حنيني آه يا ماقسى حنيني
تنامى ف الخفوق وفي وريده
حنيني والفراق يهدّ فيني
مباني للفرح كانت مشيده
أضيق ومن يداري لي أنيني؟
ويبعدني عن أزهار وجريده
هي الذكرى ليا قال: أذكريني
وأتذكر... يديني حول إيده!
أنا مدري أقول الحزن فيني؟؟
أو أنّي للحزن أمّ .. ووليده
لقى بروحي وطن وبرمش عيني
هدب يشبه مئآسيه العديده
أدوّر عن بلد إسمه.. ضنيني
وأضيع بشارع الذكرى شريده
يا هذا الحزن والخيبات فيني
يا نظرة حاسدٍ كانت سديده!
ألا ياليت.. هـ الفرحة تبيني
وتآخذني لمراسيها البعيده
ألا ياليت.... وأتمنّى تجيني
طواري خير وأقدارٍ سعيدة
وحتّى والأمل (مالي يديني)
أحسّ دموعي الحرّا شديدة
وتتساقط مطر من غيم عيني!
واخبّيها.... تباريح وقصيدة
.....
لنقآء ذآئقتكم