الشاعر عثمان المجراد سيرته واشعارهـ

الشاعر عثمان المجراد





نبذه بسيطه عن الشاعر عثمان المجراد


هو عثمان بن سالم بن عبدالرحمن بن عبد الله بن عبدالعزيز بن إبراهيم بن موسى المجراد من أسرة كريمة من كبريات أسر لبدة ؛ عرف منها رجالات ساهموا إسهاماً بارزاً في كتابة تاريخ مدينتهم حائل بحروف ناصعة البياض منهم على سبيل التمثيل لا الحصر : علي البراهيم المجراد المتوفى في موقعة الصريف سنة 1318 هـ وله موقف بطولي مشهود عندما اراد رفاقه ان يوجهونه للقبلة عندما شعروا بقرب وفاته فقال:اتركوني املا عيوني بانكسار الاعداء قبل الوفاة.، وصالح البراهيم المجراد المتوفى سنة 1296 هـ ، وحمود البراهيم المجراد ، وخالد الحمود البراهيم أمير الجوف قديماً ، سليمان العبدالله المجراد المعروف بـ أبو هلا (جدالشاعر احمد العريفي لامه زوجة الكاتب الاستاذ /فهد العريفي )والمتوفى في غزوة الجوف سنة 1338 هـ ، وغيرهم كثيرون ، ومن بين أشهر أبناء هذه الأسرة الكريمة عبدالرحمن العبدالله المجراد جد عثمان لأبيه والذي قيل فيه :

دغموش مايبي الذلول الردية
يبي الفرس والمعرفة والمعاميل

وقال شاعر يخاطب رجلاً - ولا غيبة لمجهول - :
ماطلعتك طلعة كريّم
او طلعة الشوشلي دغموش

ودغموش لقب تفاخر به أسرة المجراد . ولعثمان إخوة هم علي ومحمد وعبدالعزيز .
ابناءعثمان عبدالرحمن وطلال ..
عثمان هو ابن حائل البار ، وابن أسرة نفخر بانتمائها إلى لبدة ؛ فهو ليس غريباً على المجد ..

راْس اول مهرجان سياحي اقيم في حائل وشارك فيه عدد من ابرز الشعراء والشخصيات منهم:
الامير عبدالرحمن بن سعود-طلال الرشيد-عبدالرحمن رفيع-مساعد الرشيدي-احمد الناصر الاحمد وغيرهم كما كان اول مهرجان يشهد مشاركة الشاعرات والممثلات بالمملكة ومنهن الشاعرة الكويتية مليحة الفودري والممثلة انتصار الشراح والشاعرة تذكار الخثلان والكاتبة فوزية البكر وغيرهن.
اضافة ان نشرة الاخبار بالقناة اولى قدمت جزء كبير من كلمته في حفل الافتتاح.
غنى له عدد من الفنانين ومنهم:سلامة العبدالله وفهد عبدالمحسن وعبدالله السالم والصريخ وخالد السلامة واخرين.
قدمت قصائده عبر الاذاعة الكويتية مطلع الثمانينات في برامج اذاعية لطلال السعيد والاسير محمد المطيري.واذاعة البرنامج الثاني بالسعودية
له العديد من المقابلات الصحفية والتلفزيونية والاذاعية الا انه ابتعد عن التواجد الاعلامي في السنوات العشر الماضية.
شارك مؤخرا في احتفال حائل بزيارة الامير سلطان بن عبدالعزيز والقى قصيدة الحفل الرسمي للمرة الثالث على التوالي التي يلقي فيها قصيدة امام الامير سلطان في زيارتة الى حائل








قصائدهـ

اقول الزمن والمح ثلاثين خيال
تطاردوا بعروق جسمي عرايا

ظلي يصيح وخاطري صابه هبال
هذا اناوالا سراب المرايا

صم الجوارح صارت اشباح تختال
صعب انكساري في عيون البرايا

شال الالم صوتي تسمعت موال
عني ولكن مالقيتن معايا

تعبت انا اسقي لكن الزرع ماطال
ذبلت ورودي والعطش فالشفايا

مليت صبري ملني الصبر بالحال
يادمعة امي اغفري لي خطايا

صارت حياتي كلها مضرب امثال
اشوف حزني في جميع الزوايا

راحت سنيني مابها شمس وامال
اضمها واخنق طموح البقايا

قلت الزمن والهم وعيون الاطفال
تسابقوا بفراش حزني عرايا








دار الكرم

سلام يادارنا دار الكرم والشجاعه
حايــل عروس الشمال

نفديك باعمارنا مانلتهي عنك ساعه
ياام السـخاء والرجــال

الضيف الى زارنا يلقى الوفاء بالجماعه
فينا جميـع الخصال

يفرح بنا جارنا حق نعلًي شراعه
نسقيه ويشـرب زلال

واللي حرث نارنا لابد نلوي ذراعه
من دون رد وجـدال

يسلم لنا شعارنا رمز الفخر والمناعه
عن كل طـامع وزال

حكامنا كبارنا لهم الولا ثم طــاعه
لامر الولي بامتـثال
............


