------------------------------------------------------------------------------
كيف تصطادين التمساح الجيد دون اللجوء إلى الأساليب القديمة كالمغازل والترقيم والترزز بالأسواق والتلميح اللي ماله سنع ...... إلخ .....؟!
أهم شي طلعيهن على العجوز اللي حاطه عينك على ولدها .. ثم نفذي ما يلي:
1) خليك على طول مع أمك ولا تقعدين مع صديقاتس السخيفات و تستعبطين قدام الناس .. إصبري عن هالحركات كم شهر لما تتم العملية بنجاح ...
2) إمشي وأنتي حاطه راستس بين كتوفتس وعيونتس بالأرض ولا ترفعين راستس ابد حتى لو تكنفستي ..( نصيحه: خلي الفكس دايم دهون يديتس ) ..
3) كلمة خاله خليها دايم على لسانتس .. خاصة لأم المعرس .. عشان تحس بنوع من التميز عن باقي العجايز ...
## ملاحظه : لا مانع تنادين عجوز ثانيه بخاله .. عشان إذا ما نجحت الخطة مع العجوز الاولى تنجح مع الثانية ( الإحتياط واجب و أنا أختتس )
4) إذا قعدت أمك تتكلم عند الحريم اضربيها بكوعك عشان تدخلتس بالسالفة ... حتى لو ما تعرفينها تطبيقا لمثل (كما تدين تدان ) .. أدري هالمثل ماله دخل بس ماعرف غيره ..
5) إخوانك الصغار ورقة رابحه ... إلعبي معاهم وناقزي وراهم وين ما يروحون حتى لو ما كنتي تسوينها من قبل.. بس تصرفي معاهم تسنتس أمهم عشان العجوز تاخذ فكرة إنك حريصة على ذريتس ..
6) كل ما أكلت أمتس من أكلة حلوه وصيها تقول : سبحان الله نفس الأكلة اللي تسويها بنتي ..( حتى لو كان الأكل من مطعم صيني أو مكسيكي )..من التسذب
7) إذا مديتي يدتس قدام الحريم قولي بنعومه آآآآآآي... وخلي أمك تقول : قلتلك يابنيتي ماله داعي تنظفين البيت وترتبينه عندنا شغاله ..( أقول شيلي الزباله والوصخ اللي بغرفتك أول هاكاالساعه الساعه نتفاهم )...
8) إذا تكلموا الحريم عن العرس إكتمي نفستس ولا تتنفسين لحد ما تحمر شدوقتس .. عشان يقولون :
ويلي تستحي .. بس لا تكتمينه مره وحده .. أخاف تروحين فيها ويقولون قتلتي نفس بغير حق...
9) مهما كان موضوع الحوار حماسي لا تبدين رايتس وخليك مثل الطرمه .. لأن اللقافه تجيب أجل الخطة ..
10) شعرك خليه دائما ناعم ... لا تطيرينه أو تجعدينه مهما كانت الموضة .. لأن العجايز ما يدورون إلا اللي شعورهم ناعمه ..
11) إذا أدلت العجور( أم المعرس المتوهق) بأي رأي .. سواء سياسي أو وطني أو اقتصادي وافقي عليه على طول .. حتى لو ماله معنى أو مصداقية .. مثال:
تقول العجوز : بوش تقهوى عندنا أمس .. قوليلها : ليش ما علمتينا ياخاله نجي نساعدكم ..
12) بالعروس إضغطي على نفسك وإقضبي أرضك ولا تتحمسين وترقصين بخبال .. بعدين ياخذون فكره إنك خفيفه ومو منتي للعرس
13) إذا جا طاري السوق .. وهو لازم يجي لأنه ملح القعده عند الحريم .. وصي أمك تقول : بناتي ما يحبون روحة السوق أبوهم يجيب أغراضهم ...
((( ألحين العجوز وقعت في الفخ .. نروح للمعرس )))
1) إنثبري في بيت أهلك ولا تروحين يمين ويسار ... وإذا المعرس بيشوفتس وصي أبوك يقوله : والله ودي تشوف البنت بدون لا تدري عشان تاخذ راحتك وأنا خالك وتشوفها عالطبيعة بعد عشان ما تقول غشيتوني ( هين يالشايب والله لو بكيفك تحط مكانها هيفا وهبي )..
2) قبل يجي اليوم اللي راح يشوفك فيه بحوالي أسبوع أو أكثر ( على حسب درجة الشدايهه) إركضي من صالون لصالون .. حف وتنظيف وصبغ وقص .. إلخ ..
3) إذا جا المعرس .. وصي أخوك يوقف جنبه عشان ما يتفرج حيل وتطلع البلاوي ..
وذلك لتطبيق نظرية (اللمحة ذبحة )...
4) في نهاية المشهد .. خلي أبوك يقول : ما عليه وأنا خالك ترى البنت ما تدري إنك جاي تشوفها يعني ما كانت لابسه وجاهزة .. ( ما عليه يالشايب تسذب على هالمسكين)
وبهاللحظه الولد يشخف راس أبوك و يقوله متى العرس يا خالي ..؟؟!!!