الاخوه اعضاء منتدى بعد حيي, اسعد الله اوقاتكم بكل خير
يسرني ويشرفني الانضمام معكم في هذا المنتدى
الراقي والشامخ بكم دوما ان شاءالله ومشاركة هذه الكوكبه المميزه
بهذه الابيات, كمصافحة اولى والتي ارد فيها على قصيدة
(اسمحيلي يالغرام) للشاعرالأمير نواف بن فيصل آل سعود
متمنيا أن تليق ببعض من استحسانكم .
تشتكي لوسادتك دنيـاك .. تسمعهـا تنـوح.=بس انا.. لو اشتكي.. شكواي.. من هو يسمعـه.؟
لا وسايد.. لاعبيـد.. ولاتضاريـس.. وطمـوح.=لامطـار.. ولاتذاكـر.. ويـن حتـى الامتعـه.؟
شف انا حظي .. يقابلني .. وانا اعرف وين اروح.=للهموم .. اللي زماني .. فوق صـدري يجمعـه.!
دمعتينٍ .. في عيوني.. تحـرق عيوني وانـوح.=آآآه .. لو امسك .. عنان الدمع .. واعـرف منبعـه
كان .. ياما كان .. في صيف العطش .. برد الجروح.=ماقدر ياقف .. مذلـة.. كيـــف يرفـع اصبعـه..!
التقدم .. في شمـوخ الفقـر .. معنـاه النـزوح.=والفقر..اعرف مقامـه.. وان عرفتـه .. اقطعـه
ماهقيت .. ان الزمن قتال.. في وقــت الوضـوح.=والزمن .. في وقتنـا بالله .. مـن هـو يقنعـه .؟
ان صبرت .. الصبر مفتاح الفرج .. ياصبر نــوح.=والحقيقه .. لافـرج .. لاصبـر.. مفتاحـي معـه.!
آآآه .. ياظلم الوسايد .. كيـف بهمومـك تبـوح.=الوسايد .. صدقها .. مـن كـذب .. ذيـك الاقنعـه
السهر .. عنواني الدائم.. على مثلـي شحـوح.=ان وقف .. وقفت جمبه.. وان مشى .. صرت اتبعه
ياراكب اللي لون بـَـدْيه كحل قوت.=او رِمشْ عيـْنِه لاغـَـفـَى في مبيته
لاصار عندك حزن والهم مكبوت.=والناس حولك والأحاسيس ميته
نـَزِّل شْمَاغك وازْعَج الجرح بالصوت.=وارْكَب على منخآت عمشاء و صيته
من فوق حرٍ اشتهر باسْمِه الحوت.=يجيب لحظات الأمل لا بغيته
بديه مثل غروٍ غنج لابسن كوت.=ضيـّق على خصره والارداف بيته
ومراتبه فيها معاناتك تفوت.=ويروح من فكرك سرابٍ رجيته
في داخله لون البنفسج مع التوت.=وفي مِقْدِمِه شيخٍ فزع مانخيته
صدامه الخلفي على الحزْن منحوت.=كنه يوادع كل دربٍ مشيته
يَاسَآيقه كَوِّع على خط بيروت.=وانـْصْ الذي لاضاق وقتي نصيته
يفدونه اللي بَسْ كشخات وبشوت.=اللي على شيخة حكي من وعيته
ويفدونه اللي طيبهم غَمْز وسْكُوت.=اللي على خبْث ولعانه لقيته
ممدوح عـِزِّي يابعد كل سربوت.=اللي على مرقاب همِّي لفيته
رجمٍ رقيته من غثاء الوقت مبهوت.=واليوم من فعلك طنآخه رقيته
يابو طويرش جعْل الانذال للموت.=ياعلّهم فدْوَة نعولٍ رميته
شبيت ناري وهم الغبن يصلاني.=ياويل حالي على اللي طوّل الغيبة
اشتاق له شوقي لضيفي وديواني.=يوم الليالي غيابي عنه تحري به
افز له من منامي لا وصل عاني.=بالحلم ،وشلون لوجاني واهلّي به