اغترب واشقى .. ..وتكثر حيرتي
واعترف مالقى.. ..مثيل لديرتي
ياقريبه ........... في خيال اللي بعيد
ياحبيبه........... والوله يمك يزيد
لو كتمنا الشوق :
يغلبنا الحنان
لو رفعنا لفوق: جاوبنا الزمان
يحكي التاريخ عن سيرة امم
عن حكايا جدودنا ويا الكرم
اهـ :يابرزان ..يالبده وسماح
مشتاق ياعفنان للوقت اللي راح
للزباره..للقرايا والجبل
وكل حاره فيها ربعي والاهل
ياعروسه..والحلى اللي فيك هايل..
ياابتسامه اسكني في وجه حايل..
وش تبين اقول: ياملح الشمال؟
هو انا معقول اوصف هالجمال؟!
يازمان اشهد..وخط بسيرتي
.....




حايليه صوتها سحر وحنان
حايليه وافيه طول الزمان

في ملابسها معزه واحتشام
في سوالفها معاني وأحترام
في دلعها قابليه.. حايليه

ما هوى قلبي سواها يافهد
لو يخير ما يبـي غيره أحد
في بداوتها أصاله وأفتخار
في حضارتها تشدك با نبهار
في كرمها أجوديه.. حايليه

لـو تخالط يا فهد كل الجمال
في ثواني تلمحه مثل الـغزال
عن جميع البيض به فرق يزود
واعساها تنعمي عين الحسود

في نظرها جاذبيه
حايليه حايليه حايليه
......
مدينة الحلم

نسيت اول طموح هزني يشفق على الهجران
مسحت اول طريق دلني بعض الوله لمه

بديت اخذ من اطراف الوفاء واستحلف النسيان
اذا ماسيرت عنده هجوسي يسترد همه

انا كلي وله00مهما تسيل العاطفه عطشان
ابي تروى عيونن طالعت باعزاز للقمه

انا ماني مجرد رقم00انا ياسيدي انسان
0رفضت اسبق مسافاتي لان السالفه ذمه

رضعت الصدق في لبده رفيعين الغلا والشان
نبت جلدي من مغيضه الا ياحيي هاللمه

وناداني البزيعي والعليا والتفت عفنان
نهض عيرف يطالع للزباره وده يضمه

شموخ العاطفه يكبر الامنه طرى برزان
خفوقي للنعام اشعل قناديل الفرح دمه

وبديت اسمع جبل شمر يردد عرضة الحجلان
يهلي بالعروس اللي دعيناها سوى:يمه

تمدد من جبل سلمى واجا واللي ورى رمان
مراقيب الشرف واللي تبي ياسيدي سمه

افاخر واحتفي كلي فرح ياروعة الاوطان
سعودي الولا والخير حنا:ساعده00فمه

بلاد خصها الرحمن موطن لاخر الاديان
نزل فيها الوحي واختار منها هادي الامه

ذكرت اخر طموح هزني :ياديرة الخلان
مشيت اول طريق دلني:بعض الوله لمه!




......

مايحتاج اوصيك..
وانت بحالتي داري
يامشكاي ناصيك..
امسح دمعي الجاري
وان كان الجفاء طوّل
............ذكرتك زمان اوّل
تتبعني وانا مابيك..
مايحتاج اوصيك
بدروب الهوى ضايع
.............ماني ذاكر العنوان
لاشاري ولابايع
.............ماكني ابد انسان
امشي صافي النيّه
وجروح الزمن فيّه
ماجاني تراه يجيك..
مايحتاج اوصيك..
لاقلت اللقاء تعيي
ليت ان اللقاء مسموح
وانته يابعد حيي
لك كل الغلى والروح
اسعدني ولو مره..تشفي قلبي وتسره
خل الكبر لايعميك..
مايحتاج اوصيك!.......

تلميحه..!
اهـ..يالصدف..
..من ساع لاقيته قريب..
حسيت دمي في شراييني نشف..
اهـ..يالحبيب..
الشوق في قلبي هتف:
..الى متى ناوي تغيب؟
الى متى وانا اتحرا جيّتك؟
خذني معك..لاتعتذر..
خذني معك لليل للمجهول..لعيون الجبل..
خذني بعيد........الموت قدامي وقف..
عجزت اقاوم ظلمة الديره ..وتيار الجهل..
خذني ترى تكسب اجر..
في شخص تاهيله :مواويل وشعر..
والناس من حوله ورق!
ماتعرف السارق ومنهو اللي انسرق!
الجرح ياجرحي:نزف..
خذني الى عالم غريب..
مافيه قاضي او خطيب..
ولاقبايل او هحن..
..خذني تراني في سجن!
..وقل ماتبي:مجنون؟!
واكثر من كذا!!
..عجزت انا صامت وفي طبعي :خجول..
خل اعترف :لو مرّه بس..
خلني اقول:
الى متى حزني يطول؟
ومن بعدها:خذني معك..والا بلى رجعه:
انصرف!!
.....



