اللي حكَى بالناس لاتجلس معه=يجيك يومٍ ويحكي بك يالرفيق
ياصاحبي عن مثل هذا في سعه=حتَى ولوضاقت يولّي لوتضيق
جهات الأرض اللي نعسّه أربعة=والأربعة كلٍ لها باب وطريق
ومن يقطعك هالوقت لا لاتقطعه=تفيق خلق الله بعَد مدّه تفيق
واللي مايقنع وش تبي به تقنعه=بكرا يعَرْف الصّح لاشب الحريق
الوقت لاطاعك على المهلة طعِه=الوقت مايَعْرِف عريف وْلافريق
ومصالح الدنيا مهي عيب اتبعه=العيب والله بيعتك لاغْلَى صديق
حائل عروس الشمال وقبلة الضايق.=اللي من الحزن يشكي همّه وحاله
حائل يجيها الحزين ويبتسم رايق.=من طيب اهلها هل الوقفات والقاله
حائل منارة كرم يوم الكرم عايق.=يوم البخل يوجع اللي يصرف رياله
حائل من الله خلقها علمها فايق.=على جميع المناطق والفخر شاله
حائل لها الغيم لامنّه نزل لايق.=يشبه نزول الأبو لاقبّل عياله
حائل عليها الجبل من حرصه يهايق.=يبي يظف العروس بهيبة ضلاله
حايل بها القلب ينْبض هايم وتايق.=حايل لها المجد يخضع قبل يرقَى له
ضاقت عَلي البارحة آخر الليل.=ومن قبلها ضاقت وضاقت وضاقت
لكن سمي المجد وجه الرجاجيل.=من شفت وجهه كل الاوضاع راقت
ضحك وقال ابشر بعزّك عن الميل.=انا عضيدك يوم الأحزان واقت
مطنوخ في وقت السعة والبهاذيل.=ومْن السطر يمناه للطيب ساقت
حشم ونس لادرهم الهرش وشعيل.=يبين يوم ان المواعيد باقت
في ساعةٍ لوّح بها الهم والويل.=على ظهر هقواتنا لاتلاقت
يورّدك عقب الضماء منبع النيل.=اللي عليه آمال الأوجاع فاقت
هذا ولد عمي مثل سيفنا عصيل.=إليا ادْبرت وظروف الأيام عاقت
كل العلوم الطيّبة له مداهيل.=وكل العلوم الطيّبة فيه لاقت
هذا ولد عمي إليا قيل ماقيل.=هذا الذي روحه للامجاد تاقت
علم بْلادي يرفرف فوق قمّة طويق.=وطويق يفخر بدار المجْد واهل الوطن
هذا علمنا بظله يستجير الصديق.=اللي ظروفه على حسرة حدوده سطن
عليه توحيدنا يامن به اللي يضيق.=ويضيق منهو بْحِقْده في علوه فطن
تطرب له الارض والتاريخ يبقى عريق.=على ظهور الخيول اللي بْعَجّه وِطن
رفْرِف وحنا معك مهما يكون الطريق.=بقيادة اللي عطى ماقال مَرِّه عطن
محمد ابن الملك بامْر الملك مايعيق.=الا عن اللي نهى لو المنايا خطن
شوره براسه اذا صاح اللواء للفريق.=ولاهو بحاجه مشوره دون عرض الوطن
عيدك مبارك ياوطنّا بالانجاز=اللي يشرّف من كتبك وقرابك
ياموطني لوكنت بالحيل معتاز=ماابيع طيفك لوذبحني سرابك
ماجيت لك ياموطن المجد باعجاز=لكن تنفست الهواء في هضابك
اموت بك ماهو على النفط والغاز=لاوالله إلا لجل حفنة ترابك
ياموطني لو تنكسر صرت عكّاز=يرفع شموخك عن مواقع خرابك
جيتك ملبّي لك قبل لااسمع العاز=روحي فدا حدودك وساحة رحابك
حبك ماهوتمثيل واشعار والغاز=حبك على صدق الشعور احتفَى بك
دايم معي في عالم الكون تجتاز=كل العوايق في خريطة سنابك
