ياحمود بان العوق فيكم وفينا
 

[poem=font="simplified arabic,6,black,bold,italic" bkcolor="transparent" bkimage="backgrounds/27.gif" border="ridge,6,orange" type=2 line=0 align=center use=sp num="0,black""]

ياحمود بان العوق فيكم وفينا=واللي دعاكم للقصايد دعانا
بالنفط وعصور الثراء وش لقينا=غير الفساد اللي بنعله وطانا
وقصورنا اللي بالمكارم بنينا=طاحت ركونه في عواصف خزانا
نفخر بطيب اجدادنا الاولينا=وانا سبقنا غيرنا في ثمانا
وان سار علمه بالقبايل سنينا=فاليوم صارت في عناوين كانا
ويوم ارتحل وقت الجهل وانتهينا=وجتنا السكينه يوم شابت لحانا
هاجت عواصيف الليالي علينا=ولجلج هواها يوم سكر هوانا
وقامت سخافات السوالف تجينا=تذكر مناقبها وتنشر خطانا
تظهر من اللي خاطره مايبينا=وعند الندى ماراح يسبق ندانا
حاول بميدان الردى يشترينا=وظن اننا نركض مع اللي عطانا
وحاول يهوم المرقب اللي رقينا=وهاب المظامي قبل نشكي ظمانا
حاول يدوج دروبنا اللي مشينا=وراحت سنين العمر يمشي ورانا
وامسى بهرجات القفى يبتلينا=وان شاف غرات الجماعة رمانا
والكذب مايودع ضعيف سمينا=والوقت يكشف طيبنا عن ردانا
وماراح نطرد هرجته لا فضينا=مادام ربي عن هباله حمانا
حنا على النفس الرديه قوينا=وربي عن حروب الخساسه كفانا
ياما وقفنا للخصوم ورسينا=دون الرزيل اللي بكذبه شكانا
جينا دياوين العرب وارتكينا=وشفنا القبول بنظرة اللي لقانا
وان زاد حمل متوننا مارغينا=ولو طال بدروب المعزه شقانا
ياما بميثاق الوعايد وفينا=حتى مع اللي بالشدايد جفانا
ونعطي وحنا بالقسى ماخذينا=ونفزع مع اللي بالقساوه نسانا
طبع الجدود اللي بظله ربينا=وفضل الكريم اللي بخيره كسانا
وان مالقينا الوقفة اللي هقينا=وامست هرابيد الحواسد جزانا
فالحمد لله غيرها مارجينا=ولا هو غريب المخطر اللي كوانا
موجود في تاريخنا اللي قرينا=وهذي مصايبنا وهذا بلانا
ياما قسم طابورنا لا غزينا=وياما قطع وسط المهالك رشانا
لا طاب نسل جدودنا الغانمينا=وبانت نجومه في غياهب سمانا
ثارت شياطين الخباثه علينا=ودارت على راع المكارم رحانا
نجحد مكارم هدته لا حكينا=وننشر طوارف زلته مع عدانا
وان طاح بدروب الوغى مابكينا=من لاهب لارض القطيعه هدانا
وهذا حصاد زروعنا اللي جنينا=يسرح ويمرح بالعرب من غبانا
فرق عربنا من يسار ويمينا=والذيب لا حاف المنازل كلانا
ولاجله عن الدار العذيه جلينا=نسقط ونرجع في مواطن عمانا
ومادامنا بأهل الخباثه رضينا=ماراح تطلع بذرته من حشانا
وانسوا فعول جدودنا اللي روينا=وقولوا تعدت في عناوين كانا
[/poem]