تذرف ندم.. تشكي من افعال السنين
كانت :مثل ورده زهت وقت الربيع
كانت:مثل بسمه على شفة رضيع
كانت:امل......
بعيوون حاكتها بغرام
وكان الخجل....
مدفون باطراف اللثام
ماهمها شوق وحنان..
مافكّرت في هالزمان
مالمسها ثوب الحرير..مافارقت هاك الغدير..
كانت :تحرّا للمطر..
تفرح الى منه كثر..
وكان الكرم:
مزروع بقلوب البشر

.........


ومر العمر يركض سريع..
وحسّت بامانيها تضيع
صارت نظارتها تذوب
.....والحسد يكثر بالقلوب

..........


تشكي من الام-ن-معه..
تبكي ولااحد-ن-يسمعه
اهـ :ياغدار..يالوقت العنيد
اهـ: وش ماصار..الامك تزيد
ماله في هالدنيا رفيق..تاهت باوساط الطريق
مجروحه:من كلمه تضيق..
بحالة عدم..
والحزن بالجسم انتشر..
دمعة الم!!

نشرة في مجلة اليمامة عام 1402هـ

.............



أنا وش همّني لا قـالوا التجــار طــاح السـوق
يطيح أو مــا يطيح بقـلعـته مـا عــاد يع،نيني

أنا همّي نشف دمّي وطارت في سماي عروق
إذا زاد الجفاء تيبس حياتي في شراييني

وأنا لامن بكـى طفـلٍ يتيم بحاجةٍ للشوق
أحس إن الألم ديره وأشيله وسط كفيني

عرفت الشيب من صغري تعوّدت أسبق الملحوق
على لون الشَعَر قلبي دخيلك لا تواسيني

ركبت الجرح..جيتك يالمحيط أحمل سلام شروق
لجسمٍ لا تعافا صار وجهه هو عناويني

جريحٍ خاطري يا صاح..وحظي صايرٍ لي عوق
تسلقت السنين ولا لحقت لـ لذّة سنيني

رهيف الحس..إلا من طاحت الغيمة رعد وبروق
ظمأ طلحي إذا عدّت يزلزل كل ما فيني

أجيك وفيك عين،وعيني الأخرى تلد لفوق
تماماً مثل نكته بس هذي مشكلة عيني
مجلة فواصل ــ 1416 هـ

............












.. وش علومك؟!
كيف تمضي باقي يومك؟!

وش تسوّي بهالحياة؟!!
انت:وش عندك تجارة؟!!
والله مشتاق لجديدك..


كم رصيدك؟!!

بيتك اللي تسكنه: في اي حاره؟!!
انت متزوج.. والا خاطب؟!

اسالك: فلان ولد فلان..
اللي فيه ومالا فيه..
من مساويء..من مصايب..
هو بعد لازال حي..؟ .. والا مات؟!!
اوووووه..قبل لاانسى..
تعرف صاحبنا القديم؟
ابو شوشه.. اللي طول الوقت ضايع..
ما يفرّ ق الحلال من الحرام..


بس يفر بهالشوارع..
واشتكن منه الحريم!!
قالوا: تاب!.. ابتسم حظه وقام..
صار مذّن.. لا..واذا غاب الخطيب..

والله يصير الامام!!
ايه..دنيا !!
تدري ياابن الحلال..
مايسبك الا اللي من قلبه...يحبك!!
الا قل لي: وهذا هو اخر سؤال:
امس ..الساعة ثمان..
شفت زحمه..من زمن ماشفت مثله..
بنفس هذاك المكان..
ياترى وش هي السالفه؟!!
لا..لا..مااظنه!!

انا حاضر..مااقول انه يقال..
بس مدري وش حصل..
بعد هذاك ...الجدال !!!

...........

ياحقيقه:وين ماغبتي ..حقيقه
لو رفضك المجتمع ..شانك عظيم

لك مكانه داخل فؤادي عميقه
مؤمنٍ بك ..في ظلالك مستقيم

تحرجين اللي غدا قلبه حريقه
للمبادي ..للشرف ..اصبح خصيم

لاسمع بك يرتبك ويجف ريقه
عقب ماهو بعالم الكذبه : زعيم

ماتركتك ياهنا قلبي ..وضيقه
ماتركتك..رغم ماجاني حليم

كم نساني من هقيت اني رفيقه
وكم خذلني من توخيته نديم

الزمان اللي بلاني في زعيقه
مافهمته لو سمعت انه كريم

اكره الاغراء..والوبد عن طريقه
وافتخر مادام معياري: سليم!

نشرة في القبس الشعبي1986م
............

ديرة..فيها من كل التضااااد...
فيها زحمه..
فيها نقمه
فيها رحمه..

فيها تحديث..ومعاد!
الملل يسكن هنيّا..
والحنق يفرك يديّا..
والتسامح عن خطايانا الصغيره..

صار عاده..
والخلاف حتى لوهو صار واضح..

نجتمع مثل الاخوّه..
لاغدى الموضوع جاد!!

كتبت 1409هـ

.........



