من قصص تريترا العجيز الشمطاء

هذه قصة من قصص تريتراء اللي يسولفنه عجزنا علينا سابقا،وهي في الحقيقة من تأليف أحدى الأخوات في منتدى ما وهي كبيرة في السن ومثل ماتقول هي راويةالمنتدى هناك يعني السالفه فقس وتسذب لاتخلو من الدراما التخويفيه ههه ،وأنا نقلتها بدون تعديل ولا حرف .
بس من أجل تذكر الماضي واللي خواف لايعتب الموضوع مراعاة لمشاعره خخ <<<حاسه ماراح يفهمون الحتسي هههه اللي حضري لايتعب حاله خخ فديتكمــ

ــ ــ ــ ــ ــ ــ ــ ــ ــ ــ ــ



اخواني واخواتي سمو بالله قبل تقرون للحتيااط من تريتراء

آآآآآآآيه ياطويلين العمر

القصه هذاي راح تذكركم بيومننا صغار..يفضخن قلوبنا هالعجز بسالفه تريترا ((الله العليم تريترا حديهن ))

(((الله يخلي لي جدتي)))

ياويلكم جاكم العوييي نامووووووووووو


القصه::

هك السنة العرب مربعين ومعينين خير ومستانسين والحلال يبرك الضحوية من كثر العشب.

ودك انك بس تصنت لأم سالم بهك الريضان.وام البهم ماخلت طبعها ماغير تزورق بينهن والورعان

يطاردونها هذا طبعهم بعد ، وخطات راعى يومى بشوشته لياهلحين يضحك عليه ملهى الرعيان وتضيع

غنمه بسبة طوير.

وهك النهار سواريح الغنم مدوا بحلالهم وعزلوها جلد و رغث وعزلوا بهمها وساقوها مغير تسمع أجراس المراييع وعجتها للسما.

واهل البل اللى نياقهم قريبة راحوا يشوفون اباعرهم و يدورن الصبوح .

أما اللى يطردون حرش العراقيب ويعطونهن على هواهن هم اللى عايشين صحيح .

وفيه رجاجيل على شبة الشيخ مجتمعين ولهم لجة وقدامهم دزقه عيال حاطين نيشان ويثورون . مدرى لو اللجة على شانهم.

وحريمهم من حليلهن ماغير تشوف عبيهن تتطارخ من الهوى , هذى مسيرة وهذى موديتن غريفة لجارتها وهذى حطابة وهذى رواية ..

وفيه ثلاث بنيات وحدتن منهن عرجا المسكينة راحن يتسابقن يم الغدير , تراه مسافه بعيده.. هناك عن

اهلهن وهن يلعبن ويضحكن ومكيفات باالما الا وتجيهن ذيك العجوز وتسلم عليهن وتحبهن وتقوم تلعب

معهن مرة تسوى نفسها فرس لهن ويركبنها وهن لهن ضحك ومرة تسويلهن زغيلبه (تشقلب) ...ومرة تسويلهن نطو الرفلا.

سألتها وحدة من البنات عن أسمها

قالت أسمى تريتره عمتكن تريتره

يوم شافتهن أمنن لها.

قالت لهن : يابنياتى ليه ماتسيرن على وتدلن بيتى أنا عجوز مسيكينة ولاعندى بنات ويومنى شفتكن حبيتكن عدكن بناتى.

وحدة منهن عيت وقامت تعذر

قالت تريتره: يابنياتى ودى أسويلكن عشا وعندى تميرات شايلتهن للغالين مثلكن وبيتى تراه قريب حيل , شفتن هك الجال .......بيتى وراه.

وافقن وراحن معها .. يوم تعدن الجال .

قالن : وين بيتك ياتريتره

قالت : ورا هك الجال هذاك

وتعدنه

وقالن : وين بيتك ياتريتره

قالت : ورا الجال هذا

وجال ورا جال ليما تعبن من المشى وبغن يرجعن

قالت لهن تريتره : يابنياتى مابقى عليكن شى , وصلنا , هذاك بيتى أشوفه ورا هك الجال وان مطلع حتسى صحيح ابد ارجعن وتراكن معذورات .

المهم انهن طاعنها ورقن الجال وشافن بيتها وتدحدرن يمه الله يجيركم الشوفة القشرا يوم شافن بيتها

الا رواق البيت مسويته من جلود الاوادم والاطناب مودعتهن من قصبان والاوتاد من عظام الاوادم و البيت من شعر البنات

التفتت تريتره عليهن وهى تمطق ............ وقالت:

مسكتكن ياالملعونات بغيتن ماتجن و تحرمنى عشاى أنا ووليدى مير جابكن حظى لى شهر ماذقت لحم الاوادم.

