بعد فتره من غيابك.. ليـه بالله اتصلتـي ؟؟

من ثلاث شهور شاللي رجّعك يعنـي وصـار

ما انتي عشتي كل هالفتره ولا حتـى سألتـي

وش حصل هالحين قولي ..علميني باختصـار

ليه دام انك رجعتي اليوم ليه اصـلاً رحلتـي؟

يعني الدعـوه بكيفـك .. او مزاجيـة صغـار

إلا يمكن صار لك حاجـه بعقلـك وانهبلتـي

وانقلب وضع العلاقـه مـن علـوّه.. لإنحـدار

ولاّ ما صدقتي اني اعشقـك .. حتـى ثقلتـي

أو كلام الليل فعـلاً .. معـك يمحيـه النهـار

يوم قررتي .. بليّا سابق انـذار .. اعتزلتـي

جاحدتني.. كن مالي دور فـي صنـع القـرار

وادري انك لا صملتي في قراراتك .. صملتي

ما تردك دمعتين .. وكسر خاطـر.. واعتـذار

إحتملت اللي لو انك في مكاني مـا احتملتـي

ووالله لولا اني عرفتك .. ما عرفـت الإنهيـار

إنكسار وضيق صدر ومشكله لامـن زعلتـي

وإن رضيتي فالمصيبه .. ضيق صدر وإنكسار

ضعت مدري ويش اسوّي فيك لكنك وصلتـي

مرحله خلتني انسـى .. كبريائـي .. والوقـار

صدقيني لو فعلتي في حياتـي .. مـا فعلتـي

ما بيدّي غير احبك .. واعشقك اكثر.. واغـار

يكذب اللي قال عندي مـا طلعتـي ولانزلتـي

واعتبارك في عيوني مـا يجاريـه .. اعتبـار

إنتي اصلاً من وطيتي في مساحاتي وحللتـي

صرت احس أني مساحه من بياض ومن خضار

مثل الاسطوره واظنك من خلال اسمي دخلتي

صفحة التاريخ لكن كنتـي .. اسطـورة دمـار

مجرمة حب وقتلتيني .. لو انـك مـا قتلتـي

يكفي اني قمت احس برغبتـي فـي الإنتحـار

كلما أذكر كلامك لي على الجـوال .. قلتـي:

كل واحد في طريقه .. لي مسار.. ولك مسـار

اذكر اني كنت ساكت وقتهـا .. حتـى قفلتـي

واختنقت .. وما دريت الا وانـا أفـك الـزرار

والقط انفاسي وانا اسأل: ليه ياروحي فشلتـي

كانت اول تجربه.. معقول اسـأت الإختيـار؟؟

إفترقنا .. واعتقد من بعد فرقـاي .. انشغلتـي

وافتكرتيني .. بعد مـا جـار وقتـك واستـدار

إتصلتي .. تسأليني: كيف حالك؟.. وانتشلتـي

جثتي من قبل اموت من القهـر .. والإنتظـار

إيه أنا في خير لكن ودي اعرف .. ويش نلتي؟

من سواتك.. لا ضربتي بعشرتي عرض الجدار

إنفصلتي .. واستقريتـي لحالـك .. وانتقلتـي

طالعه وبرغبتك من دار .. واصبحتـي بـدار

بس انا في نار عشت وتهت من يومك رحلتي

حتى في لحظة كتابة هالقصيده .. عشـت نـار

عندما غبتي ثـلاث شهـور ماحتـى سألتـي

قلت: اجل آن الآوان.. ويفترض سـدل الستـار

وقبل لا اغمض عيوني .. وبثواني .. إتصلتي

لجل تنعاد الحكايه.. و كن مابه شـيء صـار

رأقت لي فكانت هنا أتمنى أن ترتقي لسمو ذائقتكم