ريحة الليل هيل 00وزعفران 00وبخور
ورقصة الحلم نشوى للعمى والبصير

انطفت شمعتين 00وباقي ظل نور
قبل ريح المواجه00سوها يالفقير

خل بينك وبين الموت صورة قبور
لاتردد 00ترى اللي مارسمته يصير

اقطف الزهرة اللي مالمسها الغرور
وافتح الصدر 00عصفورك تمنى يطير

اهـ00يالوحة تبكي مسحها الغيور
والتقطها الصغير من شفاه الكبير

انت وينك00عيوني سافرت للحضور
ماوصلها بهاك اللي خبرته مثير

انتظرتك تجي مثل ماكنت نور
ترتوي هالبيادر من يدينك واسير

اجعل الليل خيل له صهيل 00ونفور
رفرفت بالبيارق00والرعد له خشير










قصيده كتبت وتم نشرها في العدد التجريبي
لمجلة الغدير الكويتيه
التي كانت للتاريخ :اول مجلة متخصصه بالادب الشعبي تصدر انذاك


ظلام اجي لك 00وان نبت بالسماء نور
اخاف واركض للجفاء والكابه

مماجرى 00ناب القلم صار مكسور
والحبر جف من التعب والكتابه

رحلة ضياع البيت خالي ومهجور
في وسط صحراء ماتعرف السحابه

لاجيت اباانسى جيتني همس وشعور
ولاجيت اضمك 00ضم قلبي عذابه

اشق ثوبي وارسل الصوت مقهور
لاواعذاب اللي تردى شبابه

مابين ليل وخوف والثالث السور
تعثرت رجلي طريقك تهابه

وش لون احبك وانت بي جرح محفور؟
هذا البلاء يامن طرحني غيابه!

(يمنع عرض أرقام الهواتف بدون أذن الإدارة)




على رمل النفود انزف00وجلدي لعبة للشمس
اضمد جرحي بجرحي 00واخاف من اللهب والبرد

اصيح من الالم واشكي00ودمعي بالالم ماحس
صدى الصرخه يعذبني 00ودمعي صامت مارد

جلست اضحك على حالي00على جرح بدا من امس
على دمع تبرا من حياتي صاير لي ند

اهوجس:وش بقى وش راح وش اللي مابعد يندس
لقيت اني مع احلامي بدرب به سراب وسد

خنقت الخوف في كفي00لقيت الموت بين الخمس
وغاصت رجلي بالرمضاء وانا بين الرخاء والشد

مشاوير العمر قفت وانا كلي عذاب وهمس
0طفل مولود في غابه00نماء بين الهزل والجد

تلفت00شف زمان الغوج ولا 00صار عمس بعمس
مجاديف النجاة اضحت على الغرقان سيف ارتد

جنون العاصفه حطم ثمار الباسقه والغرس
وهاج الموج ماحسب لميزان الجزر والمد

وانا فيني حنان وعاطفه00لكن تراني شرس
ابا انسف كل مابيني وبينك لانسيت الحد

.......



مثل الذهب 00مهما علا فوقه غبار
يبقى طوال الوقت سلعه ثمينه

ومثل المطر00مهما المطر سال مدرار
لاغاب عام 00صاحوا الناس :وينه!

ومثل البحر غلطان من قال غدار
موجه تساوى لكل طير وسفينه

ومثل اشتياق الام اشتاق للدار
شوق العمى للشوف بصبي عينه

دار سكن فيها السناعيس تنزار
غصب على اللي جاحد في حنينه

دار الشرف والجود 00دار للاخيار
مشاعري وان جيت اعبر دفينه !

للضيف فيها قدر00وحقوق للجار
ماحد ينام ونفس جاره حزينه

طبايع لاهل الجبل كبار وصغار
نفطم عليها وكلنا خابرينه

اقولها00ومهما الزمن جار اودار
حايل مع الايام يزداد زينه !

........



كلمة سفر..
تجعلني في لحظه حزين
واقسى خبر..
لما تقول مسافرين
يعني خلاص:
ابغى اتعذب من جديد
مامن مناص.
لاحول خلتني وحيد
هوا السفر :يعني نهاية مرحله؟
والا قدر ..انا تناسيت اساله..
كل ماتقابلنا سوى.. عشاق ياخذنا الهوى

بالحيل:من بعد انتظار........لليل ..لحدود النهار
طاب السهر..واللي على بالي حضر..
لكنها:كلمة سفر..
تجعلني في لحظه حزين!










دعاني الحظ!!
دعاني الحظ..في غفله دعاني
يقول ارتاح في حظني ثواني

وسطر لك مع الاشواق كلمه
على ماتشتهي..باحلى المعاني

وغاب الوعي والتفكير عني
غريبه..وش بلاهـ اقبل زماني؟!

وانا اللي طاح حظي ماخدمني
طوال الليل بالهوجاس عاني

اغرد للشقاء بدموع عيني
واسولف للثرياء عن حناني

واطالع من سلب عقلي وروحي
تركني وابتعد واختار ثاني

وانا اللي مخلص بالحب وافي
جزا الاخلاص محبوبي نساني

قضبت الحظ في دمي وروحي
.وعزفت احلى نغم للمودماني

لقيت اللي معاه ابني حياتي
بعزة نفس ..سمته واشتراني

وسطرنا سوى: كلمة محبه
على مانشتهي ..جتنا اماني!

......


