|
هل تقبلين بزوج راتبه 1500 ريال ...للنقاش ؟؟
السلام عليكم ورحمة الله وبركاته
بسم الله الرحمن الرحيم اللهم صل على محمد وعلى آله وصحبه أجمعين هل تقبلين بزوج راتبه 1500 ريال "" للنقاش من قبل الشباب والفتيات " كلنا يعرف الظروف التي نمر بها .. في الوقت الحالي من عطاله وبطاله ويا سعد منهو وجد له وظيفة ... وطبعاً أغلب الوظائف " الجديده " إن لم تكن كلها .. براتب لا يتجاوز الـ 1500 ريال سعودي .. وإن زاد وصل 2500 ريال فهل هذا المبلغ قادر على ...... أن يزوج الشاب ..... ويتتم به نصف دينه ..... ويفتح بيت ...... ويكون اسرة وابناء ؟؟ وهل تقبلين بزوج يمتلك هذا الراتب ؟؟؟؟؟ ملاحظة :- جداً مهمه .. نريد إجابات واقعيه ويقبل بها العقل .... مجهولة القصه |
حياك الله اختي هيام ،،
موضوعك رااائع اختي بالنسبه لي المال لا يستطيع تقدير السعاده فحيث ما كانت السعاده والتفاهم كانت الحياه عمر المال ما يقدر الحياه ممكن اعيش مع شخص يقدر رابته بـ 1500 حياه في منتهى السعاده واعيش مع شخص يقدر راتبه بـ 25000 حياه في منتهى العذاب الحياه تفاهم عزيزتي هذا رأيي وبالتوفيق للجميع |
هلا بك أختي هيام الجنوب من يقول من الشباب أستطيع الزواج براتب 1500 أو حتى 3000 يغالط نفسه إلا إن كان سوف يعتمد على والده بأمر السكن وبعض المصاريف الإضافية أعرف شخص موظف براتب 2500 بأحد الشركات ومتزوج وساكن مع أهله له شقة مستقلة ومع ذالك لا يستطيع تلبية بعض الأساسيات وراه مصروف زوجة وطفل وسيارة غير الإلتزامات الأخرى مثل هؤلاء الأشخاص كيف بيقدرون يأسسون أنفسهم ويمتلكون على الأقل شقة إيجار ليعيش مع زوجته في مكان مستقل كيف راح يكون وضعه مع الغلاء المعيشيء اللي كل يوم بزيادة بسبب جشع وطمع التجار اللي يأخذون ولا يبذلون همهم الأكبر مصالحهم الشخصية على حساب الوطن والمواطن إذا أستمر الوضع على هذه الحالة سوف تنتشر الجريمة والعنوسة بشكل فضيع ومريب أعجبتني أحد الحلقات ببرنامج 99 للمذيع المتألق صلاح الغيداني تكلم فيها عن البطالة واستضاف شخصيات لها دور فعال في علاج مشكلة البطالة لاكن لاحياة لمن تنادي كل الشكر اختي هيام الجنوب |
تعقيباً على كلام الأخت شادن لسنا في مجال للكلام عن السعادة مع أن المال من مقومات السعادة يقول أبن القيم في تفسير قوله تعالى (( المال والبنون زينة الحياة الدنيا )) يقول ابن القيم بما معناه إذ توفر المال قبل الأولاد فإن هذا من رغد العيش اللذي يجلب السعادة أما في حالة قلة الحيلة فإنها تعتبر من منغضات الحياة لإنشغال فكر الأب الدائم بتوفير المال لسد حاجة أطفاله وزوجته لذلك قدم الله سبحانه وتعالى المال على البنون في الآية (( طبعاً لا أتذكر ما قاله أبن القيم بالتفصيل لأني قرئته من زمن بعيد )) لكن من أراد الإستزادة فعليه بقراءة كتب العالم الجليل أبن القيم كلام الأخت شادن أحدى مغالطات الواقع فهي تفكر بعواطفها قبل قلبها يجب تحكيم العقل على القلب نحن في زمن الحياة فيه أصبحت صعبة جداً بـــ 1500 ريال أيش راح يقدر يسوي الزوج هل بيصرف على سيارته ولا على السكن ولا على الأمور المفاجئة والطارئة |
