منتديات بعد حيي - عرض مشاركة واحدة

معرض الوسام · 01-02-2014, 10:56 PM

[poem=font="simplified arabic,6,black,bold,italic" bkcolor="transparent" bkimage="backgrounds/27.gif" border="ridge,6,orange" type=2 line=0 align=center use=sp num="0,black""]

ربوع العام باعوني وراع الطيب ماينباع=وبعض الناس لو بعته بديوان العرب معذور
لأن اللي بدرب الطيب مايسري ثلاث ابواع=مهو مثل الذي تقطع ذلوله نقرة الخابور
لك الله لو طيور الصيد بالهده مثل هزاع=فلا شفت الذي ينقل بمقناصه ثمان صقور
ولو قاف العرب كله معاني واضحه وابداع=لقيت اللي مثل قافي بميدان العرب طابور
واذا ماشفت بالدانين بوقوت القسى فزاع=ولا ياقف معك بالكود لا داعم ولا جمهور
جلوسك بينهم ماله بميزان العقول اسناع=ولا انت بمدحهم صايب ولا مقدي ولا ماجور
قوي العزم ماياصل مطاليبه بدون اتباع=وكثر الجمع ياكل به ضعيف النمل والعصفور
ومحدن تنفعه يمناه لو كانت بدون اصباع=وسقف البيت ماترسي موازينه بلاكاسور
ولو ماكان اخو رثعه لمضروس العدى مقلاع=لك الله ماتهاب الناس لاناصر ولا منصور
ولايحمي حلال القوم سيف الخايف المرتاع=ولا نال العلا رجل يداري خاطر الغندور
ولو ماجاب سبع الغاب عقبه للعرين سباع=غدى مجده وصولاته بغابات الوغى ديكور
ولو بذري ومجهودي على شط النهر ماضاع=ولا قمت ارتجي زرعٍ بقيعان الظمى مبذور
عصيت اللي يقول ابعد زروعك عن ملاح القاع=وقلت القاع نسقيها من الفوسفات والفسفور
مدام العلم ساق السفن بأمواجه بدون شراع=وقسنا الضغط والسكر بغرفتنا بلا دكتور
وصار الربح والمحصول ماياصل ثمان اصواع=ولا يكفي مخاسيري وجهدي من ثمان شهور
واخبر الربح والمكسب مرام الشاري البياع=وراع الذود قطعانه تريد الوادي الممطور
واثاريني وراء برق شعاعه للعرب خداع=ومن يتلي بروق الصيف طاح بعنة المجدور
الا ياطول ليل اللي نصيبه بالجزور كراع=او اللي خصمه القاضي او الشرطه او الهامور
او اللي يرجي التغريد بالشاشه وبالمذياع=لأن النسر مايرحم كسير الناب والمنقور
وليتي صرت لاشوار الرجال الناصحه مطواع=ولا بررت غلطاتي بقصة عنتره والثور
لقيت الغبن ربح اللي يشاهد بس ماينصاع=وجاه الشور لكنه عنيدٍ ما يطيع الشور
وطاوع شاعرن قال الشمالي مايضيق بساع=او اللي حط نكبات العرب كله وعد بلفور
واقول ان الشمالي ضاق مع نصف وثلاث ارباع=وضاع اليوم بافكاره ورى عطوان والعرعور
ورزقي من كفوف اللي يسوق المزن بالذعذاع=ولولا الله فلا يلقى اليتامى كسرة الشابور
ومن يآمن غيار الناس يآمن لدغة الفعفاع=مدام الظلم مايمنع فضايل حجها المبرور
على فتوى الشيوخ اللي عقوله تضبط المرماع=ومنهج سربة عاقت جملنا من ثلاث عصور
لما ضاعت عقول القوم بين القاع والقعقاع=تجاهد في لهيب الشمس رمح الكور والباكور
وكتم الغيظ مايشفي جروحٍ بالضمير وساع=مدام المزن مافيها لقيعان الظمى قاطور
الا ياراكب جيب موديلاته ثلاث انواع=جيوب تودعك تاقف قباله سارح مبهور
مدوحه بالعرب بانت وصيته بالمداين شاع=جديد الصنع والسايق بطلعات الخطر مطيور
تحرك من جبل شمر لتيماء بأول المرباع=الياناشه كفخ كفخة قطاة صابها شرشور
يجي للي دياوينه تشادي هضبة المطلاع=وشيخ في مفازيع المراجل والندى مخبور
مقام سعود بن دوخي ربيع الضايق الملتاع=رفيع القدر لو غابت علومه من شهر عاشور
عزيز عاقل مابه هوان ولا جفاف اطباع=وتدخل مجلسه من دون لا فيزه ولا باسبور
عطت عبده وسنجاره على الشهم الطنيخ اجماع=مدامه ريف ضيفان الشتاوي لاوطاه دهور
شريف في دروب الطيب يمشي مايريد اقناع=ولايحتاج له فتوى ولا شرطه ولا مامور
تقدم له تحياتي بريح الورد والنعناع=وينضح حرفه الزاكي بريح المسك والكافور
وقل راسك شبيه طويق شامخ ياطويل الباع=وطيبك ياسليل المجد بألواح الندى محفور
عزفت انغام سنجاره بوقفاتك بدون ايقاع=بطيب واضح يصلح لميدان الندى دستور
ولو ثلث العرب مثلك حرير المرجله ما ماع=ولا صار الندى العامر بعصر العولمه مقبور
اخبر البنك ماتنفع بطاقاته بدون ايداع=ومحدن يدرك الناموس والعليا بلا مخسور
ولو طبعك مثل غيرك بتخزين الذهب طماع=لك الله ماجعلت المال بدروب الصخى منثور
ولا عالجت ممرور يعاني من ثلاث اوجاع=ولا حاضيت ضيفان الدجى الداجي تقل ناطور
ونور الشمس يظهر له بديجور الظلام اشعاع=خيوطه بالسماء تطرد غياهب ظلمة الديجور
ولايحجب شعاع الشمس عن عين السليم رقاع=وبيرق طيبكم يبقى بظلعان الندى منشور
وراع الحسد يالمنعور مايحتاج كسر نخاع=لان النار في جوفه تشادي جمرة الدافور
ورغم اللي جرى ماني من اقدار الولي جزاع=مع ان اوضاعنا سارت بنا حادور في حادور
تبعت الطيب بس الوقت بدروب الندى ماطاع=ولا كل العرب تشبه عزوم اللي جدع خاكور
ومع شيبي كرهت السير مع غيري تقل مرياع=مدام القلب بدروب المراجل والندى مفطور
[/poem]