تلاعب بالغلا باسلوب باهر
غرورك يجذبك لعيون غيري

تنام الليل والمجروح ساهر
يناجي الليل بالدمع الغزيري

ثلاث سنين واعمتك المظاهر
نسيت الود واخلفت المسيري

عشقتك للاسف باحساس طاهر
احسب انك بهالدنيا عشيري

جزا الاخلاص بالهجران شاهر
سيوف الغدر يالترف الصغيري

اشيل الجرح واضحك واتظاهر
سعيد الحال ..والخافي خطيري

دخيلك لاتجيني بعذر قاهر
سفينة حبنا عيّت تسـيري!
...........
رحيق الورد وان قالوا جميع الناس:يازينه
.يطيح من الخجل لاصافحه مدعوج الاعياني

يذوب من الطرى ومن الحلا في لمسة يدينه
ويصبح مثل ماريح العرق في سوق ريحاني

مديح الناس له يمحاه ماقالوه في شينه
قصايد ذم يوم ان الغضي شافوه حياني

الى منه تبسم تبتسم دنياي في حينه
والا منه زعل اشقى طوال الليل سهراني

على شانه ابيع العمر ماشاور عن سنينه
لان العمر هو لحظات فيها منوتي جاني

يناظر لي واناظر له وعيني تحكي لعينه
.مشاعرنا تلاقت ياعلي بالعالم الثاني!
........

ابكي واصوت ياهوى البال:وينك؟
ليتك تجاوب صرخة الميّت الحي

مشتاق لك ودي تعاود حنينك
جعل الموده تجلب لعيني الضي

دامك صغير اغنم حلاوة سنينك
وراع الوشايه لانوى يقربك عي

الموقف اللي صار بيني وبينك
انسه ترى والله مايعتبر شي

عالج جروحي في طراوة يمينك
ترني مريض ولانفع جسمي الكي

سحر الغرام اللي بنظرات عينك
ماظنتي يقدر عليها جبل طي

به جاذبيه شكّلت نصف زينك
قتلت الشهيد اللي توفى وهو حي!

........


وش بقى للفقارا ..لاخذيت القصيد؟
وش بقى للحيارا ..لاادعيت الالم؟

انت: لولا الفقارا ..ماعرفك البعيد
انت..لولا الحيارا..ماكتبك القلم

تسرق الحلم مني وانت ليلك سعيد
اهـ ياحلم ليله..وانت عمرك حلم

اهـ..لامن نطقها المدّعي والطريد
مثل صوم الفقير ..ومن كسته النعم

يرجي العيد عام..وعندك العام عيد
من حلاوة مذاقك ..تشمئز الطعم!

شاعر-ن-عاش بين اسيادها والعبيد
مايفرّق دموع العاطفه.. والندم!

ماعرفت >الجنوبي<طول عمرك بليد
.يوم قالوا امل..انّثت معنى الاسم!

كل يومٍ قصيد..بس شكلك جديد
رغم هذي وهذي..صفقوا: للعلم!

........

اجل :عفت الغزل..واللي يحب بهالزمن دجال
قضت كل المعاني..ماحصل تقضي ماسينا!

انا مثلك ..ومثل اللي سمعنا :من ظهور ابطال
على خد السوالف.. لانوت تسهر ليالينا

رمينا الزيت وسط النار ..وزاد لجيلنا اجيال
توارثنا الجروح سنين..ولا جاء من يداوينا

غزينا..!!..يضحك البارود مسترخي على الحمّال
يبي يشبع من اسراب الطيور اللي تسلينا

حسافه: مادريت ان العرب ماساتهم :موّال
صدح به صاحب المغنى.. وصدقنا اغانينا

حسافه:ماكتبت الشعر باللي جسمها ميّال
.ترقّصنا ..تخدرنا..وعلى التنقيط تغرينا

حسافه:ماقريت الوصف باللي سجّل الاقوال
وصلنا للهدف مرات..لكن: سجّلوا فينا!

خسرنا القدس والجولان..واحوال العرب اهوال
ولاندري وش اللي جاي ياستار تحمينا

تمددنا على ظهور الارايك والبطون ثقال
تريّحنا..وشعوب الارض تصنع لاجل تغرينا

منازلنا ..ملابسنا..اوانينا غدت اشكال
حتى الاسم مانتعب..معاهم بعض اسامينا

عروبة قرن عشناها بلى عزه ولاافعال
وضاعت في دروب التيه والغربه خطاوينا

تفرقنا ..تلاعنا..تعودنا نعيش اطفال
الاتفّ علينا ..من اولنا..لتـالينا!

.......

عشاق العيون!
اشعر ان القلب في معصمك ساعه
يتجه..وين اتجاهك مايكون

واشعر ان البعد عن لاماك لاعه
ياوزين الروح تجرحني الظنون

واشعر ان الصبر قلبي ماستطاعه
والصبر لو طال :ينتابن جنون

واشعر ان الرزق من دونك مجاعه
والعطش يبّس عروق-ن-بالجفون

واشعر ان الكلمة اللي لك مطاعه
لو قست من مبسمك عندي تهون

واشعر ان الزين في غيرك صناعه
مايهز القلب مثلك يافتون

واشعر ان السحر بعيونك وداعه
حطه المولى لعشاق العيون

واشعر اني عايش بسن الرضاعه
في سعاده..في موده..ياحنون

مركب العشاق لاتطوي شراعه
ابتعد بي ..قبل عذالي يجون!
















