‏طهّر ضميرك كان تبي السعاده=من الحسد والحقد ومتابع الناس

ما بالحسد غير الفلس والنكاده=وجمع الذنوب اللي بلا عد وقياس

عفّر جبينك للمهيمن وناده=وناج الكريم اللي خلق كل الاجناس

واخلص لربك في جميع العباده=واترك سوالف عالمٍ توجع الراس

واصحا تصير سوات عين الجراده=قصر النظر دايم مردّه للافلاس

واللي نثرحبه بوسط الكتاده=يحصد ثمر زرع الندامه والاتعاس

كلٍ حسب زرعه يحصل حصاده=يجني محاصيله والارباح بقياس

وربح الحسود من الذنوب ازدياده=ومن الغنايم ماكسب شلقة الكاس

سيف الحقد لاتظهره من غماده=الحقد من طبع الثعالب والابساس

والطيب يبغى من يعنّي جواده=ويكظم على حبل المراجل بالاضراس