للوعَد قصّه تَعَنَّى مشْتريها=ما قدر ياصل نهاية محْتواها

البطوله قسْوةٍ منها وفيها=والعذاب لخافقٍ يطلب رضاها

وينها راحت وانا مازلْت ابيها=زارها شوقي وْضيّفني جفاها

رَبَّعَت بدْروبي اللي تنْتهيها=وامْحَلَت بالموعد اللي ما نساها

قلبي الليله تضرّم يشْتكيها=وانتهى يشْرح من الفرقا غلاها

وانْطوى يسْأل عن الرعشه يديها=يومها ترْوي يميني من ظماها

هي تمون وتجْرح اللي يهتويها=أو يهون اللي تعذّب في هواها ؟

صفحتي صارت شقا للّي يجيها=حرْفي الصادق بداها وانتهاها

الأيادي ترْجي المولى يْهَديها=والنظر طيرٍ تعلّق في رجاها

بالشوارع خطْوتي تشْره عليها=وينها يوم الهوى حنّ وْبكاها

إمطري يا دمعة اللي يحتريها=وش بقى دام الفرح راح وخذاها ؟