كتبت الشعر مو لجلك ولكن فاض بي بركان
واما انتي فلا تسوين قصيده في نظر عيني



حلفتي لي تصونيني إذا صار الزمن خوان
وأول ما عثر حظي على دربك خذتيني

كسر رمح الزمن صدري وجيتك اشتكي حيران
نزعتي الرمح من صدري وفي ظهري طعنتيني

خسااااره كييف حبيت! نعم والله ندمان
غبي أدري نعم ادري ما دام انك سكنتيني

سنه من عمري وانا في لعبتك غرقان
أشيل الشوك من دربك وجرحي كان يدميني

وكنت أبكي إذا تبكي وأكون لبسمتك فرحان
وكنت اقرب من رموشك لعينك يوم تبغيني

عرفتك للآسف صحراء وحولتك إلى بستان
وشلتيني غصن أخضر وفي صخرك زرعتيني

حفرتك داخلي وظني تصوني عشرتي أزمان
وكنت أحفر قبر موتي على ساحل شراييني

على كف الشقا نامت جروحي والألم سهران
يحطمني .. يبعثرني .. وفي صحراك يرميني

ولكن عزتي تفرض أكون بدنيتي سلطان
وإن ظنك أجي أركع لجلك... ما عرفتيني

انا ما عادتي اشحذ من أمثالك رضا وإحسان
اموت بعزتي ارحم ولا ذلك يغطيني

وما دام الوفا عندك يدور له على عنوان
بدور لي على قلب يصون الحب وسنيني

ولو قلبي رجع حَبك بولع فيه بالنيران
وبكسرها أنا رجلي إذا صوبك توديني

ولو دار الزمن ضدك وجيتي تطلبي الغفران
وجبتي الشمس في كفك لعندي..ما بتلقيني

تقول الناس في وصفك جميله مثل عود البان
وإنك أجمل وأحلى بشر مخلوق من طيني

حساااااافه غرهم شكلك ويا ما تخدع الألوان
عموماً .. بقت كلمة أخيرة لك واسمعيني

إذا كنتي بنظر غيري ملاك على هيئة إنسان

قسم بالله ما تسوي شعره من رمش عيني