يامشغلن قلبـي عسـى الله يجازيـك=
حتى الكرى من نـوم عينـي خذيتـه
وش حيلة اللي يسهـر الليـل يبكيـك=
حرق جفون العيـن دمـع(ن) بكيتـه
حلمي تلاشى ونتهـى صبـر مغليـك=
وش عاد ينفـع دام صبـري قضيتـه
اقول يمكن هاجـس الحـب يدعيـك=
وترقا معي..بالمرقـب اللـي رقيتـه
تكثر على رجـم الهقـاوي مساريـك=
وتقراء نشيـدٍ فـي غرامـك هجيتـه
واقول.. يمكن فـي طريقـي الأقيـك=
واعلمـك بالـدرب عـن مـا لقيتـه
اشرح لك الماضي واذكرك ماضيـك=
حتى تذكر جرحـي.. اللـي رئيتـه
واخـذك بـدروب المأسـي وأسليـك=
واقـول ذا دربٍ برجلـي مشيـتـه
الوعـك.. بالحـب حتـى يبكـيـك=
واعطيـك منديـلٍ بدمعـي سقيـتـه
واقول توك فـي غرامـي واجافيـك=
حتى تشوف اشلـون حالـي طويتـه
راجع غرورك قبـل تظلـم لياليـك=
قبـل يـروح العمـر وتقـول ليتـه
العام يومنـي علـى الـود شاريـك=
بعت الوفـا بغـرورك اللـي جنيتـه
خنت الوفـا يخايـن العهـد بيديـك=
انت السبب في كل جرح(ن) حويتـه
فتش بصدري بين الاضـلاع تنعيـك=
كـل المشاعـر ولاحاسيـس ميتـه
اقول!!!مات القلـب ماعـاد يعنيـك=
خلاص حبك مـن ضلوعـي محيتـه
لو اطمع أن القلب يرجـع ويدعيـك=
داخل لهيـب النـار بيـدي رميتـه
لو ادري أن قيسْ المواجـع بيشكيـك=
جدعت راسي.. تحت رجلي وطيته!!!