يا هيه التفت واسمع ادعاي يا هيه
 

يا هيه التفِتْ لي واسمع ادعاي لك يا هيه

ترى عادك بْتِشْبَع مِنْ البِعْد وِتْواجه

دعيتك بصوتٍ ياصِلِكْ ليه ما توحيه

وانا اسْمَعْ ضلوعك من صدى الصوت لَجَّاجه

عليك الفؤاد خْلاجه مصمِّخٍ راعيه

خِفْ الله في راعيه ما تسمع خْلاجه

ترى العفو قِدْ جاك أوّله واغْتِنِمْ تاليه

وترى الحلم بَحْرٍ غير لا تامَن أمواجه

وترى الوِدّ ليلٍ مظلمٍ جيت لك ساريه

سراجه وصالك والجفا ينْفَخْ سْراجه

وترى قَصْرنا اللي كَمْ سنَه نجْمَعْ وْنبنيه

هوا الهذل طيَّحْ بابه العَوْد وِسْياجه

لي أيام ما ادري وين دارك ولا ادري ليه

وانا خابِرْ أنّي باب شَفّك وْمِزْلاجه

غيابٍ بلا سِبّه هجادِ بلا تنبيه

وجفا أغلى العَرَب نارٍ على الكَبد وَهَّاجه

نضَجْ قلبي مْن البِعْد وش حاجتك تكويه

جفاك الجَمر والصَبْر في بُعْدك الصاجه

طِبِعْ حبّك بْقلبي والايِّام ما تمحيه

هذا هَجْرِك يْحاوِل يموجِه وَلا ماجه

يموت الأمل لكن ظنون الغلا تحييه

وعروق الوفا في الروح والقلب وَجَّاجه

خبَرْتوا حَدٍ يبكي على واحدٍ يِبْكيه؟!

وخبَرْتوا حَدٍ مسجون ما يبغي افراجه؟!

أحِبّه ولا ابْغَضْته على شَيٍ يْسَوَيه

ولا زالت رْقاب الرجا فيه منعاجه

عسى منزلٍ ضَمّه حقوق الوَسِمْ تسقيه

وْتِضْحَكْ له الدنيا وهو يضْحَكْ حْجاجه

فقَدْ خاطري شَيٍ من الضيقه مْسَلّيه

وغدَتْ روحي مْن الناس والليل هَجَّاجه

أروح لْمكانٍ خابِره.. خابِره تاتيه

أسوق القدَمْ صوبه وهي ما لها حاجه

مكانٍ نزيه وْأوّل مْواجَهي له فيه

وانا خابرٍ ما رِجْل مثله بدوَّاجه

لعَلّ وْعسى ما حَدّني للمِجِي.. يدعيه

واشوفه وانا ما وِدّي آسَبِّبْ إحراجه

يحِبّ الجريح آخر دروب اللقا وِيْجيه

وْتِحِبَ القدَم جَيّة مكان أوّل مْواجَه

من روائع محمد بن فطيس

ابن فطيس دااااهيه فعلا

اشكرك بعد حيي

اختيار ذوقك وكلك ذوق

باذخية شعرية لا تستغرب من ابن فطيس
وهي أنتقاء من هو اعذب منها
بعد حيي
شكرا لك

قصيدة تحمل من الجزالة ما يليق بشاعرها
ومن الذوق ما يليق بمن انتقاها
فكل التقدير لمن نظم وأبدع
ولمن نقل وأحسن الاختيار
كلاكما محل الإعجاب والاحترام.