الجوهره

نار الطموحات مس القلب صاليها=النفس البي طلبها يوم واعصاها
لي حاجةٍ يشغل الخفاق طاريها=استوطنت في صميم القلب رجواها
الجوهرة غاليه والكل يغليها= لكنها كايدة للي تمناها
ادلجت هجن العزايم في حراويها= من كثر شوقي لها خفت اتعداها
اسعد بها حلم واملكها واخفيها= واشقى بهاعلم واخشى الناس وارعاها
اشيلها هم وآخذ وجد واعطيها= واسري لها الليل واروى شوق واظماها
اكتب لها بيت شعرٍ هايمٍ فيها=واصبها كيف عاشق واتقهواها
ارسم جسور الأمل بالفكر وابنيها= واغير الخارطه وأهد مبناها
احلى القصايد على المقصود اغنيها= واحلى المشاوير ما وصلني حماها
ابيع غير الكرامه بيع واشريها = اعاند ظروف وقتي واتحدها
اعلل النفس واقنعها واهديها = من روعها اللي عثا فيها وعناها
بانت نجوم السما لعيون ساريها= لولا ظلام الليالي ما نظرناها
ياحادي العيس لالا ماانت حاديها= قدامك دروب ما تعرف خفاياها
ارجوك تعطي سهام القوس باريها= من كان له صنعةٍ لابد يهواها
ما همني ناس تسبقني بامانيها = طلابة الهون ما تغفر خطاياها