{{ ديوان الشاعر ميزر بن طواله }}

[TABLE1="width:85%;background-color:black;"]

نائب وزير الداخليه.. بضيافة بن طواله

http://www.b3b7.com/vb/showthread.php?t=61403

بسم ربعـي كلهم..شيـخ وجماعـه=
قمت واصلي علـى راع الشفاعـه
شاعر وبالموجبه مـن دون ربعـي=
اكمـل الماجوب..وحفـظ الوداعـه
وبالمواقيف اصدق الشَعار..شاعـر=
كلمته..تعكـس شعـوره وانطباعـه
ولجل أجمّل شيـخٍ لحفلـه دعانـي=
جيت..ومن الشعر جبت اغلا بضاعه
بجتمـاع الطيبين..ببيـت طـيـب=
من يلوم الشعر لارفـرف شراعـه
مرحبـا باللـي يشرفنـا حضـوره=
عد بـراقٍ سـرا يوضـي شعاعـه
وعد ما هبت(صبـا) نجـد العذيـه=
وعد..من وسط الحرم صلوا جماعه
بالامير (احمد) ..ومن جاء مع سموه=
ياهلابه..وابرك الساعـات ساعـه
ساعةٍ فيهـا حضـر عند(الطوالـه)=
منزلـه بقلوبنا..والـقـاع قـاعـه
الامير اخو الملك..وابن المؤسـس=
من بنى المجـد وتعـلا بارتفاعـه
وحّـد الأمـه..وزال الظلـم كـلـه=
وأصبحت بأمن ورخا..عقب المجاعه
ياعساهـا جنـة الـفـردوس داره=
واشهد ان السبع عقب له اسباعـه
والبلد في عهد (ابو متعـب) تباهـا=
تنعـم بعصـر التطّـور والصناعـه
ومعه(ابو خالد)عسى الصحه لباسـه=
فوق ثوب العافيه..ثـوب المناعـه
الكـرم في(حاتـم الطائي)بوقـتـه=
مير في هالوقت..قلته عـن قناعـه
(حاتمي) هالوقت(سلطان ابو خالـد)=
الكـرم فعلـه..لاوالله مـن طباعـه
جعل مـا نفقـد هذيـك الابتسامـه=
أنـزرع بقلوبـنـا حبـه..زراعـه
والله يعـز الوطن..ويعـز شعـبـه=
والملك..وشعارنـا سمـعٍ وطاعـه
وانت يـا نايـب وزيـر الداخليـه=
عادتك تاقـف مواقيـف الشجاعـه
اخو نايف..محزمـه عنـد الشدايـد=
سيفه..وكفه..وساعـده..وذراعـه
التواضع منهجك..والطيـب ساسـك=
والعفـو مبداك..رغـم الاستطاعـه
ورغم ما تحويه من حلـم وتسامـح=
فيك ..ساعات الغضب حزم وبتاعـه
ومن نوى يعبث بامان الدار خاسـر=
بالخسـاره بشّروه..وفـي ضياعـه
كلنا دون الوطـن فـي كـل حالـه=
نردع الارهاب..واصحـاب اللكاعـه
جنّب (ابو متعب) ليا ميَـل عقالـه=
الوطن ..حنا هجومـه مـع دفاعـه
كـل (حوثي)علموه..وكـل طـامـع=
هذي أرض المملكه..ماهي اطماعـه

قصر الضيافه


http://www.b3b7.com/vb/showthread.php?t=64351

صاحبي ياطول هجرانـك وصـدك=
والمصيبـه بيننـا مابـه مسـافـه
باح سـدي منك..بـاح الله سـدك=
يا محرّك هاجـس الشاعـر وقافـه
وأنت يوم انك ملكت القلب عنـدك=
كيف تجرم به ..وربك مـا تخافـه
تفتكـر مـا تقلـب الايـام ضـدك=
بك غرور..وكبرياء..وبك صلافـه
وان زعلت أقفيت لو ماهـو بـودك=
وكل مـا قفيـت نلحقـك الحسافـه
تستمـع للواشـي وعنـا يـلـدك=
والقلوب السـود ماهـي والنظافـه
جعل من هو دوني اليا جيـت ردك=
قبل يفـرق شملنـا تاكلـه الآفـه
يوم ربـي بالحـلا والزيـن مـدك=
واحد(ن) يصفي معك بالحب صافـه
وكل ماالاشواق والذكـرى تشـدك=
زورني والقلب لك قصـر الضيافـه
وسلم ان مريت لو بصبـاع يـدك=
والتحيه مـن يدك..محـدن يعافـه
يوم لاح البرق..مدري نـور خـدك=
صاحبك ضاع أسنعه.. والدرب طافه
وكان بك من طيب ابوك وطيب جدك=
لا تعرضنـا المتاعـب والكـلافـه
مامضى بالهجـر يكفيـك ويسـدك=
ماحلا لم الشمـل عقـب اختلافـه
يمكن ان طولت هجرانـك وصـدك=
بيننا يا خوفـي أتطـول المسافـه