وهى تنقلب صورتها سعرة (جنية).... لياجلدها أسود مثل الصاج وعيونها مثل الجمر وشعرها تقل تسدادة

وسنونها حديد ويتطاير منها هوايش شى يزحف وشى يطير شى مثل الدود وشى مثل العقارب وشى مثل الذبان .

صاحت تريتره تصوت لولدها وهو يجى الا شكله أقشرمن شكل أمه لكنه صغير و طوله بطول البنات .

قالت تريتره لولدها: أسمع أنا سنونى مصديه مايقطعن من بطا اللحم أباروح أسنهن وارجع أنتبه على عشانا لاينحاشن منك عفيه وليدى سعران.

راحت تريتره تسن سنونها وبقن البنيات مع ولدها يحرسهن.

المسكينات غدالهن صياح ويبتسن ولهن نحيب

قالت لهن العرجا: ياخوياتى ما ينفع البتسا وش الحيلة وشلون ننحاش ؟

ماردن عليها ولا هن يمها ماغير لهن مشاهق من البتسا ومن الخوف منفضختن قلوبهن .

فكرت العرجا لحالها وقالت مالها الا الذهانة بعدين قربت عند ولد السعرة وقامت تحسي عليه وهو له ضحتس وصوته تقل رغا حاشى .

ماهمها طيرة شلوى وقامت تسولف عليه وتعطيه من التسذب الا ان سكت وقام يراددها بالحتسى .

وقامت تبرق وتمرش بكلامه وتروز عقله عرفت ان ماش ما بالحمض أحد وانه دبشه .

قالت له : سعران ما اشوف فى بيتكم حطب و شلون تطبخون بليا حطب .

ياويلك يا سعران ان جت امك وشافتك منت حاطب .

قالها : صحيح بس وشلون أروح وأخليكن أخاف تنحاشن

قالت وين نولى وأهلنا بعيد ولاحولنا والى وناشبته الا ان صدقها و أقنعته انها تحرس البنات بداله وأخذ فاسه وراح يحطب

يوم شافنه ابعد كل وحدة عضت شليلها وانحاشن

وهن لهن ركض وركض وركض والعريجا وراهن ماتقدر تلحقهن ..تصيح وتنخاهن ولها صياح :

ياخيااااااتى أتننى يا خيااااااتى لاتخلنى اتنني

وهن ماهمهن سبقنها وخلنها وراهن .

جت تريتره ودرت انهن انحاشن وهى تطلبهن لها جمح. ما تسمع الا وحيفها ليا مرت بجنب شجرة او قشعة

يوم قربت عند العرجا التفتت العرجا الا وتشوفها وراها. درت المسيكينه ان السعرة تبى تلحقها وتطرحها .

الا ويجيب الله ذاك الجحر بطريقها كنه مراغة ضبع وهى تنجحر به .

وتقوم تريتره تحفر الجحر .

مروا بها ناس واجد وهى تحفر وكل يسالها

ياتريتره وش تحفرين

تقول : أحفر ضب ماله رب ولاله عكرة تقضب

مروا بها أهل المجاهيم . ياتريتره وش تحفرين

أحفر ضب ماله رب ولاله عكرة تقضب

مروا بها اهل المظاهير . ياتريتره وش تحفرين

احفر ضب ماله رب ولاله عكرة تقضب

مروا بها أهل المغاتير . ياتريتره وش تحفرين

أحفر ضب ماله رب ولاله عكرة تقضب

مروا اهل الشياه . ياتريتره وش تحفرين

أحفر ضب ماله رب ولاله عكرة تقضب

مروا بها اهل العقيلات. ياتريتره وش تحفرين

أحفر ضب ماله رب ولاله عكرة تقضب

مروا بها اهل الخلا . ياتريتره وش تحفرين

أحفر ضب ماله رب ولاله عكرة تقضب

ماطولها عليكم مروا بها أهل الوضح والشقح والحمر والصفر وألوان البل كلها وردها واحد

وهناك

مروا بها أهل الخيل . ياتريتره وش تحفرين

قالت:احفر ضب ماله رب ولاله عكرة تقضب

سمعت العرجا الصوت وعرفته هذا صوت اخوها تخبره غزاى من حروة شهر .

و صاحت بطول صوتها

لاوالله ياخييى تحفرنى .. نخيتك لابتسيتك ياخييييى فكنى

انتخى وانثنى عند اخته شوق المخبيات بنات الشيوخ

سحب سيفه وضرب تريتره لهو مطير راسها

حضن خيته و حت التراب عن قصتها وحبها على راسها وارد فها على الفرس.

وقام يهيجن وهى ترد عليه:

أشرب الما وكن يرده عود ......... وأتقلب وكنى على ملة
عريجا ما يقربتس كود مقرود .............. أدفعه للموت يزتله

والصحيح ترون تريترا لها علوووم كثير بس هالقصه هي اشهر شي...

وسلااااااااااااااااااامتكم

التفتت تريتره عليهن وهى تمطق ............

