بعض العرب غتره وثوب وفنيله
 

[poem=font=",6,black,bold,normal" bkcolor="transparent" bkimage="http://www.b3b7.com/vb/mwaextraedit2/backgrounds/5.gif" border="none,4," type=2 line=0 align=center use=ex num="0,black""]

ياحمود بعض الناس يسوى قبيله=وصوته يسدك عن ثلاثين خيال
مدات كفه بالمراجل جزيله=وهدات عزمه بالمفازيع زلزال
حيدٍن اليا زاد القسى يرتكي له=ويبري طواعين المجاعه والامحال
ما يجحد افضال الرجال وجميله=وتبقى بنسله باقيه طول الاجيال
ويسكت عن اللي مايساوي شليله=لاصار جده من كريمين الاسبال
لا غاب مايملى مكانه وكيله=ولا كل رجل ينقل الثقل لا مال
وبعض العرب غتره وثوب وفنيله=وهرجه بجلسات الرجاجيل غربال
يقعد يسولف في عداله وميله=يذبح ويصلخ بين دله وفنجال
وهو عاش ماحصل بعمره نفيله=ولا في بيوته للرجاجيل مدهال
بالجاه ما داوى النـفوس العليله=وبالمال مافاد المساكين بريال
العشب يذبل في شغايا مسيله=والسدر ماتحته للاجواد مقيال
اما كسب لأقرب ربوعه فشيله=او صار لاريام الغنادير مرسال
وبعض العرب لو زاد قوله وقيله=ولا تقل وصلتنا هروجه ولاقال
دامه يقول ولا يـقـدم دليله=وش لي بقولٍ مايثبت بالافعال
خـله يـبرد بالسوالف غليله=ويطفي لهيب بالحشى يشعل اشعال
لا صار ماله غير كذبه وسيله=كذبة محرم ترتحل قبل شوال
وهرج المساء شمس القوايل تزيله=لو داج بديار العرب عدة أميال
وارزاقنا رب البرايا كفيله=مايدفعه راع المناصب والاموال
ولو ساق طابور العساكر وخيله=والله فلا ينقص من الرزق مثقال
ولا عيب في جمس قديم موديله=او نومتي جايع تحت ظل طربال
او راح ليلي مع سراج وفتيله=او مامعي بشت وخواتم وجوال
والعيب سيرك بالدروب الذليله=وشربك من دلال المهونات فنجال
دنياك لو طالت تراها قليله=وملفى منازلها خرابات واطلال
العمر سيف الموت يقطع سبيله=والموت ماعذرب جديع بن هذال
ومااقول انا حبس الحمول الثقيله=واني بخيص بالجدايد والاسمال
كل البشر تآطى عـداله وميله=ولا لي عن الغلطه ملاذٍ ومعدال
بس اعتماد الكذب عندي رذيله=لا والذي نزل تبارك والانفال
والمرجله ما كل رجـل يشيله=ولا كل رجـلٍ يحتمل زود الاثقال
ونقض الوعايد بالشدايد رذيله=وأما الرخى ماينقض العهد رجال
عـلـيـك باللي ما يخـلي دخـيله=اللي سحابه طول الايام هطال
والبذل هو ساس الخصال النبيله=وهو نبعها الصافي على مر الاجيال
فيه الـمثوبه والندى والفضيله=ومعها محبة كل راحل ونزال
والبخل عذروب الرجال الجليله=يدبل عـيـوبـه بالعرب عدة ادبال
كم نار قـوم له سنينٍ طويله=غابت لهايبها تحت هافي الخال
ولو ينقل اكياس الذهب في زبـيله=يزول ظلع وعفن الاطباع مازال
[/poem]