادي.
كل الذي عندي بسخره وأرضيك=وأجيك لو دونك دروب بعادي.
لاتحسب إن القلب ينسا لياليك= وينسا عيونك ياغزال البوادي.
لك مبسم بين البرايا محليك=يسحر عيون الناس هذا وكادي.
وإلا الشعر زاهي عسا الله يحميك=من عين حاسد جعلها للرمادي.
جيبك غلا وإخلاص روحي تناديك=عطني غلا وإخلاص مثل المنادي.
يمكن مع الأيام تسلى وأسليك=ونعيش وقت الحب صافي وهادي.
وأكتب لك أحلا الشعر دايم وأغنيك=وأهديك أنا من الورد فل ٍ وكادي

الشعر بحر وجيت للبحر غراف = وماني محمد كان ماجبت صافي
من دنيتي ما طاف ياصاحبي طاف = نذر ٍلا أجيب الجزل من نظم قافي
ماضرني من قال من شعرنا عاف = والله لا ورده الدروب العجافي
ماجيت أبكتب لأجل زينات الأوصاف = جيتك وجيش الشعر يمشي خلافي
شاعر وأعرف الشعر سيف ٍ وسياف = وأنا مسكت السيف بأول مطافي
قطعت رأس اللي كسر داخل القاف = وبارزت من وزنه نزيه ٍ وشافي
كسبت ناس ٍ عرفها فوق الأكتاف = أفخر بها مفخار وافي لوافي
مقدام شعري ما عرفت الأنكاف = امواصل المشوار ما قلت كافي
والشعر شعري ما خذيته بالأسلاف = إزهم جزيل الشعر ويجيك لافي
احسب جزيل الشعر في كل ميقاف = ما جيب شعر ٍ بالمواقيف هافي
واحسب حساب اللي لهم نور منشاف = ربعي هل الطولات نور ٍ يشافي
أفخر بهم واثق ولاني بخواف = ما دام ربعي عزها دوم ضافي
ولا أحتاج في ربعي سواليف عَراف = نور ظهر للكون ما هو بخافي
وبعد القصيدة ماعلى قلبي خلاف = ولاني بمن يمشي على الشوك حافي

كلن على ماقيل عاشق ومعشوق.=وأنا أحمد الله بالعشق مابلاني.
قلبي وهو قلبي ترى وسط صندوق.=محدن وصل قلبي ولأحدن لفاني.
وياسامع ٍ هرجي ترى الهرج مسروق.=ما لصحيح بوسط هرجي مكاني.
لا والله إلا عاشق ٍ ظامه الشوق.=والقلب ماقد قر وسط المحاني.
يكفخ بلا جنحان مارده سبوق.=حر ٍ بوسط الجوف شرق ويماني.
كله سبايب واحد ٍ كامل الذوق.=أكبر عيوبه لطف قلب وحناني.
صدفه أنا وياه في داخل السوق.=نفس المكان إن قلت نفس الزماني.
عصرية الجمعة بها الوقت موثوق.=في تاسع أيام الشهر برمضاني.
شاهدتها مابين خالق ومخلوق.=يالله يارحمان منها تحماني.
بعيونها سحر ٍ على رمش من فوق.=ترمش وكن السحر منها يغشاني.
ونظراتها زادت على الطاق مطقوق.=وراح العقل مني بلحظة ثواني.
وأقفت تخطأ مشيها حيل برفوق.=سبحان من صور وصوف الكاني.
لحظة ونظرات العشق جالهن بوق.=أبوق نظراتي وهي ماتعصاني.
ناظرت نظرت عاشق ٍ حيل مطفوق.=وصديت عن بعض الحكي في لساني.
وآآقلبي اللي راح مني بلاعروق.=راح وتركني قبل وقت الأذاني.
وأفطرت من صومي بلا حق وحقوق.=من سبت اللي صابني وإبتلاني.
ويالله يامرسل مخاييل وبروق.=تسمحلي إفطاري وأنا أصوم ثاني