<<<كرعش جلدي من الخرعة
هههههههههههههه
يسلمو شموخ على القصة
من جد جد روووووووعة
ياحبي لها تريترا

ههههههههههههه

يارب تخلي لنا جداتنا ع القصص الروعه




يعطيك العافيه ع الفرفشه

والله وانا في صغري كنت اموووت بالقصص اللي زي كذا كانت جدتي رحمها الله تعالى تقص علي مثل هذي القصص اغلبها مشوقه وبعضها مرعبة
ومن ذاك الحين وانا احب الافلام تذكرني بتلك القصص ولاكن الفرق الان بالصوت والصوره
مثل سلسلة افلام هري بورتر

ربي يخليكي والله ذكرتنيني بزماااااااااااااان

ياااااااااااااازين ذا الهرج ،،

قرأتها بس عشان أعرف أكثر للهجتكم ،،

عجوزنا هههههههههه أقصد شموخنا الشمرية الأصيلة

يعطيك ألف عافية على الديزني لاند الشمرية

استمتعت كثيير بالقراءة

تحيتي

فاصلة بيضاء

اقتباس المشاركة الأصلية كتبت بواسطة فاصلة بيضاء ياااااااااااااازين ذا الهرج ،، قرأتها بس عشان أعرف أكثر للهجتكم ،، عجوزنا هههههههههه أقصد شموخنا الشمرية الأصيلة يعطيك ألف عافية على الديزني لاند الشمرية استمتعت كثيير بالقراءة تحيتي فاصلة بيضاء

يالله حي هالخشه المختشه هههه
وه ياملي تعالي عندي ابد ماتطلعين الا انتي ماجستير لغة شمريه ومعه شهاده شرف ههه

لاتعودينه وشو عجوزنا ما ر خليتيني عجيز محطتك العافيه

نورالدنيا ..منوره ياخيه تمنيت انها صوت وصوره عشان تزين السالفه <<وش ناويه عليه خخ

منوره على هالطله يالغاليه

نبرة حزن.. الله يخليلك جديدتك ويطول عمره مار خليه تكثر لك من هالسوالف وانتي بس افتحي كشرتك واستانسي خخ

طروادا.. ياخيي مار الله محييك وابشرو بالجديد يمكن أألف لاتستبعدون وه بس

اقتباس المشاركة الأصلية كتبت بواسطة #شموخ شمر# نورالدنيا ..منوره ياخيه تمنيت انها صوت وصره عشان تزين السالفه <<وش ناويه عليه خخ منوره على هالطله يالغاليه نبرة حزن.. الله يخليلك جديدتك ويطول عمره مار خليه تكثر لك من هالسوالف وانتي بس افتحي كشرتك واستانسي خخ طروادا..يوم شفت اسمك قلت غريبه هههههه احسك مانت حول هالسوالف ياخيي مار الله محييك وابشرو بالجديد يمكن أألف لاتستبعدون وه بس

انا جدتي شمرية ...الله يرحمها ويسكنها فسيح جناتة
شو علابالك اي انا حضري وعشت كل حياتي حضري بس جذوري قبلية ..

والله والنعم فيك ياخوي طروادا ولاقلت حضري والعفو فهمتن غلط وانا اختك .

طروادا والله جدتك شمرية؟؟!
والنعم والله بس اول ماجيت للمنتدى احسبك مصري
<<<<خربتها

سوري شموخ

الله عليك شموخ شمريه ذكرتينا بالماضي ( تريترا ام ترتور) كانو يسمونها كذا ومرت علي بصغري سوالف تريترا وكنا ننام قبل تخلص السالفه

تسلمين يالغاليه

سلمت الايادى التى كتبت وسلم القلب الذي لايتنكر لماضيه

اقتباس المشاركة الأصلية كتبت بواسطة ابوحاتم الخريصي الله عليك شموخ شمريه ذكرتينا بالماضي ( تريترا ام ترتور) كانو يسمونها كذا ومرت علي بصغري سوالف تريترا وكنا ننام قبل تخلص السالفه تسلمين يالغاليه سلمت الايادى التى كتبت وسلم القلب الذي لايتنكر لماضيه

الله يحيك ويسلمك ياخوي هذا الواجب حفظ التراث <<اجل تريترا تراث هههه

وان شاء الله نجيب لكم من العلوم والسوالف التاريخيه الجميله لنه كنز ولازم نحافظ عليه لايتطشر ههه

مشكور على المرور ياخوي وكلامك اعتز فيه

ما ضيعن إلا تريترا

يعطيك العافية

اقتباس المشاركة الأصلية كتبت بواسطة الراقي نت ما ضيعن إلا تريترا يعطيك العافية

الله حي اخوي الراقي دائما ياملا البعد ياتريترا ماخلت احد الا ضيعته
مشكور على المرور

ههههههه

تسلم يدينك يـآلغ ـلآ