[poem=font="simplified arabic,4,black,bold,normal" bkcolor="transparent" bkimage="" border="none,4," type=2 line=0 align=center use=ex num="0,black""]
فوز .. وش معنى الحياة وتالي الحيّ التراب؟=مقبره .. والميت والله ماتردّه مقبره
فوز .. لا صرتي مره / تدرين ليه الظن خاب=وليه ابونا آدم من الجنه خرج سبّة مره !
فوز .. ما تروي مهـاميه الزراج إلاّ السراب=والهبوب الذاريات اصفى ملامحها غبره
فوز .. وش الصاعقه تآخذ من البيت الخراب ؟=والأمل كهلٍ بكى .. يومن ضحك شيب شعره
فوز .. لو تطمن مشاريف النوايـف للهضاب=واستوى الغارب مع حدب السنام وش نخسره ؟
لا الذّره كانت ذنوب .. ولا الرحا منْ الذنب تاب=وحكمة الله يالرحا .. تاطا على خشم الذّره !!
والبعير ليا ِدبَرْ ظهره نقـض ِدبَرْه غراب=وان شكى ضيم ظهره .. وش بالبعير الاّ ظهره ؟!
الرضا / ماله صديق ليا زعل / غير العتاب=والعفـو / ماله عذول / الاّ ملام المقدره !
كيف يالتوبه حضورك يبري جروح الغـياب ؟=واطهرك .. ذنبٍ يصك الباب دون المغفره ?!
فوز .. يبطي الظن ظنّ / ولو فتق صدر الصواب=وابسط اقدار المنايا / كلّ جمع تبعثره !
قالها اللي راح يستسقي شهاليل السحاب=بدويٍ ..كان يطـفي القيض بظلال شْجره
ان ذكر حـيّه .. وسَمْ دمعه على ردون الثياب !=وان ذكر ميـته .. عقل زامل ذلوله ونـحره !
وشاعرٍ .. ماسخـّر اشعاره لتلعات الرقاب=اجوديٍ .. مير دق الفقر بابه وقهـره
راح يحدي له حيالٍ واغفلت / راحت ذهاب=مالها وصفٍ يبيـنه ( النبـيه ) ويضهره
مابقى الاّ ( فاطر ٍ) لاهي ( مسوح ) ولا ( ركاب )=لا ظمت / تشرب بجلد حْوارها مستبشره
واقسمه نصفين حظّه / نصف ..بآحزان وعذاب=ونصفه الثاني .. خذاه الموت/ يوم استكثره
مانشد (يوسف ).. عن الغي وقميصه والذياب !!=ما نشد ( يعقوب ) .. دمعه وش خذا من محجره ؟
المصيبة .. لا رمى الفارس بصدره للحراب=مادرى انه كلّ حصني / في بلاده عنتره !!
فوز .. لاصرتي مره / تقرين صفحات الكتاب=وتعرفين ان الزمن رجـّال / لاصرتي مره
وتعذرين اللي قفل حظّه بوجهه / كلّ باب=وانفـتح له باب لكن / كان باب المقبره !!
[/poem]