والله من ليلةٍ مرت على المحتار=لاعادها الله يابوجراح من صوره
من شوفتي للملامح هزني تذكار=الله يصبّر خفوقٍ شلته نوره
مرت سنين العمر من دونها معبار=علمي بها قبل عشر سنين مقهوره
واصبحت ابي من يطمّني وش الاخبار=عسى حياته مع الأيام مسروره
راع الهوَى في حياته دايمٍ دوّار=أكثر نواياه عند الناس مثبوره
ياجوّنا لو خذيت ايام وانت غبار=لابد مانسمع إن القاع ممطوره
مادامنا نتّجه لله باستغفار=خطيّة الذّنْب عند الله مغفوره
روفي بنا ياتجاربنا مع الأقدار=دام المذاخر بطيب النفس معموره
واللي قضَى كل عمره بالوفاء صبار=لازال مغمور والهقوات مغموره
مامن حلا ياتعثّر تالي المشوار=عسَى شوير المحبّه يصدق بشوره