عايش على ماضي بحاضره موجود..
..كاسيه حتى كاتبـه فـي وصاتـه
ماكنه إلا عن ثرى الكون مطـرود..
..حاله نتيجة جـور مـن ذكرياتـه
ماهو بشي يطـرد الهـم موعـود..
..ضاعت به الحيله وراجـي مماتـه
يشكي زمانٍ فات والعالـم ارقـود..
..ياليت يرجع مامـن العمـر فاتـه
كم باب في وجهه من الدهر مسدود..
..ويلاه حتى يشتكـي مـن عصاتـه
حاله نحيل وروح الجسـم كالعـود..
..ماعاد تفـرق جثتـه مـن عباتـه
ماهو على مابه من الهـم محسـود..
..والله كفاتـه هــم والله كفـاتـه
هيهات بعد الموت وش ياكل الـدود..
..اللحم لاصق عظم ضاعت صفاتـه
الصبـر زيـن وربنـا عـز داود..
..بعد اللذي عاشـه وزالـت عناتـه
البيض ماهي صافيه .. تاتي السود..
..والعمر لولا الهم .. وش هو حلاته
الله يجلي حرقـة الدهـر بالجـود..
..لكـن كــلٍ دبــر الله ثبـاتـه
ان كان ودك يثبت القـول بشهـود..
..اللي غني وش لون ينفق زكاتـه؟؟
واللي غني حضه من المال ممـدود..
..اليا مرض وش لون تنفع مياتـه!!
جاوب وتعرف عيش منته بمقـرود..
..واحمده ربي واشكره فـي صلاتـه
خلك ذهين وكون شعلـه وبـارود..
..لاتحسب اللي يزهم الارض جاتـه
والطير يسرح خاوي البطن ويعود..
..شبعان مثله .. راجعـاتٍ خواتـه