جيتك وانا في خاطري كلام يجرح رقتك
ناوي ابكسر خاطرك واشوف دمعاتك تهل
حلفت لانهي كل شي والغي ابتسامة شفتك
جيتك وانا كلي شعور ٍ ثاير ٍ .. جيتك زعل
جمعت لك كل الحروف اللي بتحرق مهجتك
بخرتها بجمر الفراق المنحرق فيه الأمل
زله بسيطه واكبرت في عين جرحي غلطتك
حاولت لي يومين اهوّنها ولكن ماحصل
قلبي بخيل ٍ مابعد ضيّف شبايه غلطتك
ذي عادتي .. بس البلا .. لامن غلط راعي المحل
بعضي معك .. بعضك معي اكيد هذي حجتك
لاشك كان الرد جاهز جعل بعضك للشلل
جيتك وانا ماهمني باب ودرايش فلتك
بآصل ولاهمي عيون ٍ تحتري بعض الزلل
ويوم ٍ وصلت وجيت لك هز المشاعر كلمتك
وش فيك خير ودمعتك سالت على متن الكحل
دمعك ربش فكري وزادت ربشته من روعتك
جيت اقول الك الكلام القاسي وقلت الغزل
مدري اش جرالي يوم انا حسيت نظره بكتك
مات الزعل في داخلي واجتاحني كل الخجل
هذي حقيقة جيتي وهذي حقيقة دمعتك
جيتك ابكسر خاطرك عودت ودموعي تهل
|