شعري وصمتي على احساسي ووجداني.=ماحرّكه غير توديعه وتعذيبه
تركتني للشقاء والعالَم الثاني.=مثل الذي يترك الاوجاع تسطي به
لامر طيفك علَي ترغمني احزاني.=على الطريق الذي لاضقت انا امشي به
ياملكي اللي ملكته قبل عنواني.=ياعمري اللي لقيته قبل ماادري به
احتاج لك كثر ماتحتاج الاوطاني.=للحاكم اللي يزيل الشك والريبة
تشوفني وتصد عني إذا جيت.=وهذا مُنَى عيني وهذا علاجي
فرقاك يامدوّر بجوالك الصيت.=على سنابات الكفو والزواجي
وش عاد ابفقد لافقدتك يابوليت.=ماشفت لك فزعة ولاني براجي
شرواك لوهو مابقَى بالوطن بيت.=غيره فلا يرفع لذكره حجاجي
اعَرْف قدر الساذجين الخراتيت.=واعَرف تقدير الظروف بْمزاجي
فاهم ولكن انتخيت وتمنّيت.=يروح عن وجه الكريم العجاجي
من انت يامسكين يومك تعدّيت.=جليك ابن حثلين والا العواجي
يامن خبر يحذي وهوماكسب شين.=ياكود ابن ناحل بماضي الزماني
خلف عطا من غالي المال ياحسين.=علّه يخلّد في نعيم الجناني
ترد الهجافا يم بيته تقل عين.=يلقون زادٍ زاهبٍ بالصياني
فعله ذكر باول زمانه وهالحين.=نورٍ نعدّه بالخفاء والبياني
الامير/ حمودالرشيد
=================================================
ومن بعد قول الضيغمي قولي الحين.=قولي عقب قول الامير يحداني
على البيوت اللي توارد علي لين.=امسي بها من فوق نجم اليماني
ياحمود يارمز الجبل والمسمّين.=استاذنك من بعد إذنك ثواني
اما الحضور اللي يشرّف هل الدين.=والا الغياب اللي خذله التفاني
عيال ابن ناحل علينا عزيزين.=معهم بوقت الضيق والا التهاني
اهل الفعول اللي على العز ضارين.=مقلّطين الحشو فوق الصياني
عاداتهم يوم الفقر لانحدر شين.=والجوع كافر والهقاوي تعاني
يشبع بداخل بيتهم شاكي الدين.=واليا رحل يرحل بكل الاماني
يوم السنين عجاف والمدّة شوين.=فازوا بها أول مهو فوز ثاني
عيال ابن ناحل على العسر واللين.=اجي لهم لو ماحديهم دعاني
لي الشرف لاصرت طلق الحجاجين.=وعند الرجال الكفو يِعرَف مكاني
علم الحياء يبين إيوالله يبين.=وايضا يخلّد لو يطول الزماني
خلف فخركم وافخروا والفخر زين.=الفعل يبقَى والعمر دوم فاني
المرجلة تبغَى سنافي حمر عين.=مثل خلف بالمرجلة والمعاني
ورّث لكم علمٍ به الناس دارين.=علمٍ ينومس كل قاصي وداني
علمٍ تفاخر به عيال الشياهين.=وتضيق من ذكره عيال الحَصَاني
وعلى حجر سقنا الوفاء والعناوين.=شيخٍ بوقت الضيق للضيق باني
كم أعتق رقابٍ وقف دونها البين.=يوم الشقاء ماله حدود ومواني
بجاهه ووجهه قدّروه الميامين.=يوم الزمن مابين مجني وجاني
عسى حجر قولوا معي قولوا آمين.=في جنة الفردوس بَاعْلَى المباني
انا اشهد ان الوضع ياشمر كفو وانتم بعد كفو=بنتوا إذا ضاقت علينا الأرض وفجوج السعة