الورده..والبارود

لاطفال المسلمين في كل مكان..للذين كانت عقيدتهم هي الذنب ..!!

تموت من الاسى البسمه..تصير الدمعه مشهوره
وعين الطفل ماتدري وش الورده..من البارود

نما بين الجثث والظلم..وامُه تحت مقـبـوره
مشى خطوات ..لكنه سـال:ياهل تراها تعود؟!

جلس يتذكر الماضي: اي ذكـرى واي صوره
يبي يفهم وش اللي صار؟..لكن: الفكــر محدود

تلعثم: صوت دبابه..وقف للموت جاء دوره
فتح صدره..وقال :الله..قدامه ثلاث جنود!!

فضيحه:الشرف ينداس..فضيحه تنكشف عوره
ولا نهتم ..ولانجزع..صحيح:احساسنا مفقود؟!!

اجل..وش لون لو كانت هزيمه بلعبة الكوره؟!
تقوم الدنيــا ماتقعد ..مصيبه والجميع شهود!!

الرياضيه:سوالف ليل /1412هـ

.......


سمع..هس:
البيان الاول:
بيان رقم واحد
ابتدا الدرس..
ممنوع التجول..
ايها الشعب المجاهد!
نحن!!.. وبااسم الجميع:
قررنا التحرك
صفق الشعب المطيع:
ياوطن لله درك!
اعلنوها بالاذاعه:
بشرى للشعب المسالم
التهاني ياجماعه:
العريف اصبح ملازم!!

......

قائد الثوره نزع
الحجاب من الحريم
قائد الثوره قطع
اي علاقه بالقديم
قائد الثوره ..عطس!
قائد الثوره ..رفس!
للتقدم والحضاره..مايحق لاي مواطن
يشتغل باية تجاره..او يتملك هالمساكن
غير طبعا:الحكومه.. .. ومن يصف بصفها
الزعيم اليوم يومه.. .. البلاد ..ولفها!!

......
من يناقش..؟
..من يعارض؟
من يهاوش..
من يفاوض..
صار ليله ماهو ليل..
: العميل ابن العميل!
قادوا الشعب بسلاسل..
السجن يشكي الزحام
بين محروم ومناضل..
في متاهات الظلام..
في مت اهـ ات ال ظل ام ......!!!
سمع..هس..
قائد الثوره ..الهمام
.. ياغجر عاوز ينام!!!!!!!!!!


......















اشاره
مهموم وسط حشد من رعيل الزمن الهارب
اظافر خشنه مملؤه قملا
:تنهش جسدي الدامي بحثا عن موقع الالم!!


يمرون من هنا..
يدوسون ظلي ..
اشياؤهم الثمينة تتداعى..
منذ متى؟
من اين؟
......ياايتها الشمس ..احترسي..
هاهي جحافل.....
اشعليني ..امضغي تعبي..
انت وحدك الحارقة..العاشقة..
احتضن الخبز الحافي..
اغسل همي..
وعندما يمارسون النوم:
احمل تعبهم وانزوي!

ياقبلة العشاق:ويني انا وانت وين؟
جيت بوله مشتاق..ابي الهنا ابي الحنين..
فيني بقايا ليل ........يرجي طلوع الشمس
يمسك خفوقي حيل....يبي الدفاء والهمس
خلي عيونك وطن..للي بلاديره..
خليني اسكن بالجفن..ماودي بغيره..
تكفين يابنت العرب
تكفين لاصار الغضب
تبي اللهب عينك..وابقى لها نار..وحطب..
اقطّع يديني..وابتسم!
احرق رموشي وابتسم!
بس لحظه:اتركي عيني تشوف
منظر الفرحه وهي بوجهك تطوف
ومن بعدها..اهـ..
قطّعي جسمي..
صيحي..العبي..
رددي:مات لعيوني..هالغبي!

هم الدهر بي جرّح القلب تجريح
لاواعذابي منه ترجف ضلوعي

تضحك وانا والله يعذر بي اصيح
لاشك عز النفس يمنع دموعي!
........


استيقظي من غفوتك لو دقايق
حسي..تمادي بالغرور ..انعشيني

حيث الغرور للبة القلب لايق
تكفين..لاتشبع من الشوف عيني!

يافرحتي:شبي بقلبي حرايق
خليني انجن..قاطعي..لاتجيني

حتى الجنون اليا لبسني:تضايق
وانتي علامك راضيه تلبسيني ؟!

ياواقعي..ياحلم عندك وثايق
.تدينني..وان طاب لك :فاقتليني

لبيت باسمك عن جميع الخلايق
وناديت لك ..وانتي بعيده..وفيني

فيك احترفت الحب صافي ورايق
وفيك احتضنت المنتهى في يديني

وفيك البراءه جسدتها الحقايق
وفيك الطها ره يا: اماني تزيني

يارائعه محلاك ..عن كل عايق
كلمة>يبه< تحول بينه.. وبيني!!

