سالفة - ياشاري خـن بـط
السلام عليكم ورحمة الله وبركاته
اسعد الله اوقاتكم بالخيرات الخبط هو ورق السمر او الطلح وسمي بالخبط لانه ياتي الشخص ويخبط شجرة السمر او شجرة الطلح بعصا غليض فيقع الورق بالارض فيتم جمعه ويسمى بالخبط وكان الخبط يستخدم بعد رشه بالماء واضافة قليل من التمر اليه علف للبعارين ( السواني ) لانه يسمّن السانيه بعد الهزل الذي يلحق بها من كثر السني في مده وجيزه فضلا على انه علف لجميع المواشي لذلك كان مهم للفلاحين الذين يسنون لاستخراج الماء من الابار 0 بعد هذه المقدمه ندخل بالسالفه كان فيه شخص يتاجر بالخبط ويقوم بشراءه من اللي يخبطون ويقوم تاجرنا هذا بتخزينه حتى اذا جاء وقت الدهر يبيعه دبل وفيه سنة من السنين كان عنده خبط واجد ومخزنه له بصفه وكان وقتها دهر وعلى دخول الوسم وكان يسام منه بسعر غالي ومعيي يبيع يبي زود لانه دخله الطمع المهم دخل الوسم وخاف انه يجي مطر وربيع ولا احد ينشد عن الخبط اللي عنده وصادف واحد من اللي يسنون وقال له ما تبي خبط قام هالفلاح يناظر بالسماء وشاف بعض المزن وقال عقب ما شاف المزن لا هالحين ما ابي لكن يمكن عقب يومين امرك واشري منك ما مشى عليه هذا الكلام لانه يدري انه يتهكم فيه وقام يحرج على الخبط بوسط السوق لكن ما من مشتري الناس تحرى الخير من الكريم سبحانه بعد يوم او يومين صك السماء بالغيوم وقامت ترعد وتبرق ونزل المطر بغزاره واستمر نزول المطر رفيقنا هذا قام يناظر صفة الخبط والمطر يصب عليها لين ربصت وطاح السقف وبعض من الجدران على الخبط واختلط الخبط بالطين مع الماء وهو يناظره بحسره وعقب ما وقف المطر كن الرجال عقب اللي حدث صار لعقله شي لانه ما تحمّل اللي صار وقام يدور بالسوق ويصيح ياشاري خِنْ بِطْ 00 ياشاري خن بط وصارة مقوله دارجه ومشهوره هكالوقت وعلى ماسمعت انه سنة الهدم عام 1376 هـ انتهت السالفه وسامحونا على التقصير |
نهاية الطمع نسأل الله السلامة عنود دائما استمتع بقصصك الرائعه لك ارق تحيه |
اقتباس:
الآرووووع حضورك يابعد حيي |
قصه مليئه بالعبره والعظه زادكِ الله فضلاً و نعيماً |
اقتباس:
|
والله انه معلومه
لاحرمنا الله من حظورك وجمال الطرح يسعدك ربي دوم تقيري واحترامي |
اقتباس:
يامرحبا الف ياشاعرنا العزيز كل الشكر لحضورك |
الساعة الآن 11:44 PM. |
Powered by vBulletin® Copyright ©2000 - 2024, Jelsoft Enterprises Ltd. TranZ By
Almuhajir
HêĽм √ 3.2 OPS BY: ! ωαнαм ! © 2010