يادغيم!!


http://www.b3b7.com/vb/showthread.php?t=64908

بالعرب حاسد..وبين العرب محسـود=
وفيه ابو نيه..وفيه ..ابو وجهينـي
وناس تخشى القصور..وكلمة المنقود=
وناس ما يعرفـون السلـم والدينـي
وفيه بالناس..ناسٍ ما وراهـم فـود=
عنهم..وغيـرهـم.. يالله تغنيـنـي
ياكريمٍ جواد ان قلّـوا اهـل الجـود=
رازق الاغنيـاء هـم والمساكينـي
يالله افرج لي انت الواحـد المعبـود=
تعـلـم السر..وبـهـمٍ مخاويـنـي
واكثر الناس حاله بين نقـص وزود=
لكـن!! اااالله ولاحـال المحبيـنـي
والهوى مشكله..ياهل القلوب السود=
جعـل يبلاكـم اللـي فيـه بالينـي
قالوا اصبر..ترى تال الصبر محمود=
ووالله اني صبرت شهور وسنينـي
مثل صبر الاسير اللي بيـده قيـود=
ظلم مسجون..من ضمن المساجينـي
حول عشرين عام وفوقهن موجـود=
في سجون اليهود..وهـو فلسطينـي
حالتي مثل حاله..والصبـر محـدود=
ضاقت الارض..يابو زيد في عينـي
يادغيم وانا اللي بالزمـن مضهـود=
جايـر الوقـت متعبنـي ومشقينـي
وش نهاية هوانا..مع نعيـم العـود=
باهي الوصف هو سيـد المزايينـي
بيني وبينه اسرار..وعهد..ووعـود=
وغيره من العـرب ماعـاد يعنينـي
اعشقه.. وذكره لاهب ريـح النـود=
خالـط الـدم حبـه فـي شرايينـي
سبعة اعوام راحت..والعمر معـدود=
مالقيـت الطريـق اللـي يوديـنـي
ان مشيت الطريق.. الياخره مسدود=
وان تراجعت ..مالت بـي موازينـي
وجيت يمك حزين وخاطري ملهـود=
كنـي الطيـر مكسـور الجناحينـي
وانت من نعتزي به في نهار الكـود=
مسنـدي لاحدانـي وقتـي الشينـي
من رجالٍٍ تبين ان حك عـود بعـود=
تعـرف افعالهـم وسـط الميادينـي
خوذ في خاطري..وبذل معي مجهود=
وسـط سجـن التعاسـه لاتخلينـي
ما نقول احتزم بالسيـف والبـارود=
كلمـةٍ منـك بالمعـروف تكفيـنـي
وكان حبل الشقا يا مسنـدي معقـود=
منكـم الـرأي يقنعني..ويرضينـي

مــن صــريــح الـبـــــوح . .

