البارحة مـر بالـي كـم طرقيـه=
منهم مصـدر ومنهـم كـم وراده
تفرقوا من خيالي وأخلـوا النيـه=
وأختارو الصد والعربـان مـداده
ما فيهم اللي وقف وانمدت أيديـه=
وما منهم اللي يرد الصوت لأسياده
الناس بالناس يالأصحـاب معنيـه=
والطيب ما ينحسب لمكبر وسـاده
كم واحدٍ راح عمره ما لحق غيـه=
راحت لياليه ما جابت لـه أمـراده
الوقـت دوار والدنيـا مضـاويـه=
أغنم زمانك قبل لا يقبـس أزنـاده
الحر يشفق علـى عالـي مراقيـه=
والناس يا صاحبي بالحيـل نقـاده
سلام للـي يسـر البـال طاريـه=
ياوارثٍ طيب أبوه وسطوة أجـداده
يا صاحب الخلق مأموره ومنهيـه=
بأمر الكريم العزيز منجـي عبـاده
نارِ تلضـى بجوفـي قـل واليـه=
بين المعاليق نـار الجـود وقـاده
لو مالرخاء فطرت صدورٍ شماليـه=
كان أحتفل بالصدور الضيق بأعياده
ولو أن الأرزاق تأتي لك على النيه=
محدٍ تكبد مـن الأتعـاب وجهـاده
يا بعض الأحلام لا تبقيـن ورديـه=
تغيّـر الوقـت والأيـام جــلاده
والناس كلن بجـوده دون عانيـه=
وعمر البنادم محدد قبـل ميـلاده
مجموعة أحلام وأحلامـه خياليـه=
يبنيله أمجاد ولاطّول مـع أمجـاده
هـذي حيـاة الأوادم دوم مقفيـه=
طلابها دوم واقـف لـه بمعيـاده
وهالحين لو مر بالي كـم طرقيـه=
تركـت كـلٍ بمصـداره وميـراده