حياك الله اخوي شاعر ،،
هذي وجهة نظري عمر المال ما يقدر السعاده والحياه تضحيه اخوي ممكن اضحي بالرغد والمال واللبس بس اعيش مع شخص يفهمني وافهمه لو عشت في قصر ولبست من اغلى شي وانا اعيش بعذاب وش راح يقدم لي المال؟؟؟؟ شكرا لتعقيبك على كلامي |
اوافق الاخت شادن كلام واقعي جدا وعقل ماشاء الله عليك
|
ماننكر أن الدين والأخلاق أهم شيء .. صحيح الفلوس مو كل شي الاهم الرجال ودينه وخلقة وحبة واخلاصة لزوجتة لكن لما نجي نشوف متطلبات الحياة 1500ريال وش بتسوي فيكِ هي لأجار البيت أو لأغراض البيت أو لفواتير الجوالات أو لأغراضكم الخاصه ولا اغراض العيال....! لوتحملت سنه ماراح أتحمل السنوات الباقيه وألحين 1500يالله تكفيك تروحين فيه للســوق ...؟! بصراحه صعبه مره فيه ناس رواتبهم على ثمانيه وتسعه الاف ماتكفيهم مع تغير المعيشة .. مو تفهمون من كلامي انها نظره ماديه بحته ولكن هذا الواقع وشكرا على هذا الموضوع .. |
بصراحه اعرف واحد راتبه 1500 ومتزوج وعايش احلى عيشه
السبب هو انه مايضيع فلوسه على الفاضي هو وزوجته مقسمين راتبهم بحيث انه مكفيهم ومعيشهم اكيد ان اهله ساعدوه في البدايه بانهم علموه كيف يامن البيت بالاول وبعده يجمع تكاليف الزواج وبعدين الوحده اذا مارضت كيف الشباب بيتزوجون صراحه فيه رجال رواتبهم قليله لكن انهم رجال بمعنى الكلمه صح المال ضروري لكن فيه شي اسمه حسن تصرف يعني كل شي بالمعقول وكلن يمد رجوله ع قد لحافه يعني اي وحده بتتزوج واحد راتبه قليل تكون عارفه انه لازم تقدر حالته وتوقف معه وماتزيده عليه وصدقيني بيعيشون احلى عيشه وانا شفت اكثر من حاله واسفه ع الاطاله |
أيــــــــــــــــــه اقبل لــــــــــــــــيه لا ...ان يكونو فقراء يغنيهم اللـــــــــــــــــــــــــه..
والمال مو كل شي بالحياة.. اذا الحياة فيها حب وسعاده .. والله راح اقبل.. وش ضيع شبابنا اليــــــــــــــوم..الا عدم قبولهم ..ياناس كثرة الفتن..ضيعت الشباب وارتكاب المحرمات .. وهذا رايي بكل صراحه ..دام ان 1500 راح تاكلنا.. وتقضي حوائجنا الحمدلله هذا والله اعلم.. هيام الجنوب يعطيك العافيه على طرحك للموضوع... بنتظار جديدك.. لك مني كل الود.. |
كنت آقرآ الردود وبصراحة فيها من الصحة وايضآ من البعد عن الواقع عني انا لو بفكر بقلبي راح آرضى آتزوجه لكن هذه عشرة عمر لازم فيها تفكير يعني بالوقت الحالي 1500 ريال ايش بتكفي بالحياة الزوجية وهمآ شخصين فقط كيف لوكان فيه اطفال من الصعب بصراحة ضمان الحياة وان الزوج يقدر يتكفل بكامل احتياجات زوجته واطفاله لو وجد اطفال وماننسى بالوقت الحالي بنات هالوقت مستحيل ونادر جدآ ترضى بهالشيء اذا هي ببيت ابوها طلباتها كثيرة وعلى قولة محبة الجنة 1500 بالعافية تكفيها روحة للسوق مع انها غلط كيف الزواج والحياة بوقت غلاء المعيشة وفيه ناس رواتبها تتعدى العشرة آلآلآف ومع كذآ تزوج بالدين وماهو ملحق مصاريف وطلبات للبيت وبنص الشهر الراتب كله يطير ويروح تسديد ديون وآقساط بنك وفواتير .. عني آنا مابرضى لاني راح آظلم نفسي وآظلم زوجي معاي وآطفالي .. |
الاغلبية يقولون مايهمن الراتب ولما تصير الحقيقه تحصل اكبر المشاكل بسبب المادة
