يقول الشاعر اللي ما يصور شن وهو وما صار =يجيب اللي يفيد المستمع من عدل الأمثالي
أنا باختار والرَجَّال باللي يعجبه يختار = ولاني منعدل يااهل المَعَرْفة عن هوى بالي
الا ياتل قلبي تل سيمٍ تلّه الحفار = على بيرٍ صفاها يلطمه جالٍ على جالي
إلى من المكينة صاحب الصنعة عطاها النار = حداها اللي حداني والهوا للروح قتالي
على اللي تل مجدولٍ مواقيمه ثلاث أشبار = على نهدٍ زما فوق التريبة تقل فنجالي
حداني دونها حظ الندم وسط النهار إجهار = مشيت بيوم لومٍ ماتبي حالي ولا فالي
ألا يا حيلة الله كل ما دار الفلك وإندار = تعرّض لي نهارٍ يبعد الغالي عن الغالي
رماني بدار واللي شوفته موت وحياة بدار = احسب إن البطى يجلَى الغلا عن كل رجالي
حبيبٍ ما قصر دوني قدم رجله عن المسيار = يواصلني وانا محتاج له ساعٍ ومرسالي
وأنا اسري له الى نامت عيون الحسد والهذّار = أخاف اهل الحسد يدرون باحواله وبحوالي
عشيرٍ ما يطاوع بي كلام الواشي الثرثار = وانا ما اصخيه كان اصخي نهار البعث باعمالي
نفوز بصحبةٍ من يوم حنا بالشباب اصغار = وكلٍ ما يطيع بصاحبه واشي وعذالي
والا يالله يا ستار سترك وأسمك الستار = تلبسنا ثياب الستر يا رحمن يا والي