لاغاب نور الشمس ويلي من الليل
 

[poem=font=",6,orange,bold,normal" bkcolor="black" bkimage="" border="double,8," type=2 line=0 align=center use=ex num="0,black""]
لاغاب نور الشمس ويلي من الليل=نومي يروح وسهر عيني يجيني
ليل العرب يمضي هروج وتعاليل=وليلي على نار السهر والونيني
مدري متى يظهر لنا بارق السيل =ونار السهر تترك محاجير عيني
ارقب نجومه مقفيات ومقابيل=نجم يغيب ونور نجم يبيني
اسري على نور المرازيم وسهيل=من هاجس وسط الضماير دفيني
والهجس مفتاح الغثى والغرابيل=يودع قوي العزم مثل الشنيني
واللي جرى ماله شروح وتفاصيل=والا خيارات لضبط الرنيني
عفت العشاير والعرايب من الخيل =ورجيت بالمقناص صيد سميني
وافلست من حشو العرب والمخاليل=قولة خلف ومعايد القريتيني
شاب الشعر وكتوفنا ضامها الشيل =والشيب بالخمسين غصبٍ يبيني
وزروع روحي بالسنين المساميل =وحطيت فيها كل علق ثميني
واللي ربحته عقب جمع المحاصيل=والله فلا يسوى متاعب سنيني
حظي رجى بالقيظ برق المخاييل =يمشي يسار ودرب رزقه يميني
يتلي كلام طار مثل المناديل =وبانت وعود القوم ماهي يقيني
ولو لي على غيب الضماير درابيل=حطيت عن باب الخديعه ضميني
ياصعب تعويضه على طايح الحيل=يمكن يحول الموت بينه وبيني
مادام سهم الموت كز المراسيل =نرقب وصول الضيف في كل حيني
ياعزوتي ياما بقلبي من الويل=يالله رجيتك خير لا تبتليني
وشيوخنا اللي طيبهم قدوة الجيل=اليوم نسله ما يفك الزبيني
جهالها تركض ورى القال والقيل=وعقالها ما يطلقون السجيني
لو صحت بوقوت القهر والبهاذيل=الصين يصبح بالمفازيع طيني
ياتقل تنخى اللي مقامه ورى النيل=وتمشي على الخيبه وخزي الجبيني
وترفق بناس هانها ضايع الجيل=اللي لهم بالطيب حبل متيني
صارت جمايلنا القديمه محابيل=كيف الندى عند الخلايق كميني
وكان الخلايق تنقص الوزن والكيل =والله فـــلا لـي غـيــر ربــي عـويـنـي
مالي على جور الليالي مداخيل=وهذا بلى عقل يجيه القـريـنـي
وجدي لشوفة محرقين المعاميل=وجــد الخـلـوج الـلـي تـدور الجنيـنـي
والا كسير اهل القلوب المغاليل=في سربة حـافـت حــلال القطيـنـي
صاهـود ابـن لامـي يـقـود الرجاجـيـل=ذيبٍ صرومٍ بـالـمـغــازي فـطـيـنــي
اقفـن بهـم شهـب النواصـي مشاويـل=وشـالـوا حـلالـه وانـتـحـوا مشملـيـنـي
يــرجي فــزايــع لابسين الدساميل =ويـبـكـي حلالــه مع صـواب لـعـيـنـي
بالـقـيـظ مـاحـولــه عــــلاج وتـحـالـيـل=والـعـمــر مــالـــه يـالـنـشـامـا وزيــنـــي
حالي مثل حاله بكل التفاصيل =وقتي يزين وعيشتي مــاتزيــنــي
[/poem]