قلبي مدينة مابها ايّ مخلوق = مستوطنه للهم واقسا شقايه
مبطي وأنا محتاج بالعشق معشوق = أعزف على لقياه لحن البدايه
واهديه روح ٍ كلها حب مع شوق = إن قال يفنا قلت ماله نهايه
واسلمه عرش الغلا دون مغلوق = عرشي حلاله دام عنده منايه
وازرع له احساس الوفا غصن وعروق = واسقيه من دمي وابرهن وفايه
وأغلق على قلبي معه وسط صندوق = وأعيش أنا وياه قصة هوايه
وأشري له أغلا الورد من داخل السوق = وأقول كلك صرت للورد غايه
قلبي مع الأحلام ياناس مسروق = عايش بحلم الحب ياناس تايه
العين من حلمي بها رعد وبروق = غيمة حزن غطة بجوي سمايه
لكن على الله كل مطرود ملحوق = قادر يجيب اللي ينور مسايه

يالله يالوالي حسين التدابير = ياخالق أرواح ٍ ومحصي عددها
يالواحد الظاهر والأول والأخير = ياعالم أمطار السحاب وبردها
ياعالم اللي صار وعالم وش يصير = ياللي جميع أفعال خلقه رصدها
يالله ثبت عقلي اليوم لا يطير = وخفف على نفسي مصاب ٍ هجدها
كل المصايب غير ومصيبتي غير = مصيبتي حطت بجوفي لهدها
أختي وصادتها صدوف المقادير = قبل المغيب شوي جاها وعدها
في رابع أيام الشهر دون تأخير = بشهر رمضان العين جاها نكدها
ماتت وكل الناس تدعي لها خير = ماتت ومن هو مثل قلبي فقدها
ماتت بلا جنحان ياكيف بطير = ماتت وهي تحلم بضمت ولدها
صلو عليها بين حزن وتكادير = ودعو لها يالله طهر جسدها
ودخلتها بالقبر والقبر تذكير = للي حياته ما تسر إن حصدها
ودعيت أنا يالله يا رازق الطير = يا خالق الجنه وزايد رغدها
يالله زين قبرها بالنواوير = ووسع لها المدخال وأنور لحدها
ويالله طهرها من الذنب تطهير = ويالله خفف حزننا من بعدها

مقدر على التوديع يانور عيني=عندي ترى فرقا المحبين شينه
غمضت عيني لا تلدين فيني=دمعه بوسط العين حارت حزينه
ودي بكم مير أزعجتني سنيني=والله يعين اللي شقا في سنينه
قلبي على الفرقا بنبضه حزيني=كنه يقول العذر لو تعذرينه
والرِجل حارت ما مشت خطوتيني=أسوقها بالغصب سوق السجينه
لو تسّتمع لا قفيت صفقت يديني=كني شجاع ٍ باللقاء غالبينه
أو تسّتمع للي صدر من ونيني=في داخل ظلوع المعنا ونينه
ونت سجين ٍ ضاع عمره سجيني=حتى من الزوار هم حارمينه
ذي حالتي عسا الولي بي يعيني=واللي يفارق جعل ربي يعينه
لاتحسب الفرقا قسا ثم تليني=لا والله الفرقا قسا عارفينه
ياشين فرقا من نبيه ويبيني=ياشينها لا صار قلبي رهينه
كتبت حزني بين نفسي وبيني=وغنيتها بمفارق أطلق مدينه
تدرون من هي ماخفت للفطيني=حائل بها عشق ٍ صفا شاربينه
يدري بها شام العرب واليميني=ويدري بها التاريخ ومترخينه
فيها الكرم والجود ماله وزيني=والظيف له حشمه ولا أحد ٍ يهينه
من عهد حاتم لين تفنا السنيني=تاج الكرم بين العرب مالكينه
ودعتها والشوق يزداد فيني=والصدر يحرجني بكثرة حنينه
ودي بها مير القدر مايزيني=ودي بها وأثر الليالي فطينه
ماتترك الولهان لحظه وحيني=دستورها فرقا المحبين زينه
وحائل ياحظ اللي بها ساكنيني=حائل وأكررها هي أطلق مدينه