[poem=font="simplified arabic,4,black,bold,normal" bkcolor="transparent" bkimage="" border="none,4," type=2 line=0 align=center use=ex num="0,black""]
آه من ليل السهارى كلما هجيت عنه=ردني حظّي دخيل مزبنه .. ليل السهارى
وآه من جور الطعون الكايدات المستكنه=كم لي ادراها واداريها .. وهي ماتنتدارى
وآه من وقتٍ ولف ترويع نفسٍ مطمئنه=وآه ياعين الشجيع اللي عبايرها تبارى
وآه من شيبٍ غزى راسي قبل وقته وسنه=للأسف في وقت ماللشيب فيه ايّة وقارا
كنّي اللي شهّد الأيام عالدنيا وكنّه=مستغيث الماء من الجدب المهاميه الصحارى
لو درى راعي الأمل عن هقوة اللي خاب ظنه=كان ماباع الثقة بالنفس في سوق الحيارى
اذكر اني كنت طفل وكان لي حنّه ورنّه=واذكر اني بالشعر كنت استفز احلى العذارى
اتشيطن كلما ناظرت عودٍ ضحك سنّه=وإن تحايلت .. اكتم الأسرار بعيون جهارى
واذكر ان المقبره .. هذي نسميها مجنّه=واذكر اني كنت احسب الجن .. كفّار ونصارى
واذكر المرجيحه ام حبال .. ولها صوت حنّه=واذكر التينه .. وخوفي من غياهيب الغدارى
وراديو الشايب واهازيج القلوب المرجهنه=وام كلثوم .. تتغنى ( هل رأى الحب سكارى)
كنت قيس واشوف ديار ليلى روض جنّه=كم كتبت بها ( ولكن حبّ من سكن الديارا )
واتذكر طفله صغيره .. و ضحكتها بخنّه=كن شفتها جمر سمرٍ تدفوا به سمارى
كل نظرة من حورها .. قالت الترحيب ثنّه=وكل بسمه .. كانت تقول : يهبا لول المحارى
طفلةٍ فيها الحسن .. يلغي الجمال بكل فنّه=اسمها خابره ترفه .. كيف صار اليوم يارا ؟
وصار حتى اقرب قصارى الدار .. زاده مايحنّه=وصرت يادار الكرام بلا ضيوف ولا قصارى
اتوارى عن عيون الناس واتلي الآه ونه=وان توارت عزلتي .. ونّات قلبي ماتوارى
اسمع بداء الملوك وقلت جدي مات منه=واكتشفت البارح انه مات من داء الفقارى
[/poem]