فتوى العرب فيها مقال
 

[poem=font="simplified arabic,6,black,bold,normal" bkcolor="transparent" bkimage="backgrounds/27.gif" border="ridge,6,orange" type=2 line=0 align=center use=sp num="0,black""]
يالله يارب الجلال=ياراعي الرزق الجزيل
تحمين وقعات الضلال=ودرب الخطايا والزلل
ياجاعل صم الجبال=تحت العواصف ماتميل
ويامنزل وبل الخيال=يطفي لواهيب المحل
من منهل النبع الزلال=هطالها يهمل هميل
تحيي جذور بالرمال=فيها البختري والنفل
تلقى الخزاما بالسهال=والعذق بفروع النخيل
والعشب ببطون التلال=وحول النوازي والجبل
يغني نفوس ماتزال=ترقد بفقر مستطيل
وفيها سكات وطول بال=ورزقه على وال الاجل
عايش بستر وطيب فال=ويسجع حمامه بالهديل
وماجاه ضيقه وانفعال=ولاساق بنته للفحل
وتبقى البوادي بأحتفال=وتبرد لواهيب الغليل
وتزهر مرابيع الشمال=وتصبح زماليق وسبل
تلقى الضواين والصخال=تشبع قبل وقت المقيل
وتلقى الرويبه بالسحال=تحت الهبايب والطفل
من مايدة جزل النوال =اللي جعل رزقه سبيل
وخلا الكرامه في بلال=واخزى مقام ابوجهل
حض الخلايق للسؤال=في كل صبح وكل ليل
والادمي شين الفعال=لازدت بالطلبه زعل
ولو كان من راع العقال=طاح اكثر العالم قتيل
يطلب ضمانات وكفال=كله لاجل حفنة هلل
وانا ارجي الرزق الحلال=والخير لو حمله ثقيل
والمهزله مابه مجال=لو كانت ارباحه دبل
كم ساوموني بالريال=مثل المجاور والزميل
وادراكنا صعب المنال=ان حل زملي او رحل
نكتب سريع الاشتعال=ونعلن قرارات الرحيل
ونلقى عن الذله بدال=مادام راسي مع ثعل
ماراح عمري في دلال=ولا صار لأموالي وكيل
وماكنت اسوي كرنفال=كني على كوكب زحل
من يوم جسمي بالزمال=والقلب مضهود عليل
جنب المباهر والدلال=مع شايب سيله هطل
طيبه مع الناس ارتجال=يقدح مثل قدح الفتيل
لين احتوى جزل الخصال=يبذل وينسى اللي بذل
ولاكنت ابالغ بالخيال=وارجي جديدات الموديل
ومن طاح منا بالخمال=يضرب مثل ضرب البغل
نفرح اليا فاز الهلال=ويخيفنا فتحي كميل
وباللعب مانلبس نعال=وبالسيل مانخشى البلل
ماهمنا عشق الغزال=لا شاح بالرمش الكحيل
اللي جمع غنج وجمال=ويسبي شعورك بالغزل
مانعرف الزغبي نوال=ولا عندنا ديسكو ميشيل
ولا فيه هاتف واتصال=ولا عندنا جوتي ربل
ماكنت اعرف الادميرال=ومحدن يسمي شرحبيل
واسمع بذكر البرتقال=بالسمع والا ماحصل
وطول السهر فينا محال=والنوم مع شمس الاصيل
والصبح نلعب بالنبال=ونرعى المواعز والصخل
البيت ماهو راس مال=شعبي ومرزابه يسيل
والعفش رثه وابتذال=والباب ما يوسع جمل
والظهر بالعشه ظلال=والزبد في بطن الصميل
وجيراننا عم وخوال=وجلساتنا جد وهزل
وثيابنا تعبير حال=تلفح على الجسم النحيل
ولا عيب قدام الرجال=في واحدن ثوبه سمل
كنا بوحده وانعزال=وزروعنا مابه حصيل
ونرفع كريمين السبال=ولاعندنا غدر ودغل
نسمع بجيش الاحتلال=بالقدس واطراف الخليل
ونسأل بشده وانفعال=ليش اليهودي ماعدل
مادامنا رمز النضال=باللي رواه ابوعقيل
وركابنا ماهي هزال=واعدادنا مثل النحل
نملك مثل حنكة جمال=وحافظ يلجلج بالصهيل
وسطوة معمر بالقتال=وياسر مثل ديك الحجل
وخليجنا اللي مايطال=وكنا نشيده جيل جيل
ومافيه نوهات وعطال=غير الجهاله والكسل
وجيوشنا مال وكمال=وتقوى تدوس المستحيل
وخبراتهم صارت طوال=بالقمع واحداث الشلل
تضبط دروب الاغتيال=وشره على الرجل النبيل
ظلم وبشاعه واعتقال=وعند العدى مثل العسل
ومن قبل حفل الاعتزال=بان المصلي والعميل
والوضع حيله واحتيال=والناس طليان وهمل
اثر العرب مثل البغال=تنقل حموله للنزيل
بين الخديعه والهبال=ولا نشت كرعانه صقل
وبانت مغاليق الرجال=وحبل الردى ماهو طويل
ولا راح عمه واستقال=تظهر نجاسات الجعل
وشفنا وش اسباب السعال=وحفلة بنات الدردنيل
ومن يملك الغاز المسال=يفعل ويضرب من فعل
وصارت معاركنا سجال=بالرمح والسيف الصقيل
ولا فاد بالقوم ابتهال=مع سربة فكره عطل
فكره قبل وقعة طلال=وعصر ابن دوخي والدخيل
فيه المهايط والجفال=وكلن يرى روحه بطل
وحنا رذيله وانحلال=وتدشير زينات الجديل
وفسادنا فاق الخيال=ووقت العقوبه محتمل
وافطن لشاشات الظلال=اللي على النهج الرزيل
وفي فسقها ماله مثال=ونشر الدعاره والدجل
حنا سندها بالريال=واهل القياده ميل ميل
نرجي وراها ربح مال=من دون عيب ولا خجل
اموالنا صارت وبال=وللفسق والضيعه دليل
ودروسنا صارت زبال=زدنا بها ظلم وجهل
نمشي بكبره واختيال=ومنتوجنا النافع قليل
واللي بغى درب العدال=شاف الغبينه والملل
وشيخ الشريعه فوق جال=يازن بدنياه ويكيل
وشيك الصوامع والغلال=يلجم حصانه لا صهل
وشفنا بفتواهم مقال=وخلطة بهار وزنجبيل
ومن دون غيظ ولا جدال=صرنا مثل فتح وامل
الظلم بالخلق استطال=وشبل الرجال امسى ذليل
والنمل لا طار استزال=ووقع على قرب الاجل
[/poem]