منتديات بعد حيي - حالفن ما عاتب المحبوب خلي

حالفن ما عاتب المحبوب خلي
لو جفاني دون ذنب ودون زله
بسمحه لو كان يطلب مهجتٍ لي
لو يبى روحي وعيني فدوةٍ له

لن حبه في فؤادي ساطيٍ لي
ساكنٍ بأقصى الضمير وله محله
هو حياتي هو مماتي هو دوا لي
نظرته تشفي الحشا والعوق كله

بويديل فوق متنه مستهلي
والحواجب مثل خطات الاهله
أحوري الهذب عينه مستظلي
مثل عين الريم سودا مستظله

فوق وجناته كما الورد المطلي
مع خدودٍ والخشم كالسيف سله
وان تبسم عن ثناياه وازهن لي
كالبرد والريج يشفي كل عله

عود بان رابين في وسط ظلي
مالي عوده على مطلوب حله
شطني حبه وعل القلب علي
خذ فوادي وانهبه عني وشله

هوب عارف وين اروح وين اولي
ضايعٍ ويفوح صدري فوح دله
لو بغيت اسلى وداده بالتسلي
قام يتزايد على قلبي غلا له

ما بشاكي به ولو منه حصل لي
كل ما يحصل تراني سامح له
حالف ما اعاتب المحبوب خلي
لو جفاني دون ذنب ودون زله

https://www.youtube.com/watch?v=pU5JFdFNKyA