استنطق الحب قلبي ثم حبيتك
يا راهي الحس والاحساس والغيرة



نظرت عيونك تناديني وناديتك
من يوم شفتك عطاك القلب تقديره



يا أحلى بشر في حناي الروح ضميتك
الحرف يذبل على وصفك وتصويره



من غيرتي كل ماشفتك تناسيتك
وما بين قلبي وروحي جايلك ديره



عجزت اصارع لهيب الشوق لطريتك
في العين صدق الغرام تشوف تعبيره



ان غبت يومك شهر في البال توقيتك
صار الشهر عام(ن) يقبل مع ديره



شفني وانا اقطف ورود الحب واغليتك
واناشد الورد وانا عايش بحيره



يا هل ترى حبي بقلبك سكن بيتك
انا لعينك غديت من الهوى سيره



خذني على كيف ما تبغي وانا جيتك
في عالم الحب وانت احلى مقاديره



يعني بكل الكلام اقول حبيتك
عهدن على القلب لو طالت مشاويره