احيان اضيق بضيق الايام وآفيق=
اخذ حساب السالفـه واستفيـدي
صدري شمالي ماخبر فيني الضيق=
يجتاح صدري كل هـمٍ جديـدي
البارحه وأحكاية الشعـر تلفيـق=
ياهاجسي وضح مخازن رصيـدي
كانك تمشيني على فكـة الريـق=
الدرب واضح والمسافـه تبيـدي
غنيت في راس الطويله طواريـق=
وابحرت في جو الكلام الفريـدي
الصبر مفتاح الفـرج والتوافيـق=
والله وحده فوق عرشـه اكيـدي
الناس له شوفات سلم ومواثيـق=
ومايفلح الا راع رايـن سديـدي
اجنب وغرّب للشمـال وتشاريـق=
تلقا البشر فيها جزيـل وزهيـدي
دنيـا تجمّـع والنهايـه تفاريـق=
والرابح اللي حاش منها الحميدي
ياقلبي اللي كل ماقلت لـه ليـق=
عيا يطيع الشـور عيـا يحيـدي
وين انت ياذيب الهواجيس ماتويق=
ماتشوف رجم الذاكره مستهيـدي
ذكر الحيا وعلوم الاجواد تشويق=
الطيـب يبقـا والفنـى للعبيـدي
لاصار ماتحسب حساب المطاليق=
تراك ناقـص مرجلـه يالبعيـدي
الحر يرقـا عاليـات الشواهيـق=
والبوم لو انـه رقـا مايصيـدي
مرات اجامل واحتمل فوق ماطيق=
ومرات اواجه صاحبي بالزنيـدي
واحيان اضيق بضيق الايام وافيق=
واعيد كـل السالفـه واستفيـدي