الحلم يبعد كل ماامشيله شوي=
هبت رياح الوقـت واظلـم سمايـا
امشي وادور شمعتي باشعله ضـي =
في درب ماسـرن وخيـب رجايـا
دنيا تسوق القلب وان قلته لـه عـي =
قـال الزمـن ماهوبكيـف الطنايـا
لوتمشي الدنيـا وتسمـع وتصغـي =
ماضـاع حـق ولاتبـدل نـوايـا
امشي بحر الشمس عن لاهب الفـي =
ابي (الشقيق) ورحت سبت العلايـا
اقول شـي وخاطـري وده بشـي =
واستـر علومـي لاتجيكـم عرايـا
واكتب وافضفض للورق وانت ياخي =
لاتستمـع لاخبـار راع الوشـايـا
اسمع وانا باقولك عن جبـل طـي =
شي نسـاه الوقـت بيـن الزوايـا
قصه عرب يوم المـوارد بهـا ري =
تسقي الحلوق الناشفـات الضمايـا
يوم الجوارح صيدهـا تاكلـه نـي =
تاخـذ وتعطـي للزمـان البقـايـا
قصه جنايز سولفت عـن خبرحـي =
وصاغت تفاصيل الليالـي حكايـا
وصحت قلوبن جرحها كان مخفـي =
بين الضلوع وهيمنت فـي حشايـا
وحتي الجروح اللي غدى طبهاكـي =
زادت وسادت واسرفت فـي عنايـا
قلت ارقدي ياعين وش جابهـم لـي =
وش جاب طاري سربتك والسرايـا
وش عـاد لوناديتهـم يابعـد حـي =
ماحـدن تسّمـع لويطّـول نـدايـا
حلمن رجـع للبـال لوكـان منفـي =
يـزور والا فـي مراسـم عزايـا
حلمن قديم وكـل ماامشيلـه شـوي =
هبت رياح الوقـت واظلـم سمايـا