يافتى الجود شرق يافتى الجود=
. واركب الصعب يارجل المهمات
مابقى صبر لكن انت موجود=
.تنتخيلي اليامن جتك الاصوات
اركب اللي صنعهاصانع سكود=
.مركب العز في عصر الحضارات
اكفخ بليل لامن ذعذع النود=
.ودع جبال شمّر بس بسكات
لابةٍ عزها محمود مشهود=
.طيبهم لاح في راس الطويلات
خاطري ماش يامشكاي ملهود=
.مابقى للحكي والضحك لذات
كل ماجيت دربٍ صار مسدود=
.مابقالي مدار ولا اتجاهات
وصل العلم صار الوقت محدود=
.وانت عاد احفظ اللي بالملفات
وانت طبعا مع اهل الطيب موعود=
.بانتظارك حزامي بالصعيبات
خبره بالخبروالعلم مردود=
.رووس الاقلام يقرونه مشتات
وان قراها يبي يعطيني الفود=
.شاعرن قرم ما تعصاه الابيات
يابوصالح وانا للنقص والزود=
.ضعت مابين تحديد المسارات
حي موجود لكن وين مفقود=
.بين صوت الحياة وصوت الاموات
عقد الايام فيها شرط وبنود=
.والسما زينت صدره مجرات
حظي اقول والاايامي السود=
.كلها يالسنافي مالها اثبات
وقصتي يمكم ماارسلتها كود=
.اخذ الرد وافي منك بالذات