يالله تجيب الخير ياسايق الخير=ياسايق ٍ غر المزون المباكير
أنت الذي وحدك تثير السحايب=يافايق القدره عليك التدابير
ياعالم ٍ خبث النفوس ونقاها=يامنزل الفرقان بشرى وتحذير
عزيز.. جبارٍ.. حكيم ٍ ..مهيمن=رحمان له بالكون حكمه وتقدير
رحيم .. لكنه شديد ببطشه=غفور للي يلحق الذنب تكفير
يامضفي سترك على أهل الخطايا=بعفوك .. وجودك يامليك المقادير
يالله بنو ٍ يروي القاع صيب=غيثٍ مغيثٍ للديار المقافير
سح ٍ .. غدق .. ديموم ..ديم ٍ ونافع=عقب المحل يازين شوف التباشير
يالله يالرزّاق .. ياوافر العطا=لا تواخذ عبادك بذنب المعاثير
صاب المحل ودياننا والمفالي=ولا فيه غيرك يجبر الحال تجبير
يالله كما جاوبت لأصحاب موسى=وغفرت ذنب العبد من دون تشهير
بذنوبنا لا تحرم الخلق يارب=نستغرفك عن كل ذنب ٍ وتقصير
خلقك برجوى الغوث يامنزل الغوث=يرجون مدك بين سجده وتكبير
بهايمٍ رتّع وشيبان ركّع=وأطفال رضّع والعيون المساهير
دعوات من يخشون سطوة عذابك=ويرجون جناتك وشوف التباشير