بسم الرحمن الرحيم
تحيةٍ والبسمله له عناوين
بالله مبداها وبالله ختامه
تحيةٍ ماهي تحية ملايين
ولا شِدِها شَد الشّبَك بالحمامه
عطرّتها بمعتقات الحرمين
سيفين والنخله وكعبة فخامه
مافاح صنفه في جميع الدياوين
ألّآ بديوان الملك باليمامه
أقدمه لمجدد الحكم والدين
خصم التشدد وأنحلال الكرامه
مذهب وسط سنّة خِتام النبيين
أفضل صلاة الله عليه وسلامه
المملكه على الهدى والصحيحين
لو مشعِل الفتنه يدبلج أعلامه
ولوبثّة الفرِقه قناة وشياطين
ماضر من ترّقى خطاه الغمامه
يشهر كما يشهر قطامي جناحين
ويدلى بمخلاب الفعل والصرامه
أعّجُب به العدوان قبل الموالين
سلالة ملوك العرب والإمامه
يثور ثورة مجحمات البراكين
عنه المعادي ساق ظبي ونعامه
الشعب يبي محمدٍ فيه راضين
الفيصلي راس الشموخ وسنامه
محمد إليا تاهت علوم السلاطين
نجم السّرِات الي يقدي الجهامه
صعلٍ تبعثر منه كيد المعادين
وشعيلهم عود يسحبل خطامه
طوّح بمقلاعه نياب الثعابين
وتاطى على ظهورالعقارب أقدِامه
تلى أية الكرسي وصاح المجانين
يومٍ عليهم مثل يوم القيامه
خلاه ابو سلمان صرّة وراعين
جوع امهم عجّل بحزّة فطامه
هذا دماغ المرجله يالكراعين
على كتاب الله قواعد نظامه
ريف اليتاما وابتهاج المساكين
كف السحاب الي تدلّة أكمامه
سيله يشوح من الغثاء فوق جالين
وادي الرما منّه تصافق لطامه
خيرالمناقب حازها بين قوسين
مكارم الاخلاق هي والزعامه
أقسى من القاسين والّلين من الّلين
وينوّخ الزمْل المقلّقِل خزامه
مكايد العدوان عنده مهي شين
درّاقة المسلم بزي العمامه
جزل الفرايد تفتخر بأحمرالعين
وتنفر سواه وفاخر المدح رامه
والعز بأهل العز عزّه وتمكين
فخر الشداد ولاحِداجة مسامه
لاصار للجوزاء عسام ودخاخين
فيّة طويق ولا جحور العدامه
وصلاة من بأسمه ينادى المصلين
على الشفيع المصطفى والسلامه
🇸🇦🇸🇦🌴🌴🌴🌴🌴🇸🇦🇸🇦
شعر بن طواله
خير المناقب
العرض العادي
