تقديم :>>احم احم..صوت..واضح بنغير جو اليوم ونخلي الموضوع جلسة شعبية بدون تكلف وبدون رسميات.... من سواليف الزمان >>>خليني اليوم أصير الراوية .. موضوعنا ....مو قصيدة كاملة مثل الغالب ولكن هي ردية ....بين شايب وفتاة أتمنى لكم المتعة لكن لا تنسون تقولون من الأقوى الشايب العود والا البنت الشابة بدايه القصه هي عن شايب اسمه حمدان هواوي ( قلبه خضر ) ما يشوف بنت الا ينفتن ومشهور بانه حبيب بين ربعه فيه بنت ملكعة ومزيونه من بنات الديره الي هو فيها قالت في نفسها انا ليه ما اروح للشايب الي يقولون ان قلبه خضر وامزح معه واضحكه شوي واشوف ردة فعله كيف تكون راحت له و سلمت عليه.. كيف حالك يا شايب؟؟؟ رد السلام وفجأه عطته ظهرها ومشت ولا استئذان ولا شي ولع الشايب من حركتها قال فيها كم بيت يستعطفها فيها ويقول انها ذكرته الماضي و اذا ما عطيتيني وجه لحقت باخوي حمود اللي في قبره ويذكر التاريخ واليوم اللي قابلها فيه يـــقــول الــشـايــب: يابنت خذي خاطري وارحمينـي لاتجرحين العود بعيونك السـود غضي نظرك وغطي الوجنتينـي لعل يوم جـدد الجـرح مايعـود يوم انتهى مع مرمسات السنينـي جتني صواديفه على غير مقصود باول شهر عشرة نهار الثنينـي حمدان مروا به على جنازة حمود البنت كانت تقصد من استفزازه انها تجاريه في الشعر وترد عليه والمسكين ما كان يدري انها شاعره وعلى باله ما خذ راحته في التغزل ردت عــليه تــقــول: ياشايب الرحمـن وينـك وينـي عزي لحالك قدامك الباب مسـدود قلبك عطوف وجاه قلـبٍ متينـي والبنت ما تشفق على مغازل العود حبل الرجا مقطوع بينـي وبينـك مثل الغليث اللي رعا قلبه الـدود اقفى شبابـك والعـرب مقبلينـي ياعود مايرجع من العمر مفقـود حطمته يوم قالت له انك عود وان الشباب ما يرجع وان ما فيه امل حس العود انه تورط وقال كم بيت يقول لها صدي عني انه ما يبي الغزل بعد ما وصل عمره ثمانين سنه يــقــول حــمــدان: يابنت صـدي بالعيـون الظليلـة لا صد عنـك الله نهـار القيامـه مالي ومالك يالفـروع الطويلـة لو فيك من رسم البـداوة علامـة يابنـت مالـي بالثمانيـن حيلـه اهدف كما تهدف على البير قامه اقفى شبابي والدهر شفـت ميلـه يالله حسن الختاتمـه والسلامـه اعطيك موجز والبضاعـه قليلـه واخذت لك من صافي الماء سنامه بعد فتره مرته مره ثانيه وسلمت عليه واستفزته و ضيقت خاطره وراحت وخلته ولع الشايب وقال ليه ما ابين لها في كم بيت انها بتشيب مثلي واني رجال طيب وان الناس تنصاني ومعروف بالكرم واني ما ابي منها غير التحيه والترحيب جهز الابيات وارسلها مع عجوز ووعد العجوز بهديه اذا وصلت الرساله لها راحت العجوز وعطت البنت الابيات اللي يقول فيها: يابنت ما جاس الكبـر والخشونـه وعادت شباب اليوم يجفل من الشيب ياسـرع ماوبلـك تمـزع مزونـه يالفاتنـه يـاام الثمـان الرعابيـب يابنـت مابينـي وبينـك مهـونـه كلمة شرف نبي تحيـه وترحيـب الله مـن عـود ثقيـلـه طنـونـه ينصاه راع المشكلـه والمواجيـب على الكرم والديـن نفسـه حنونـه تلقاه بالاجـواد شـرق وتغاريـب شافتها البنت وقفلت على العجوز في غرفه وقالت مثل ماجيتي بابياته ترجيعن بابياتي ردت البنت ابيات اقوى من الاولى واكثر تحطيم مسكين الشايب ما احد رحمه حتى لو حاول يستعطف تــقــول الــبــنــت: العود عود وطايحـات سنونـه من كثر مايرقد على جرة الذيب عودٍ مهرقل والعرب مايبونـهياعود مالك في طويل المراقيب اقفى شباب العود راحت حتونه مثل اليتيم اللي بكا ماله مجيب جداه ينثر دمعـةٍ مـن عيونـه غريق موجٍ مالقا له مقاضيـب وبكذا تكون انتهت السالفة .....اتمنى انكم عشتوا معهم الجو لكن لابد تقولون من الغالب الشايب والا الفتاة؟؟ والسبب ؟؟ وسلامتكم ملاحظة :الصور رمزية اخترتهم على أساس خيالي [/quote]