http://www.b3b7.com/vb/showthread.php?t=82868

اغتنـم وقتك..وخـلـك بالـصـداره=
والفرص..مره تـرى بالعمـر تأتـي
واترك الماضي .. ولو تنفض اغبـاره=
ماترجـع شــيء بـالأيـام فـاتـي
وكـان تطلبنـي بعـد زود استشـاره=
أحذر.. من اهـل النوايـا الباطلاتـي
وأستمع للـي بـدا فـي راس قـاره=
يزبَـن عـن الهـم روس النايفاتـي
شاعر..ووقتـه عليـه ألفيـن غـاره=
شنـهـا..والله علـيـم الخافيـاتـي
هيه يامن..كـان ظالـم فـي قـراره=
قلبـك اللي..لايـحـس ولا يحـاتـي
كـل حلمٍ..خـان فـي ليلـه نهـاره=
وانت ما حققـت لـي ربـع امنياتـي
بيننـا مقـفـول يـابـاب الـزيـاره=
وأبلـغ التعبيـر تـقـراه بسكـاتـي
وياكبـر جرحه..وياطـول انتـظـاره=
قلبـي اللي..ماسمـع منـي وصاتـي
غلطته..صار ليـدك رهـن الاشـاره=
وانتي..الله منـك يكتـب لـه نجاتـي
ليت مـا كنتـي..ولا كـان اختيـاره=
وياعسـى الدنيا..تسويبـه سـواتـي
من كوت قلبي ..ونـار الهجـر نـاره=
كنهـا بالهجر..تسعـى فـي مماتـي
ماسبـا حالـي..ولا سبـب دمــاره=
غيرها..وان مت هـي سبـة وفاتـي
ارحلـت للبعد..وأقفـت عـن ديـاره=
وتركتني..للغـيـاب..ولـشـتـاتـي
علموهـا ان الهـوى مابـه شطـاره=
طـوع الابطـال عنـتـر والزنـاتـي
والزمـان يدور..ويغـيَـر مـسـاره=
والليـالـي مقفـيـات ومقـبـلاتـي
ومنزلـه بالقلـب مسمـوكٍ اجـداره=
لوريـاح العـذل هـوج وعاتيـاتـي
اشهـد ان فراقـك وبعـدك خـسـاره=
فادحه..يـأم العـيـون الناعسـاتـي
واشهـد انـك بالجمـال وبالنـظـاره=
طاغيه..وأحرقتـي كـروت البنـاتـي
تجمعيـن الباديه..هـي والحـضـاره=
بالمزايا..والـوصـوف الفاتـنـاتـي
وكل وصفٍ فيـك لـه سحر..واثـاره=
يسرق الأنظـار مـن كـل الجهاتـي
ومن صريح البوح..لك صدق العبـاره=
قلتها والكـذب ماهـو مـن صفاتـي
والله انـك وسـط قلبـي بالـصـداره=
وحبك.. أصدق حب عشته في حياتي

البورصه

http://b3b7.com/vb/showthread.php?t=58392

لا يا صديقي..من زمـان الطفولـه=
بيني وبينك حلـو الأيـام راحـت
كني ب..دوله..وأنت عني بدولـه=
لاوالله الا دلـة الهـجـر فـاحـت
وانا مـع الأيـام لاخـذت جولـه=
ذكرت شي..ودمعة العيـن طاحـت
دارت بنا سـود الليالـي عجولـه=
والنفس من زود العناء ماستراحت
واليـوم مـا باقـي كـلامٍ نقولـه=
باح الكلام..وكل الاسـرار باحـت
واللي عليه القلـب زايـد ميولـه=
وينوح نوح اللي..من الورق ناحت
غايب.. وله بالفكر جوله وصولـه=
وأن حاف قلبي..عنه الأحباب زاحت
ابـو عيـونٍ ناعسـاتٍ خجولـه=
ذكراه..فكري والشعور.. إستباحـت
غرو (ن)..خذا بالزين تاج البطوله=
كن البروق بوجنته.. يـوم لاحـت
عندي غلا غيره..ليا شفـت زولـه=
يطيح مثل البورصه..يـوم طاحـت

عـنـدما تـتـجـلا مـعـادن الـرجـال !!

http://b3b7.com/vb/showthread.php?t=83108

ياهيه ياللي لك سنـه توقـد النـار=
عساك فيها يـوم تصبـح سعيـره
انا احسبك صاحب وفي ..وأنت غدار=
تمزعـت عنـك الثيـاب الستيـره
من ينقـل النمـات خايـب ومكـار=
يفَرق بها بيـن العشيـر وعشيـره
اللـي ليامنـه حكـا زاد الاخبـار=
يـزود وينقَّـص ويظلـم ضميـره
شجاع بالمجلس...كـذوبٍ وجـوار=
وابليس في كل السوالـف خشيـره
في كذبته يفر بـك سبـع الاقطـار=
لو ما غـزى قـومٍ ولا مـر ديـره
وانت اكثر اعلومك طويلات واقصار=
متحيزم (ن) ما شفت بالامر خيـره
والسالفه ما بين عميـان الابصـار=
كبرتهـا والا السوالـف صغـيـره
من سمع هرجك قال فارس وبيطـار=
وحنا الجمل نعرف رغـاه وهديـره
لنا مع اهل العرف مـارد ومصـدار=
يوم انت مالك مع هل العرف سيـره
لا تعتذر ما عـاد تنفعـك الاعـذار=
راحـت عليـك الاولـه والاخيـره
وبالكذب لو تبني عمـارات وادوار=
ترى حبال الكـذب دايـم قصيـره
لابـد مـن يـومٍ توطـاك الاقـدار=
لا مرتـك خيـل المنايـا امغيـره
والكذب ما ينجيك لاصـار ماصـار=
بيومٍ يهول النـاس لاهـب سعيـره
وترى الولي يعلم خفيـات الاسـرار=
يسمع . . ويبصر ياضعيف البصيره
وان طعتني خلك عن السكه ايسـار=
وتكفـي العصفـور حبـة شعيـره
ترى مواقفنـا علـى مثلـك اكبـار=
تكود . . ودروب المراجل عسيـره
والوقت يحفظ فعل وافيـن الاشبـار=
اللي يدوسـون الـدروب الخطيـره
ما تختفي ذكرى بعيديـن الاذكـار=
لا مـر طاريهـم يفـوح بعبـيـره
للخيل خيالـه . . وللشعـر شعـار=
اهل الوفاء واهل السيوف الشطيـره
واللي عليك . . الصبر يا موقد النار=
باكر تشوف عيونـك المستديـره !!