...........

حلمي ..الواقع!

هلا ياحلمي الواقع..هلا يامسقي العطشان
.هلا يارمزي الغالي..هلا ياقمة احلامي

هلا..من قلبي اللي للمصايب والشقا ء ميدان
وبعدك يابعد حيي تعافا جرحي الدامي

تحريتك سنين العمر..خليت العمر نيشان
تلاعب به صواديف الزمن بقفاي واقدامي

زرعتك داخلي فكره عظيمه جذعها الانسان
وشفتك..قبل لاشوفك خيالك مصدر الهامي

كتبتك في شراييني قصيده ترفض النسيان
ارددها واطالعها طوال الوقت قدامي

وسميتك وانا صادق حبيبي :عبد للرحمن
عسى تطلع طلايع جدي المرحوم..وتحامي

عن الديره عن الايتام عن العادات لاتنهان
عزيز النفس لاتخظع..ولو حدّتك الايامي

انا يابوك رعم اني شباب فداخلي شفقان
ابي تمشي دروبن ماقوت تمشي بها اقدامي

ابي تكمل طريق المرجله لايلحقك نقصان
وابي اسمك الى اطروه..ارز الراس واعلامي

ابا افخر بك الى قالوا :سمعتوا فعلة كحيلان؟
والى منك نويت لشي ..فكّر قبل تنلامي

تبصّر ..وافهم الموضوع ..من كاسب ومن خسران؟
ترى الدنيا سفينة وسط موجن ..والبحر حامي!
.........














انتهى المشوار ..عجل بالرجوع
قلبي المسكين مل الانتظار

ماهقيت اليوم ساعاته تلوع
ياشقى ليله..وياطول النهار

المولع دايما قلبه جزوع
لاتزيده نار ..مايحتاج نار

ازرع البسمه واشعل له شموع
ياعساه يخف..مايرجع يغار

عاذلي يازين للفرقا يجوع
ويتمنى لي على الطول انحدار..............

مبالغه:

صدقيني لو تبين الشمس اجيبه
.وارتمي بالنار وانتي في نعيم

صدقيني انتي اغلى يالحبيبه
من سواد العين والمولى عليم!


..........
تبصر يابعد عمري تبصر
بحال اللي ضناه الشوق منّك

تصبر وارغم القلب يتصبّر
وقلبي ماسلى في يوم عنّك

تحسر قلبي المغرم تحسّر
على ماتشتهي :ماخاب ظنّك

تعذر كل ماجيتك تعذّر
تقارن حبنا ..سني بسنك

مقدّ ر ماجرى والله مقدّر
غيابي سبته من زود فنّك

اسافر وابتعد وانته تكدّر
لزوم اخباري بساعه يجنّك!!


............

ملاحق!!

اقدر انساك بالظاهر ولكن
كيف ابا انساك والخافق معاك؟

اعترف لك لو تزور اقصى الاماكن
اتبعك بسكات ماكني وراك!!


............

كل القلوب اليوم اعماها الطمع
مابه صديق-ن-يسعفك وقت اللزوم
شديت حبل الود -لاشك انقطع
صار الوفاء ياناس مبعد بالغيوم
حدتني الاقدار من يومي ورع
وواجهت الام-ن-تحدى عزم قوم
ادله نهاري وضغط جسمي مرتفع
والليل كله ساهر-ن- ويا النجوم
الناس تحسب وحدتي سبة دلع
.من لاتعرف ظروف حاله لاتسوم
عجزت انا انسى مابصدري متسع
يالله عسى موتي ينسّيني الهموم!


..........

وش يسوي ؟..لو يسوي مايسوي
يبتعد؟..وش عاد مصحوب السلامه

هو حبيبي..صار بالتالي عدوي
غيروه اللي رضواله بالملامه

يوم نوّه يالسلامه مثل نوّي
اتبعه وانصاه واطمع بابتسامه

من نصحني:قلت يالعذال توي
مقبل الايام اسعد في غرامه

احسب انه يتفق جوه وجوّي
مادريت انه تغيّر يالسلامه

بتركه وانساه لوهو بالتروي
من غروره طاح قلبي بالندامه!


..............


تزورني في لذة النوم :واّّّّّعي
ولاجيت اسلم غرني طيف الاحلام

يهزني صوت-ن-مع الليل داعي
يقول من ذاق الهوى غصب مانام

قربك هناي وفي غيابك ضياعي
لاتبتعد يكفي ترى ظيم الايام

ماشفت مثلك من شعوره صناعي
ماتلتفت للي شكى الجرح من عام

وين الوفاء يابو العيون الوساعي
واللي جمع مابيننا :شوق والهام

(.........................)
عسى الهنا يامنية القلب قدام!


.................


