|
آه ياخويـه اللـي ماتعـوض غيابـه..!!
[align=center]
خيم الحزن في صدري ونوخ ركابـه
وابتدا ليل هم ونـوم عينـي هجرتـه
مابقى للقصايد وسط صـدري رحابـه
غير همٍ ليا اجتاح الخفـى ماشكرتـه
كل مخلـوق فالدنيـا مقـدر حسابـه
لو يقولون توه ماخلـص مـن ثمرتـه
والسبايـب تفـاوت والمنايـا تشابـه
وأجلَ الانسان تكتب ساعته من صغرته
آه ياخويـه اللـي ماتعـوض غيابـه
اشهد اني فقدته واشهد انـي خسرتـه
كيف ابنساه وادلـه واتناسـا مصابـه
وكل طاروق لاجيت ابتديبـه ذكرتـه
يابدر كل كسر يهون واجبـر صوابـه
غير كسرن يبا يبطي وانـا ماجبرتـه
رحمة الله على اللي له مقـام ومهابـه
منبع الطيب يوم الطيب تثمر شجرتـه
من فراقه غديت اقنب قنيـب الذيابـه
وبح صوتي ودمعي من عيوني نثرتـه
ودي اسلا عن الهاجوس واصك بابـه
مير حزني وهمـي ساقنـي ماقدرتـه
رثاء تركي الميزاني لفيصل الرياحي
[/align]
|