شمر اذا اجتمعوا سوا وعلى الطناخة وقّفوا=علي الحرام انك تقول الجن بأمره يتبعه
شمر صناديد العرب من كل ناموس قطفوا=ما تشوفنا كل المكارم من خلقنا نجمعه
ماعندنا قولة رجل اعمال صيحوا واهتفوا=رجّالنا يفعل وصكّات الليالي يردعه
شمر على الموت الحمر من قبل ياصل له لفوا=الللابة اللي كل ماطاح السنافي ترفعه
شمر سنام العز مبطي إن صِفَوا أو ما صفوا=تجيبهم اسم الحميّا ماهو اسم المزرعة
شمر بعد حيي وفوا إيوالله إن شمر وفوا=إذا نخوا مطنوخ ردوا دون وجهه أربعة
انا لغيري ماني يابنت لاوضاعي،=وقت الرخاء له هله وانا لي الشدّة
ماجيت وقت المصالح وجهة شراعي،=مابين ساحل ضباء والا بحر جدّة
فيافي الأرض بين الذيب والراعي،=والجن في سد وسمي يومي بيدّه
تَضْحِكْني الكلمة اللي مالها داعي،=واحْزَن على اللي يقول فلان من قدّه
أذْكر بأن الطوابع تخْدم الساعي،=اللي يوصّل بريد الشوق ويردّه
إيوالله إني مني واعي وانا الواعي،=للريبة اللي بوسط الصدر ممتدّه
ياغيمة الصبح لاتبكين لاوجاعي،=منتي على ظل ضلعي غصب منحدّه
الأحزمة تنربط لاحان الاقلاعي،=في ليلةٍ مابها توضيح للمدّة
هذي سماي العظيمة وذيك هي قاعي،=وانا مابين السماء والقاع لي هدّه
ابن سعيّد مْعشّي الذيب ينخاكم.=ينخَى هل الجود شمر هم هل القمّة
هذا الذي مع وسام الطيب أهداكم.=أطلق لقب واسألوا التاريخ والأمّة
تكفون يالابتي والعلم لاجاكم.=لاتتركونه وقولوا الهمّة الهمّة
ياشمر المجد والأمجاد تنصاكم.=لادرهم الوقت باللي فاقدٍ أمّه
العيد هذا نبي قيمة ضحاياكم.=تروح للي دموعه بلّلت كمّه
بنت السناعيس صوته لايتعداكم.=واللي تبي بنتنا تبشر به نْتمّه
تكفون ياعزوتي والعز يزهاكم.=لاتتركون الحزين اللي شكَى همّه
وقفاتكم للغريب وكل من جاكم.=وشلون لامن نخَى المحتاج ابن عمّه
ياللي تشرّه علي بصفحة التكتك.=ترسل علَي الصغير وتوهم الشيبة
سنتين طايح وتدري بي وعلّمتك.=ولا قلت لك ياعشيري وين هالغيبة
وسنتين ماني أنا موجود باجهزتك.=ياراعي الاولة والشك والريبة
اربع سنينٍ تمر اعجاف ماشفتك.=وانا بوصلك قبل مااطيح محري به
كم ليلةٍ من غلاك بدمعتي زرتك.=يوم ان الأيام روح الود يسري به
وعلى رغم كل هذا ماتعذّرتك.=أرد رد الصديق بصادق الطيبة
الناس ماله دخل تعطيهم اسألتك.=ومزارق الطيب بيني وبينك ادري به
احب خشمك إذا شفتك وقابلتك.=وان رحت مسموح لو تلحقني الغِيبة
الله يلعن والديكم كلكم.=يااهل الغَمَزْ واللّمْز يااشباه الرجال
تكرم شواربنا نخاوي مثلكم.=ياللي سوالفكم فلا والله تقال
أزوالكم ماعاد تستر ذلّكم.=أوضح من الغيمة على روس الجبال
عسَى السنين العوج دوم تعلّكم.=حتَى نشوف الوضع يصبح له ظلال