مااهديت لك دمي بقربة وبرواز=اهديت لك عمري ولايصك بابك
عسَى غلاي اللي تشبّعت بك حاز=على رضاك ان كان يسمح جنابك
أما انا يكفيني الشوف بك فاز=دوك النظر وتشوف كيف اهتنَى بك
مايوجع الصاحب اللي يطعنِك بالظهَر=إلا رحيلك بدون تلدّ لامر فيه
الناس ماعاد فيها مثل الأول قهر=تعوّدت شوف وجه المنتهي والسفيه
وتبلّد احساسنا واللي بصوته جهر=ماعاد لاكبرت الأوضاع نسأل عليه
ياالله تعين السنة على مرور الشهر=وتسوق رزق اليتيم اللي فقد والديه
شفنا بكينا الصديق الصادق اللي طهر=بالساعة اللي تلاشَى به حضور النزيه
نمشي والأيام تمشي والعوض بالسهر=وابن المنافق ينافق مثل ماكان ابيه
الخير واجد ولكن من يسوق المهر=على بنات السحاب اللي تَعَشْق الجنيه
حنا بوجهك يامِجْري فوق الأرض النهر=انك تعز الضعيف اللي رفع لك يديه
عزاه من قلبٍ به الهم مغتز=غزة هل العوجاء لبيرق مْعزّي
هاجوس بقعاء بالمواجع تلعوز=شَد ونِزل بين الضماير ولزّي
لز ولزا في داخل الجوف واهتز=هزة جماهير النصر بالملزّي
فكري له سنينٍ قديمة فلا فز=كن الشقاء في داخله مستعزي
ياحّوْل ياروحٍ بها الضيم يحجز=كل ما نوَى يقفي ترده بْكزّي
أسباب من بُعده يحز الحشاء حز=عامين بعروق الجهيلي يحزّي
حز الفؤاد وداخل الصدر ركّز=تركيز منهو للمخاطر يفزّي
شبلٍ خذا كل الشهادات واعتز=من عقب ماجرّب حياة التلزّي
وياحمس وقتي حمس بنٍ على قز=بيدين منهو بالثواني ينزّي
مطلوب دم وكل ما هوّنت نز=ومن عالمه قبل البلاغ مْتوزّي
لو مر من فوقه غلط طاير الوز=أسبط ولاقادر بعينه يخزّي
حسبي على العادات والجاه والعز=فيه افتخر لو الفخر بي يعَزي
الليل والفنجال والنار والجاش=وبرد الخلا من عقب دفوة فراشي
وحزني وهمي وأنسكاري والانعاش=والجرح ينزف لكن الغبن شاشي
تجمّعن فيني مثل جمع الاوباش=اللي لهم عند الخسيسين واشي
يااحبابي الغالين يا اصحابي الكاش=ياللي تعرفون الثقال النواشي
مرّت سعاد وباعوا السوم ببلاش=أهل البيوت اللي وراها العْشاشي
صحراي قفرا والحقيقة بعد ماش=والكوكب الدّري لحقه العفاشي
واللي مهو راشي لقيناه مرتاش=والمعظلة حتى بسوق المواشي
ونقول يا عمّاش ويقول عمّاش=مالي دخل لاصار يمشي معاشي
وتغيب شمسي بين لحظات الارماش=وآقف وأقول اني مع الشمس ماشي
واتوه لوني عارفٍ كل مطراش=غصبٍ علي مابه جدال ونقاشي
باب الخلود وهيبة الذيب لاهاش= تمِر في فكري واعَسْف ارتباشي
الناس فيها شيء لكن وش الشي=الله ولاغيره عن الناس عالم
تشوف ذكر الميت في منطق الحي=لو مايَعَرْفِه لكن الرد والم
تطلع بنا الأوهام مع بزغة الضي=وتنزل ويصبح راعي الحق ظالم
دنياك ياابن آدم توهّج بها الغي=بالواقع تشوفه بعد وانت حالم
وقطع الرحم بين القريبين والخي=واللي يبي يصْلِح فلا هو بسالم
ضيقة حمول الوقت عن شيلها عي=لاصرت منت موكّلٍ بالمعالم
