ازهموا باسمي وانا شاعر(ن) لاجا مجاله=
وكل واحد دون عانيـه فريـس الشعـر

اعتزي لعيون شمـر ولعيـون الطوالـه=
وعقب اللي مـا يجمـل اليامنـه حضـر
فك ياهاجوس الاشعـار بيبـان الجزالـه=
مالنا عن حفـل شمـر وشرهتهـم عـذر
لابتـي ماللمواقـف ارجـال الا ارجالـه=
وانتم اللي فـي مواقفكـم دروس وعبـر
يوم هي بالسيف والرمح ماهي بالسهالـه=
مثلكـم بالوقـت بيـن القبايـل ماظهـر
وانتم اهل الطيب واهل الكرم واهل الشكاله=
يالطنايـا درع جنبـي احزامـي بالظهـر
والوطن له حق وبيـوم عيـده واحتفالـه=
تحتفل شمر وتعقـد مـن اجلـه مؤتمـر
والكويت ابلادنا اللي ربينـا فـي ظلالـه=
ودونها خضنا الحرايـب بميـلات الدهـر
ولجلها حوض المنايا وردنا فـوق جالـه=
نردع العدوان عنهـا ولا نهـاب الخطـر
كم وكم من دونها شايب راحـوا اعيالـه=
وكم شهيد اروى ثراها من الـدم الحمـر
مبطـي وتاريخنـا بالبلـد ياحـي فالـه=
وفي سجل المجد تلقا أسمنا بـاول سطـر
من سنة عشريـن والفضـل لله والثنالـه=
صيتنـا عالـي وتاريخنـا مجـد وفخـر
تشهد الجهراء بميقافنـا وقـتٍ مضالـه=
وان تكلم عـدد افعالنـا القصـر الحمـر
افتخر في ربعي اهل الشجاعه والبسالـه=
ولا اهفي حقوق القبائل وكلـن لـه قـدر
ومن يشكك في ولاء شمر من اهل الجهاله=
يسئـل التاريـخ عنـا ويعطيـه الخبـر
والكويت ابلادنـا ام الكـرم وام الجمالـه=
وحبهـا بقلوبنـا كلنـا بـدو وحـضـر
وعيد الاستقلال في دارنـا هـذي ليالـه=
والعلم مرفوع ياكويـت تحريـر ونصـر
والفرح عم بجنوب البـلاد وفـي شمالـه=
يحفـظ الله دارنـا فـي ذرا ولاة الامـر
دارنـا دار الكـرم والمعـزه والعـدالـه=
والولاء لخـوان مريـم طويليـن العمـر
والله يعز الوطـن والاميـر بكـل حالـه=
شيخنا اللي بالسياسـه وبالعـدل اشتهـر
ابو ناصر ياعسى الخير والتوفيـق فالـه=
ويحفظ الله دارنا مـن صواديـف القـدر
تمت وصلوا على المصطفى راع الرسالـه=
الرسول اللي بعـث رحمـه لكـل البشـر