مصافحه اولى
الزمـن تسكنـه ذكـرى بعيديـن العـلام

http://b3b7.com/vb/showthread.php?t=56691

الزمـن تسكنـه ذكـرى بعيديـن العـلام=
وان حكا عنهم سقا الغيث طاريهـم بديمـه
والوفاء والصدق من شيمة النـاس الكـرام=
طبـع صافيـن الضماير..قوييـن العزيمـه
والفراق يدمّـر الحـب لامـن طـال عـام=
والجفا والصـد لازاد عـن حـده جريمـه
وأنتي اعـذارك كثيـره يازاهيـة الوشـام=
وكيف انا منك أقبل العذر.. وضلوعي حطيمه
يعني تو..يجيبك الشـوق ملعـون الرسـام=
والله انه ما بقا بالسمـاء للشـوق غٍيمـه
عقب سبع اسنين جيتي...على الدنيا السلام=
البقابك..كـل الاحـلام ماتـت ياحليـمـه
ما بقـا فـي خاطـري لاعتـاب ولامـلام=
يوم طاف الوقت..ما للعتب واللـوم قيمـه
أغربت شمس الهوى..واسمعي صدق الكلام=
لا تصحيـن الهواجيس..وجـروحٍ قديمـه
قالت: ادري مـا بقالـي مكـان ولا مقـام=
عقب ماني وسط قلبك..وبعيونـك عظيمـه
كنـت غلطانـه وصدقـت عـذال الغـرام=
وأنت تـدري بالعـواذل شياطيـنٍ رجيمـه
قلت:عذر اقبح من الذنـب ياظبـي العـدام=
من رضى بالظلم يدخله في بيـت الظليمـه
كيف؟ طاوعتيبي اهل الهـروج العـوج دام=
تعرفينـي معـك وافـي ونياتـي سليمـه
قالت:وفـي خدهـا سـال دمـع الانهـزام=
يا حبيبي كيف ترضا علـى مثلـي هزيمـه
والله انـه عقبـك النـور بعيونـي ظـلام=
لاتخلينـي وترحل..ولـك ذكـرى مقيـمـه
كان بـك حـب التسلـط..وروح الانتقـام=
شوف منظر دمع الاشواق بعيـون اليتيمـه
قلت:لاتبكيـن..لا يغـرق الدمـع اللـثـام=
واحدن ما يهـزه الدمـع بعيونـك بهيمـه
لكن!! الدنيا واهلهـا لهـم شـرع ونظـام=
فكري..بظروفـك اللـي عواقبهـا وخيمـه
قالت: ارجوك اسمع العلم.. لايطول الخصام=
يا حبيبـي مـد للوصـل يمنـاك الكريمـه
لا تخليني كذا...وانت مـن نـاسٍ احشـام=
ما يبيحون السدود..وبهـم نخـوه وشيمـه
ودي اسهّـر عيونـك ليالـي مـا تـنـام=
وضحكت..والحب يهـزم قوييـن الشكيمـه
قلت:يازين التواصيف.. طير الشـوق حـام=
لازم يضيع الذي بالهـوى مثلـك خصيمـه
كيف اقاوم حسنـك اللـي يثيـر الاهتمـام=
والعيون رموشها تجـرح القلـب وتضيمـه
ياسقـى الله قصـة الحـب الاول والغـرام=
قبل يكشف سره اهل الحسد واهل النميمـه
علـم كنـه حلـم مـر ومفسـرة الحـلام=
حار فيه المبصر..وحار ابو عيـنٍ كريمـه
قالت:أنـت أتحبني؟قلت:انـا هايـم هيـام=
ووجودي يوم ريح الصبـا ذعـذع نسيمـه
ماتهون العشـره الا علـى عيـال الحـرام=
والجفاء والصد لازاد عن حـده جريمـه

