لا وغلاتـك

لا وغلاتـك مابقـى بالسمـاء نـور
من رحت عنـي مابقـى بـي بقايـا

أحس كـل الكـون خالـي ومهجـور
شفت الـوداع شلـون سـوى سوايـا

يبكيك قلب وبيـت والبـاب والسـور
والضيقـه اللـي ساكنـه بالحنـايـا

ويبكيك وجه الارض والعشب والبـور
وليـل النجـوم الظاهـرات العرايـا

ويبكيك طعم العدل والظلـم والجـور
والكـذب اللـي سـاكـن بالخفـايـا

ويبكيك صمت اللي من الهجر مقهـور
ويبكيك صبـح الطاهـرات الصبايـا

ويبكيك صدق ونبض وأحساس وشعور
والتوبـه اللـي عذبتـهـا الخطـايـا

ويبكيك غصن جف واوراق وزهـور
وتبكـي عليـك المظلمـات الزوايـا

ويبكيك عمر مات لـه حفنـه شهـور
ويبكيك طيب وصدق بيـض النوايـا

حتى الشوارع دمعها صـار معـذور
والأرصفـه وأنـوارهـا والمـرايـا

تعال شف صدر السماء شـح بالنـور
الكـون كلـه فـي غيابـك ضحايـا