سجلونى من هواة المستشار
من عقب ما قصر اليوم الطويل
كلمتنى مي و الدنيا نهار
دلهتنى لين صار الوقت ليل
قالت الدنيا تجارب و اختبار
ناجحٍ فيها من الناس القليل
باسألك عن شى صار شلون صار
كذب جيل يصدقه خمسين جيل
قلت هاتي الاسئله يوم استدار
فكري و عزم على بدع الجزيل
قالت أصعب شى قلت الانتظار
لكن أسهل شى هو المستحيل
قالت أكذب شى قلت الافتخار
لكن أصدق شي تاريخ و دليل
قالت أطيب شى قلت الانتصار
لكن أردى شي دمعات الذليل
قالت أكرم شى قلت الاعتذار
لكن أحقر شي نكران الجميل
قالت أذكى شى قلت الاعتبار
لكن أغبى شي تدريس الهبيل
قالت أفضل شى قلت الابتكار
لكن أتفه شي تقليد الاصيل
و انا وياها الين الوقت طار
في الكلام الذرب و الخلق النبيل
عقب قالت ذكر أجيال الصغار
ان ما عكس الجزيل الا الهزيل
و الفضل لله ثم للمستشار
والا بينى و بينها حول ألف ميل




ـ ـ ـ ـ ـ ـ ـ ـ ـ ـ ـ ـ ـ ـ ـ ـ ـ ـ ـ ـ ـ ـ ـ ـ ـ
عبد الله بن علوش