سنع .. يشوه لا تذكرته .. أسناع
مثل الحصاة .. اللي وسط عقد ياقوت
تخفي هيامك .. وإنت ميت و ملتاع
ما تدري إنه في ملامحك .. منحوت
ويبخل لسانك .. وإنت للسمع .. طماع
والبخل .. في سلم المحبين .. ممقوت
الحكي .. قوت السمع / وأسامعي جياع
ومسامعي ماتت من الجوع .. للقوت
وحكي الغزل في صدرك أشكال وأنواع
لكن صمتك .. حول الصدر .. تابوت
إلا طلبتك وصل .. صعبت الأوضاع
( مدري .. من اللي درسك جعله يموت)
تصد .. ما كنك من الصد .. مرتاع
وإن قلت : يا القاطع .. تلفت مبهوت
أقطع ب درب مواصلك في الشهر.. باع
وإلا إنت تقطع للوصل ف السنة .. فوت
طعني .. وطاوع واحد فيك .. ما طاع
ناس صغار عقول / وأشوار / وبخوت
وإلطف بحال اللي نحل حاله .. و راع ..
قلب جروحه .. تنزف أفكار .. وبيوت
قلبي .. إلا منه شرى قلب .. ما باع
وإنت هالله هالله فيه .. والعمر موقوت
اسمع أشعاري في الهوى وارخ الأسماع
ياللي غلاك ب تربة القلب .. مكتوت
لا .. للفراق .. و لا .. لتجديد الأوجاع
ونعم .. نعم للوصل .. لو كان بالصوت