ياسكة الصبر إلهميني صوابي
عجزت عن رد الخطأ داخل الذات
يبكى سؤالً ينتظر من جوابي
تفسير تعديل الخطأ بالخطيات
كنت ابتسم في دنيتي يم بابي
واليوم فرحي داخل النفس اهو مات
مالي على حباً يسلط عذابي
غير الصبر عقب الألم والمذلات
الحب ياخذ مابقا من شبابي
يصرف من ايام الحزن كيف ماجات
ان جيت ابسلى صورته في كتابي
وان جيت ابنسى مالقيت المجالات
حلماً تكسر وانهدم في ثيابي
والريح هبت تعتصف بالبنايات
حتي حظوري صار يشبه غيابي
عجزت افسر ضيقتي بين الاصوات
اسمع صدي صوتي في بحر اغترابي
وجيت وسمعت ان الزمن سافر وفات
لامابقى بي كثر ماهو سرابي
غير القلم واحساس مؤلم ودمعات
ارضي جروحي ثم ينطق عتابي
ياخوي لك عالم عجيب وقناعات
واوقات احسبها واضيع حسابي
ولاعاد انا ادري وين انا بعض الاوقات
ياسكة الصبر إلهميني صوابي
عجزت عن رد الخطأ داخل الذات