عـنـدما تـتـجـلا مـعـادن الـرجـال !!

ياهيه ياللي لك سنه توقد النار=عساك فيها يوم تصبح سعيره
انا احسبك صاحب وفـي ..وأنت غدار=تمزعت عنك الثياب الستيره
من ينقل النمات خايب ومكار=يفَرق بها بين العشير وعشيره
اللي ليامنه حكا زاد الاخبار=يزود وينقَّص ويظلم ضميره
شجاع بالمجلس...كذوبٍ وجوار=وابليس في كل السوالف خشيره
في كذبته يفر بك سبع الاقطار=لو ما غزى قومٍ ولا مر ديره
وانت اكثر اعلومك طويلات واقصار=متحيزم (ن) ما شفت بالامر خيره
والسالفه ما بين عميان الابصار=كبرتها والا السوالف صغيره
من سمع هرجك قال فارس وبيطار=وحنا الجمل نعرف رغاه وهديره
لنا مع اهل العرف مارد ومصدار=يوم انت مالك مع هل العرف سيره
لا تعتذر ما عاد تنفعك الاعذار=راحت عليك الاوله والاخيره
وبالكذب لو تبني عمارات وادوار=ترى حبال الكذب دايم قصيره
لابد من يومٍ توطاك الاقدار=لا مرتك خيل المنايا امغيره
والكذب ما ينجيك لاصار ماصار=بيومٍ يهول الناس لاهب سعيره
وترى الولي يعلم خفيات الاسرار=يسمع . . ويبصر ياضعيف البصيره
وان طعتني خلك عن السكه ايسار=وتكفي العصفور حبة شعيره
ترى مواقفنا على مثلك اكبار=تكود . . ودروب المراجل عسيره
والوقت يحفظ فعل وافين الاشبار=اللي يدوسون الدروب الخطيره
ما تختفي ذكرى بعيدين الاذكار=لا مر طاريهم يفوح بعبيره
للخيل خياله . . وللشعر شعار=اهل الوفاء واهل السيوف الشطيره
واللي عليك . . الصبر يا موقد النار=باكر تشوف عيونك المستديره ! !