منتم كفو ولاعاد يقرب ظلّكم.=لو مالقَى الأجواد غيره للسؤال
جعل البلاوي لااقبلت تحتلكم.=مثل احتلال القدس من بعد الزوال
حتَى على المسكين يطلع غلّكم.=حسبي عليكم كثر ماقيلت تعال
وطنا نحبه والوطن مايجيه خلاف.=مادام السعودي باذلٍ للوطن دمه
على طويق نبقَى فوق والعز به ينشاف.=مثل مايشوف العز وقفاتنا يمّه
رقينا على الأمجاد يوم الزمن ينعاف.=وجبنا لنا مجدٍ تفاخر به الأمّة
يسولف بنا اللي حط صورة ملكنا غلاف.=مثل مايسولف واحدٍ عن غلا أمّه
ويْحَيّي بنا اللي بالمدينة ومكة طاف.=مثل مايْحَيّي راعي الصدق بالذمّة
ويقدّم لنا التاريخ نبذة عن الأسلاف.=عزوم الرجال اللي على الشرع ملْتمّة
ولنا الحاضر الفاخرومستقبلٍ ينضاف.=على فعلنا الماضي نجدد به الهمّة
كذا من خلقنا الله بنا الحق والإنصاف.=وعَلَمْنا بفضل الله مكانه على القمّة
وطنا نحبه والوطن نَعْشِقِه باسْراف.=ورب السماء لويطلب نزمّه نزمّه
واذا ولّعت مافيه رجعة وقولة خاف.=علينا الفعول وقول حكّامنا نْتمّه
ولجل عين ابوسلمان لوتبْتَر الأطراف.=وقفْنا وقوف الشيخ لااقبل ولد عمّه
لا والله إلا شيخ قول وفعايل،=غصبٍ على الزعلان لاصار زعلان
وعندي على مااقول كل الدلايل،=أضرب على الكايد إذا صرت بحلان
ياشيخ ياشيخ السطر والجمايل،=ياطير شلوَى يوم روغات الأذهان
يالهيلع النادر كريم الخصايل،=يالوافي المطنوخ ياستر الاحزان
من راسك لْماطاك كلّك صمايل،=ماهي غريبة عزوة الشيخ صفران
اللي تعدّل كل ما مال مايل،=في ساعةٍ يبلش به الإنس والجان
فلاح شف راس الجبل وسط حايل،=وشلون رحّب بك على ظل برزان
يقول اخو فلحا لكل الحمايل،=مثل الرعيلة عند شمّر ورمان
فلاح ماتوفيك كل المثايل،=والشعر مايوفيك ضامي ورويان
تغليك شمر كلها والقبايل،=شفهم معك في كل محفل وميدان
من طيب راسك تستقر الجزايل،=عندك ولا غيرك للامجاد عنوان
انا السعودي والعلم بطويق،=مرفوع بالامجاد يالغالي
ماجتني الامجاد بالترويق،=جتني غصب من هيبة عقالي
من عقب ماينشف بحلقي ريق،=تشوفني بالعالي العالي
آمالي اللي ورثها التحليق،=غصبٍ على اللي مابغَى آمالي
انا السعودي ماابي تسويق،=اليا ادبرت تسوقني حالي
العز انا مااحتاج للتصفيق،=ماتشوف هالدنيا تَعَنَّى لي
وقتي ماهو للّعب والتشويق،=وقتي لعز الدار بافعالي
من قبل وقت النفط والتطبيق،=حب الوطن أفداه بعيالي
انا السعودي ماأبي تنسيق،=بيني وبين المر والحالي
دون الوطن يالله بك التوفيق،=أموت من دونه ولا ابالي
انا ماقلت لك لاتشتكي الاوجاع للمقفين،=نصحتك لكن انك ما تطيع النصح بالمرّة
صديقي والأمل باقي مع اللي عندنا غالين،=لو إن الكبد فيها من عبث أهل الوفاء حرّة