من تمنى مصافح يدينك سواي؟
اهـ لو تدري شعوري وش يكون

كل ماعزمت..خانتني خطاي
ارتبك ماقوى اتقدم: ياحنون

اتخيل:كيف لو تجلس معاي؟
لاتكلّم.. بس سلهم بالعيون

وانتبه وشلون تفضحني قواي
العرق ينزف..وقلبي مايهون

تسرع النبضات وتبيّن شقاي
واتعذّب: بين وصلك والجنون

لارجيت القلب ..مايسمع رجاي
ميزتك للقلب ازعاج ..وسكون

يالذيذ الجرح:عجّل في دواي
سو بي ماتشتهي:دامك تمون!

.........


الحب..الاسم!

الحب مثل الاسم:ماهو على الكيف
كم واحد-ن-وده ترى يلغي اسمه!

اما ملل..والا اللقب فيه تزييف
تلقى التناقض بين اسمه ورسمه

مابه خيار:الحب فوق التصانيف
فيه انصهار الوجد :دمعه..وبسمه

مرّه يصير الحب لوعات ويخيف
ومرّه يجي في شكل نشوه..ونسمه

ورغم اتضاحه صعب:يحتاج تعريف
مثل البخت لامال ينقال: قسمه!
















يبه:واللي خلق هالكون ..واللي نزّل القران
اشوفك حي في داخل خفوقي ..طاب منزالك

يبه:ماني مصدق فيك..لكن:قوّة الايمان
الى مني سمعت اسمك..اهلّي وارجي اقبالك

اجي لامي حزين الحال..وامشي شايل احزان
كساها الليل في ثوب الظلام تعيش بظلالك

نظيف اليد..يابيّي..كبير العاطفه ..انسان
بسيط..الا على اللي يغضب الرحمن:وش حالك!!

تجي كلك غضب ماهمك اللي كان او ماكان
ورب البيت ..عشقك للوطن ورّثته عيالك

زخارف هالحياة اللي تغر فلان ولا فلان
ابد ماشكّلت ربع اهتمامك..او على بالك

وشفت بعيني الحب الحقيقي يارفيع الشان
حفيدك قال لي: مدري تعزي او يعزى لك؟!

جميع الناس في لحظه ..لفونا واصبحوا جيران
مشاعرهم عظيمه يايبه..من صدق يدعى لك

من البيت السعودي جت مراسيل العزاء الوان
بعد حيّي هل العوجاء كرام لمنهم امثالك

وحايل..اهـ ياحب سكن في داخل الوجدان
.من الديره ..من القريه..ومن بالباديه جالك

يبه: هذا الفخر للي نظيف..وكادح..وضميان
الا ياكبر طيبك..يايبه: ياطيـب منزالك..

.......

سعف نخله ..بجبل بلطه..يداعبها المطر باحساس
وهدب عينك ..غشاه الدمع..يرسم فوقه مزونه

صحيح :المنظر الخلاب..يغري خافق اقسى الناس
الاشاف ارتوت عين الجبل..تضحك له :عيونه

يموت الرزق..الى من صارت عيون الجبل :يبّاس
وانا رزقي:اذا صارت..دموعك: جاهلٍ لونه

ابيك:الباسم الضاحك..ابيك تشتت الهوجاس
ابيك: لغربتي ديره..حراميها :جفل دونه

ابيك: لحافي وناري..ابيك :بقيظي النسناس
ابيك :لقلبي الشريان..ابيك :لعقلي:جنونه

ابيك..ولاابي غيرك..علي يشهد قوي الباس
دخيلك وسّع الخاطر..حياتي فيك :مرهونه

اضمك لاجفاني الوقت..احسك لااعتراني الياس
حقيقه: من ملك زينك..حرااام الدمعه تخونه

اقوله: وانت لي عزوه..الى شفتك رفعت الراس
والا مني تباطيتك..يصير المووووت:ياهونه!!

.......

طلال:عد الرمث..والفخر..والطيب
في ديرتي..ثم اكتشف روعة الاسم

يامن سرابي في مدى العشق والغيب
شابت سنيني انتظر شوفة الرسم

معلوم احبك..وافتخر فيك..واطيب
لاجيت اصوّت..ينبض بجسمي الدم

في يوم ميلادك..لمحت ............
تراقصت بجبال اجا والمطر عم

ياخامس اطفالي..وثاني ولد جيب
لعيون ابوك اليا لمحت العرب قم

رغم الهزايم..والقهر..والعذاريب
لك فرحة-ن-انستني الحزن والهم

اصبحت كني من رموز الخطاطيب
ماعرف انا للصعلكه والشقاء طعم

طلال:ابيك تميّز العدل والعيب
الدار راسك..لاغدت سالمه:نم!!






















ياالهي ..وانت جاهي..
اغفر لعبدك:ذنوبه
غرتن هذي الحياة..

كم جهلت..وكم عصيت..
وكم تماديت..ونسيت..
وجيت لك ياواسع الرحمه خجول..
جيت كلي..يااغلى من نفسي..ومن لي..

اقسم باسمك..واصلي..
توبه يارب الانااام..ياللي عينه ماتنام..
ياالهي..وانت جاهي..جيت لك قبل الممات..
جيت صاغر..جيت ذاكر..لغافر الذنب التجيت..





هذا ماستطعت ان اجمعه عن هذا الشعر العذب


تحيتي لكم


عبيدالضلع