ان طاح سوق اشعارنا واصبح زهيد
 

[poem=font=",6,orange,bold,normal" bkcolor="black" bkimage="" border="double,7," type=2 line=0 align=center use=ex num="0,black""]

ان قيل ليش الشعر بالتالي زهيد=واليا بغى له حاجة ماطالها
لو جوهره صافي كما العقد الفريد=ويجمع بديع عقولنا وامثالها
ماراح يشعل بالعرب نار الوقيد=او يطفي اللي ثايرن زلزالها
بالقيظ يظهر باردن مثل الجليد=ولو طاحت عزوم العرب ماشالها
ولاعاد مثل اول على العالم شهيد=والا يزيد اللي نقص مكيالها
ولا يبعد الداني ولا يدني بعيد =لو يختلف نظم العرب وازوالها
ولو مات محدن قال مرحوم الفقيد=ولا قيل غابت موجته وارسالها
لما وقع بأسواقنا ماله رصيد=وصوم القصايد صار في شوالها
دام القصايد بالوغى ماله عقيد=يفرق قصار خيولها وطوالها
واكثر مغازيها على ذود الوليد=تطرد قروش اهل الذهب وريالها
صدقه غدى ينقص وكذباته تزيد=واقوالها سارت بعكس افعالها
تمدح خصال اللي طيوره ماتصيد=لو ماشرى الدله ولا فنجالها
والا تعيب اللي لهم فعل حميد=وتودع سباع القوم مثل ارذالها
وان شاف درب الصدق ياعالم يحيد=ويروي من عيوب النفوس ادبالها
لما غدى الشاعر تقل ساعي بريد=يطرد معوشة زوجته وعيالها
وقصايده ترجع مع العالم تبيد=ومحدن يشيل من العرب موالها
لا هي تفيد وسامعه مايستفيد=وما به سوى ظلم العرب وهبالها
قصايده تهدم بجيله ماتشيد=لما غدت عيب على اللي قالها
وانا اغلي القيفان وبحور القصيد=انظم نوادرها واصوغ جزالها
فيها نوادر عهد هارون الرشيد=وامجاد الامه في جميع اجيالها
امزج حديث الشعر والقاف التليد=وانقى جدايدها واعاف اسمالها
لاقام جرح نفوسنا ينزف صديد=وسارت جيوش همومنا وارتالها
وسهرت تالي الليل بهمومي وحيد=وغابت سباع المرجله واشبالها
وذكرت رب العرش رزاق العبيد=هو خير من هرج البشر وجدالها
مطلع عذوق التمر في خضر الجريد=ومنزل خواتم كهفها وانفالها
وجبت القوافي ماتبي جهد جهيد=واللي تبي روحي غدى من فالها
افتح مخازن قافها لو هي حديد=وارجع واركب للحروف اقفالها
واصخر معاني قافها صخر شديد=تاتي قبل نزهم على جوالها
عندي لها بالراس شيطان مريد=يضبط شموع القاف مع صلصالها
وينصاع ضابط صفها لو هو عميد=لامر القريحه لا لفى مرسالها
فيها المثل والنصح والراي السديد=ومخرج نفوس ضايق مدخالها
ميراث شيبان لهم ذكر مجيد=وشالوا حقوق المرجله واثقالها
ماهي قصايد عيد والطفل السعيد=للي على الشاشه يميل عقالها
يقعد يرددها على الناس ويعيد=ويجلب لروح المستمع غربالها
نقوة زروع الناس بوقوت الحصيد=تاتي لبيت الشيخ في طربالها
واليوم صار القاف قدامي عنيد=ودال القوافي عاف سكة ذالها
يقسى ويمنع ضامري باللي يريد=يشبه قسى سلمى وسود جبالها
اليوم عشر شهور ماقلت النشيد=وخليت طرد فروقها واجوالها
دام العضيبه صار عن عيني بعيد=شمعة بني مره وتاج رجالها
جاره يروح العمر بالعيش الرغيد=والناس حوله ماتشين احوالها
[/poem]