لونها الليله رمادي , لونها ما كان عادي
الحزن فيني تمادى وصارت الدنيا حزينه !!!

في قفص صدري قصيده كانت بحبس انفرادي
من ثلاث سنين و اكثر كانت بصدري سجينه !!!

عسعس الليل الطويل ويا هلا بك يا مدادي
اصبعي السادس تنفس والمقص تبت يدينه!!!

اشرقت شمس القوافي من عقب كبوة جوادي
واجتنب غث القصيد و لا اصيد الا السمينه !!!

سبعة الآلاف جني , اصدروا حكم ارتدادي
واسألوا الهدهد يقول استنطقوا كاهن جهينه !!!

القلم مرفوع عني والله اعلم باجتهادي
والجنون اللي لبسني , اسمعه و افهم رطينه !!!

ربما بانت سعاد و ربما غابت سعادي
حبة الزيتون صارت في سواد العين تينه !!!

الطلاسم جننتني قمت اهيم بكل وادي
الجسد يسكن مدينه و العقل يسكن مدينه !!!

والعواذل يحسبوني عاشق و هايم فؤادي
مستهيم بحب ليلى او متيم في بثينه !!!

ما دروا ان الليالي كبلت هاك الأيادي
والمصايب , كن بيني و بينها ثار و ضغينه !!!

حطمت مركب حياتي و لا بقى غير المبادي
والسفينه في بحرها , و البحر ضد السفينه !!!

استبدت بي همومي ثم زادت بالتمادي
قلت يكفي و استكيني , ليه ما انتي مستكينه !!!

بي تنازع سكرتين اسمعتها كل الأعادي
رددوا : عادل توفى من تنازع سكرتينه !!!

الطلاسم جننتني و لا بقى بموسم حصادي
غير انا و هيكل عظامي يحتضر الله يعينه !!!

اربعين العام مرت و العمر يا خوك غادي
وش يقول اللي تعوذ من سنينه اربعينه !!!

كم زعجت الصوت لكن لا حياة لمن تنادي
كم نخيت الموت لكن هادم اللذات وينه !!!


الاسطوره / عادل حزل الشمري

~