البارحه يـوم اقبلـت يـوم قفـت
عبرة هل التقوى وفتنة هل الغـي
صحيت من نومي وقمـت اتلفـت
تقل انتظر لي شي ومضيـعٍ شـي
من روعة الموقف عضامي تعفـت
وكن السلاسل في يديَّـه ورجلـي
واللـي مروعنـي عنـودٍ توفـت
من موتها حيه وميـتٍ لهـا حـي
فترة عزاها عيـد غنـت ورفـت
له معظم احساسي والاعلام بيـدي
والثانيـة شبيـت نـاري وطفـت
في ضو نارٍ والعه ضيهـا ضـي
منها بـرد حامـي وبـردا تدفـت
وعظم الذبيحة مستوي واللحم نـي
وضليت اصاليها وشامـت وعفـت
جوارحي لا تشتكي الحرق والكـي
وابغى محاسنهـا وعنـي تخفـت
واجحـد مآسيهـا ومتباينـة فـي
وحاولة فرقاهـا وثقلـت وخفـت
لا فزت في هذي ولا جزت من ذي
وابستشير اللي صفت له وصفـت
بحور عرف وروس تامر وتنهـي
وأخذ من الدنيـا تجـارب وكفـت
وبالعشر تبصم له عوارف وتمضي
أبـو محمـد عزوتـي لاستلفـت
علي عدواني وبـار الدهـر بـي
ملجاي لامـن السنيـن اشلحفـت
وصارت علي ظروف لاهي ولاهي
وريف الخوي بيت الكرم لاستحفت
دنيا الكرام وصارت أسوأ من السي
طويـق لامـن العقـول استخفـت
زبن الدخيل أول وهالحين وشـوي
عِد الروى لا ضحضح الماء وجفت
كل العدود وطويت الارشيه طـي
وان ثقلـت القالـة ودارة ولـفـت
يطلع بها القمه ويارد بهـا المـي
وان عمست الارياء وهفت وزفـت
رايه صواب ومخطي الراي مخطي
حربي على رايه وشـوره تشفـت
روحي وتوجيهه ورايه فخـر لـي
وان جات اشاره منه كفت ووفـت
ويعبر بها البابور مع غبـت دبـي
رحلة عمر كان اقبلت كـان قفـت
عبرة هل التقوى وفتنة هل الغـي

الشاعر رجاءالله الحربي رحمه الله