لازم الانسان قبل مايقرر با الارتباط يفكر با المستقبل قدام شوي الحياة الزوجيه مو بس انت وهي راح تكونون اسره اطفال لكل طفل احتياجه ... اغلب الطلاقات اللي تصير بسبب المادة ويقع ضحيتها الاطفال ... وفيه نقطة انا ملاحظتها كثير با با الوقت الحالي وخصوصا قلة الرواتب ... الحين نلقى الرجل بعد مايتزوج هو ببيته مع اهله وهي ببيتها مع اهلها مايلتقون الا بوقت المناسبات ؟؟ طيب هذولا مافكرو لو ينجبون اطفال وش مصيرهم وهم حالتهم كذا !!! |
يمكن حضوري بيكون لهذا الموضوع متكرر،، انا مع اللي يقولون بغلا المعيشه والمصاريف وشغلات السوق ومن هالكلام لكن لو تزوجت واحد يحقق لي كل هذي الامور وما فيه تفاهم وسيئ في التعامل هل تستمر الحياه ؟ فيه فرق بينه وبين لو تزوجت واحد يفهم افكاري وطيب التعامل معي ويحترمني بوجهة نظري ومن قراري الشخصي اتنازل عن كل هذه المصاريف والاسواق واكون قنوعه بالشي اللي يكون قوت يوم لي وله لان حكمتي دائما : اذ كنت بمالديك قانع ... انت ومالك الدنيا سواء أهم شي القناعه :) يسعد ربي الجميع ،، |
في الحياه الزوجيه عوامل عديده للنجاحها وكل عامل مكمل للثاني
واذا كنتي تسئلين هل 1500كافيه لبناء حياه زوجيه سعيده اقولج بتكون كافيه اذا كان فيه رضى وقناعه بالواقع وحاول كل فرد اقناع نفسه ان المال مو سر السعاده وان كان قصدج هل 1500 كافيه للمتطلابات الحياه الزوجيه اكيد لا والف لا وخصوص في وقتنا الحالي وغلا المعيشه اللي زاد عن حده ويعطيج العافيه وتقبلي مروري .......... |
أحس الواقع مفقود عند البنات ماعدا اختي انوار
كلام البنات نقبل وليش لا ولما يتم الزواج تنصدم بالواقع أظن صاحبة الموضوع وضعت ملاحظة انه نتكلم بواقعية 1500 من غير مصدر دخل ثاني المشاكل وبعدها الطلاق:h27: شكرا عالموضوع اختي هيام |
اقتباس:
حياك الله اخوي بالعكس الواقع مو مفقود عندي وليه انصدم بالواقع وانا من الاساس عارفه بمقدار دخله الشهري انصدم لو كنت مو عارفه بمقدار مرتبه او كنت اقول بعد الزواج بيجيه دخل ثاني وانصدم اني اقف عاجزه لكن اذا كانت اللبنه الاولى مبنيه على هذا المبلغ المحدد راح تستمر السفينه في الابحار بكل امان :) اخوي قريت مره هذا الخبر: طرحت إحدى الصحف البريطانية سؤالا مفاده : ما المال ؟ فكانت الإجابة الفائزة : المال جواز سفر عالمي يمكن لحامله السفر إلى أي مكان ماعدا السماء وهو يجلب أي شي ماعدا السعادة ... كثير نسمع بمشاكل اللي تصير في بعض الاسر تقول الزوجه ما يهتم فيني كزوجه واذا ناقشته يقول ما قصرت معك بشي موفر لك متطلبات الحياه من بيت وسواق وخدامه وغيرها أو الزوج يقول ما تهتم فيني كزوج رغم اني ما اقصر معاها بشي اوديها سوق واشتري لها لبس بالمبلغ الفلاني وتحضر حفلات و.. و.. لكن وين التفاهم هل المال حقق لهم السعاده؟؟؟؟ بالطبع لا سعدت بحضورك واتمنى ما تضايقكم وجهة نظري :) يا تقنعوني يا اقنعكم :) :) |
| الساعة الآن 05:31 PM. |
Powered by vBulletin® Copyright ©2000 - 2024, Jelsoft Enterprises Ltd. TranZ By
Almuhajir
HêĽм √ 3.2 OPS BY: ! ωαнαм ! © 2010