على درب القدر نمشي ولاندري عن المكتوب
 

[poem=font="simplified arabic,6,black,bold,normal" bkcolor="transparent" bkimage="backgrounds/27.gif" border="ridge,6,orange" type=2 line=0 align=center use=sp num="0,black""]


على درب القدر نمشي ولاندري عن المكتوب=وباقي دربنا محدن كشف وقته وعنوانه
ودام النصف ضيعناه بالسهره على اليوتوب=عسانا ندرك الباقي ونقطف ورد بستانه
وليت الموت ينذرنا ويرسل للهدف مندوب=لاجل نحتاط عن نار الحروب وقصف نيشانه
هني اللي ترك دنياه لا طالب ولامطلوب=لأن الزود بالدنيا الدنيه مثل نقصانه
وعلم الموت واوقاته عن عقول البشر محجوب=لاجل تسعى جميع الخلق في ربحه وخسرانه
لان اللي رجى موته يعاف الجادل الرعبوب=وعن طرد الهوى تقعد تجمع خرقة اكفانه
واخبر العين ماترقد وزول الداب بالدالوب=يطير النوم عن عين تشوف اطراف نيبانه
صحيح اليوم عصر العلم والرادار والحاسوب=ونقل الصوت بالموجات فوق السحب وامزانه
وتكشف نظرة الرادار قاع النيل والدانوب=وخط السير للفيروس بالخافق وشريانه
ولاشافت رماح العين والا السحر بالمسبوب=وطبه في كلام اللي عطى المختار فرقانه
وانا مخلوق واعمالي مثل غيري خطا وذنوب=ولا لي غير عفو الواحد الغفار سبحانه
ولكن ماوطيت الكذب والا سرت بالمقلوب=وشهم الناس مايجلب رداه بهرجة لسانه
ولا راقبت جاراتي ولو تطلع بليا ثوب=وشر الخلق في رجل بذر شره لجيرانه
ولاافرح بالمعايب دام خلق الله خطا وعيوب=وشهم النفس مايشمت بجرح الناس واحزانه
بذلت الجهد لاجل اصبح بمعيار العرب محبوب=وشفت الناس ماتضمن هوى قلبه ورضوانه
اذا نلت الفخر ثار الحواسد ثورة الدغلوب=ويصبح شغلها الشاغل عيوبك وسط ديوانه
واذا نلت الردى قالوا تراك بوقتنا ميكروب=ويمكن تسري العدوى وتاصل حد بيبانه
وناتج هرجنا ربي خلق خلقه عرب وشعوب=وكلٍ يعجبه قافه عن العالم وقيفانه
أحب الشعر والتاريخ وارثي وضعنا المنكوب=واعالج بالقصايد جرح واقعنا وشيطانه
اداري خطوتي واحتاط عن تمريرة الشلهوب=واسكر منطقة مرماي عن هجمات جنحانه
اخاف شباك حسادي تطول وتقضب العرقوب=ومن ناشت عراقيبه شكى ظلمه وطغيانه
ليالي بالشهر غالب وثلثين الشهر مغلوب=ولااجزع لا خلت يمناي واشكي نار فقدانه
رصيدي يرتفع ساعه وتالي ليلتي مسحوب=لأن النفس ماترضى قهر ربعه وحقرانه
الا ياكثر ماصار العشا بالليل خبز وروب=مع ان كفوفنا قبله من الخيرات مليانه
لان النفس ماتترك رفيقه بالقهر مصلوب =شبيه ام العيال اللي تداري حال وغدانه
لو اني في دروب الطيب لا ناذخ ولامغصوب=ولا ارجي خفرة نوطا تفوح عطور فستانه
ولكن البلا كوني لطبع جدودنا مجذوب=وراع الطيب مايترك ندى ربعه وشيبانه
ونقص المال والحاجات مابه للفتى عذروب=مدام اشرف عباد الله رهن درعه لديانه
وضيق العيش مايهفي مقام وقيمة المنجوب=مدامه يطرد الرزق الحلال بوسط ميدانه
وراع الفقر عند الناس لا غالي ولا مرغوب=وعند الضيق والعازات كل الناس عدوانه
ومثله لو بغى السلطان ماله للقصور دروب=ولا له غير باب اللي رزق شيخه وسلطانه
الا لاعدت يا مالٍ بتالي عمرنا مسلوب=وربحه من خزون المال دون ارقام خسرانه
وجسم الادمي ماهوب ماكول ولامشروب=ويبقى النفع في عقله وتفكيره ووجدانه
[/poem]