تصافحنا على الدمعة وقلنا للتعب بعدين،=كسرنا قلوبنا وحنّا نغنّي انكسرت الجرة
وصلنا مرحلة تمثيل دور ابليس والتنّين،=ولقينا عقولنا من دون تنجب للخطأ درة
نبي نسلا ولكن وين نلقَى ساحل السالين،=لو إن الموج يوجع لانْكشف للمرتكي شرّه
ودايعنا حسبناها ولكن حسبة الغاوين،=اهم شي نخلص وزرار البارحة زرّه
بدايات اللقاء وردة وخاتم ضحكة وتخمين،=ونهايات الحكاية موجة الأشواق مفترّة
سلام الله على الحبحب سلام الله على السكين،=سلام الله على اللي لابسط كل الملا سرّه
مجرات السماء تحتاج للي بالسماء دارين،=والأرض تقيّم أهل الأرض في حفرة وفي جرة
سلام يايوم الوطن والتباشير=سلام يايوم الوفاء والعزيمه
سلام ياابطال الوطن يالمناعير=سلام يااحفاد الرجال العظيمه
يوم الوطن هذه السنة شامخ وغير=فيه الجهات الأربعة مستقيمه
بقيادة اللي جيّته جيّة الخير=الخير في وجهه عسى الله يديمه
فعله فلا يحتاج نبذة وتقرير=وايْديه للمحتاج دايم كريمه
ملك بوجه الكايدة والأعاصير=يوم الملوك بْرغْد الاحلام نيمه
سلمان غيث اللي شكَى شحّة البير=اللي من الحسرة حلوله عقيمه
ابوفهد وقت السنين المعاسير=يعدّ لقدوم المصيبة وليمه
هذا الذي لاقال حتى الأساطير=من خشيته شافت مذلّة زعيمه
هذا الملك ماهم ملوك الدنانير=اللي تغيب ولا تجيب الغنيمه
يوم الخيانة تبتدي صمْت وتغير=يموت من خان السعودي بضيمه
هذا ملكنا يامر الأمر ويشير=على الذي ذاق القهر مع نديمه
من هيبته شف نظْرته والتعابير=وشلون صارت لجل شعبه رحيمه
وشبله ولي العهد خلّا زمَهْرير=تالع بمنهو يستحق الشتيمه
لعداه مايعطي مساحة وتبرير=جاهم ونكبات العواقب وخيمه
إن ولّعت ماقال كم المخاسير=خلاّ عدو الدار يصلَى جحيمه
لحدود داره ما تجوز المعاذير=النار ياويل العدو من هشيمه
إذا وقف تاقف شعوب وطوابير=واذا جلس تنزل على الجود غيمه
واذا مشَى ياقف له المجد تقدير=واذا ابتسم هب البراد ونسيمه
واذا لمح في نجمة الليل تقصير=حوّل بها للقاع ستر وحشيمه
لاصارت الأحوال تبغَى تدابير=شال الثقال اللي علينا مْقيمه
الناس وسباع الخلا ونادر الطير=إستامنوا به لاغياب وجريمه
من زود حرصه لالفونا المسايير=أصبح أبو للاجئة واليتيمه
وبحماه مهما يصير ويصير ويصير=لنا بتوجيهه معزة وقيمه
هذا محمد ماخذا الوقت تنظير=هذا الذي وقته مهابة وشيمه
سيفٍ لنا يوم السيوف البواتير=تخشاه يوم الغبن جور وظليمه
ودرعٍ لنا لاصار بالوضع تخدير=يبين لاصحاب العقول السقيمه
وعلاقته بالشعب من دون تصوير=علاقته بالشعب جداً حميمه
اميرنا اللي طوّر الدار تطوير=حتَى اهتنَى ابن الوطن في نعيمه
ماتشوفنا ناطَى على الأرض ونْسير=وخطْواتنا ماتعترف بالهزيمه
العضو الأكثر نشاطاً هذا اليوم 
العرض المتطور