يـابـو قـذلةٍ هلَــــه ..
http://www.b3b7.com/vb/showthread.php?t=92259

غبت وأشغلتني حسبـي عليـك الله=
ياحبيبٍ بنصـف الـدرب خلانـي

طاف ثالث شهر ما شوف لك طلـه=
كيف تقدر على بعـدي وهجرانـي

وين قفيت؟ وأنـت الفكـر تحتلـه=
ما توقعت انا فـي يـوم تجفانـي

ويـش غيّـرك يابـو قذلـةٍ هلـه=
يمكن أعماك هرج افلان .. وفلاني

أول أخطي عليك..وتدمـح الزلـه=
ما تشوف الخطأ يوم أنت تهوانـي

كنت خل(ن)صدوق ويشفـق لخلـه=
وكنت نور(ن) يشتت وحشة أحزاني

وكنت سر(ن) واخاف الناس تفطله=
أحفظك في سماء فكري .. ووجداني

وكنت بعيونك اشـوف الغـلا كلـه=
وكنت تشتاق وتضحي على شانـي

لكن!! اليوم أشوفك صابتـك علـه=
كل ما جيت فـي دربـك تعدانـي

صح بعـض الاوادم مالهـم ملـه=
أخر الوقت.. تذكرنـي.. وتنسانـي

صعب مثلـي تعـذب فيـه وتذلـه=
روح وقّف هناك بصـف عدوانـي


وكان ذكـرى هوانـا مرّتـك قلـه=
صاحبي بعد نصف الدرب خلانـي

الــرســــــــا يـــــل . .

http://www.b3b7.com/vb/showthread.php?t=93216

من غلاه أرسل على رقـم جوالـه =
والرسايـل صاحبـي مـا يعبرهـا

ياسعد سبحان مـن غيـر أحوالـه =
إختلف..واخلف ظنونـي وغيرهـا

شايفه عقـب البطا..سالـيٍ دالـه =
وكل ذكرى..راح ماعـاد يذكرهـا

يوم كل(ن) راح في دربـه إلحالـه =
يمكـن الدنيـا خذتَـه بمظاهرهـا

والظروف وجاير الوقـت وأهوالـه =
تخلـف ا قلـوب الاوادم وتجبرهـا

وادري الفرقـا صعيبـه وقتـالـه =
تقتـل كبـار الآمانـي وتقبـرهـا

مار انا..معقول!! ماطري على باله =
كيف ينسانـي؟ ونفسـه مصبرهـا

أحسبه بالحب يمشـي علـى فالـه =
لين معه طيـور الاشـواق طيرهـا

ياسعـد ربـي يجازيـه بفعـالـه =
ترقد عيونه // وعينـي مسهرهـا

والا انا عقب البطا.. مالـي ومالـه =
أدفـع الرجـل لدروبـه وسَيرهـا

الصحيح //أجوع له شوق وأضماله =
تمشـي الاقـدام والقلـب يامرهـا

غصب عنـي يـوم اروح اتعنالـه =
الله يكـفـر ذنـوبـي ويغفـرهـا

كل ما قلت أتركه واقطـع احبالـه =
غزت الذكرى.. بقلبـي خناجرهـا

أشهد ان الحب باقـي علـى حالـه =
بالقلوب// وبالنفـوس ومشاعرهـا

وأشهد انه داخـل القلـب منزالـه =
يبنـي اقصـور الغـرام ويعمرهـا

ما سقط حكمه // ولا طاح تمثالـه =
بالغلا كـل المشاعـر محاصرهـا

وله شعوري.. واعذب الشعر يزهاله =
فيه صعبـات القوافـي مصخرهـا

الله يهنيـه // ويحـقـق آمـالـه =
ويسقي أرضٍ داج فيهـا ونورهـا

لا يخلينـي كـذا !! حالتـي حالـه =
جعل تفداه القصيـده.. وشاعرهـا

[TABLE1="width:95%;background-color:black;"]

[TABLE1="width:95%;background-color:black;"]

[TABLE1="width:95%;background-color:black;"]

[TABLE1="width:95%;background-color:black;"]

[TABLE1="width:95%;background-color:black;"]