يا دروب حزني والشعر من شقاكن
ماهي على الأمجاد ماهي على الصيت

يوم الوجع هو مفترق من مشاكن
ياصاحبي رغم المسافات حييت

مفواح شوقي من على النار راكن
فاح وطفى جمر الغلى وأنت ماجيت

وليل السهر وظروف الأيام حاكن
ثوب الفراق اللي لبسته وقفيت

سكنتني بيت الحزن وأنت ساكن
أرض الغلا روض الفكر والتناهيت

خنجر غيابك داخل الروح ماكن
يتوغل بصدر الغلا كل ما أبطيت

في غيبتك عوج الضلوع يتباكن
والموت لامنك على البال مريت

أتنفسك وأحيا بقربك ولكن
أبقا جسد ينبض معك وأكثري ميت

غبت . . ومشاعر لهفتي بك تحاكن
ليتك على صوت الأحاسيس لبيت

تشتاق لك كل السكك والأماكن
ويميل لك غصن الوله كل ما أغضيت

ضروس الزمن ياناحل الخصر لكن .!
قوت الأمل قدام عيني وصديت

يوم الأمل مركاي عشقك مساكن
واليوم لامركى يسند ولا بيت

غير الهموم اللي علي يتراكن
وبذور حزن(ن) في خفوقي منابيت

يا ناعسات الطرف الله معاكن
مدامني عن ناحل الخصر ظليت

وليل السهر وظروف الأيام حاكن
ثوب الفراق اللي لبسته وقفيت


شعر ساير النزال