ولاتشرح الأسباب لوتنكوي كي=اشرح لمنهو بك إذا ضقت عالم
ياشاهي البرد لونك مابقَى خاثر=هانت عليك السنين وصفحة النشرة
مابين صمت الصديق وحظي العاثر=لقيت طهر القلوب بشلّة الدشرة
الحزن أمسى بنا بالحيل متكاثر= واحيان يصبح بنا عشرة على عشرة
الأرض فيها الورق طاير ومتناثر=والناس ترسم من النعمة على البشرة
ياقلب خلك على الأحلام يالداثر=ماتذكر الجوع يوم نقلّط الخشرة
أدري بأنك قوي عزوم يالواثر=لكن هموم الليالي فيك منتشرة
وش يعني إن قيل لاصحاب الفكر باثر=أصحاب الألباب ماهي منك منحشرة
ياصاحبي جيتن تشكّى من الضيق=ماتدري إن الضيق كله بصدري
ماتشوفني أمسي بروس الشواهيق=واصبح وصكّات الزمن ذيك حدري
الريق يابس مابقَى شي بالريق=وبدري على لوعات الأيام بدري
تكْسِر حضوري في عيون المطاليق=اللي تعزّن حيل وتْعَرْف قدري
أما العفون أهل الرخاء والمشاريق=كلٍ بهم لاقرّب الليل يدري
بالكذب تلقاهم على قمّة طويق=وبالصدق مامرّوا على ظل جدري
طلّعت نفسي دون نجمة وتوثيق=وطْعِنْت في ظهْري ولاشيف غدري
على بالك انك يوم ترحل تروح بعيد=ابي اموت من شانك وأبي أنتظر وصلك
خلقني عظيم الشأن لرضاه والتوحيد=مهو لجل أطارد واحدٍ يالغلا مثلك
تولعت بك صادق ولكن لقيت البيد=علاج الخفوق اللي كسرته نعم لَجْلِك
بودّعك توديع الفقارى ليوم العيد=وداع الكريم اللي عَطَى كل مايملك
انا مابغيتك مصلحة ياجميل الجيد=انا ابيك لا ناديتني وانثنت رجلك
حسافة على وقتٍ قضيته معك تحديد=يوم انك تصيح تقول لاغبت انا من لك
لي الله ولا غيره بسجدة يشيل الحيد=عن ضلوع صدري يوم الاشواق تنزل لك
البارحه مريت مامرّوا عليه الراحلين=ودعيت والدعوه بتيسير الولي لامن نوَى
من بعدها علّقت انا احلامي على الضلع المتين=من هيبته مافيه لا جني ولا ذيبٍ عَوَى
اللي تحملني سنين وكان باقي لي سنين=انا بوجهه لا يحطمني نبي نبقى سوَى
كم ليلةٍ ضاق الخفوق من الموادع والحنين=ونصيت مرقابه عقب حوف الهبايب والهوَا
وجلست والتفكير وداني رياض الصالحين=وانا قبل ارقى معي شعري وهاجوسي غوَى
تمرنا بعض الليالي ياعسى ربك يعين=ظروف نكسرها ونوب ظروف ملعونة ثوَى
يعجبني اللي يكتم اسراره عن الشهم الأمين=ويقول للراوي اذا أخطأ ،خطأ مالك لوَا
يااصحابي اللي تمروني على نيتين=الله يثبّت خطاكم في كسر عزمكم
ويعطيكم العافيه مع خوّة المنتهين=حتى يكون الشقاء موسوم مع وسمكم
توي عرفت الصحيح اللي عليه اليقين=بانت على الضلع الاقصى طهبلت رسمكم
ماني مْتَحَسّف عليكم لا ورب السنين=ولا قاله الله اكون بيوم انا خصمكم
الا على طاري اللي عايد القريتين=هو همكم او بعد للحين ماهمكم
يجيكم العلم بكرا والعرب راحلين=ويبين وش قسمنا ونْعَرْف وش قسمكم
البيد ومشابط السمراء وحَصْو البِطِين=اخير لي من حديثٍ مِعْتِلِيه اسمكم
العضو الأكثر نشاطاً هذا اليوم 
العرض العادي
